Monday, July 11, 2011

മര്‍ഡര്‍ 2- Murder 2

അണ്ണാ , നിങ്ങള്‍ ആള് കൊള്ളാമല്ലോ ?

അത് നിനക്ക് ഇപ്പോഴാണോ മനസിലായത് ?

അല്ല , രതിനിര്‍വ്വേദം കൊള്ളില്ല എന്ന് പറഞ്ഞിട്ട് , ഇന്നലെ രാത്രി വീണ്ടും തിയറ്ററിലോട്ട് കേറി പോണത് കണ്ടല്ലോ ?

ഓ അതാണോ .അത് ഒരു ഹിന്ദി രതിനിര്‍വ്വേദം കാണാന്‍ പോയതാഡേ .

എന്തോന്ന് ?

ഡേ, ആ കോമ്പ്ലക്ക്സിലെ രണ്ടാമത്തെ തിയറ്ററില്‍ മര്‍ഡര്‍ 2 ഓടുന്നുണ്ട് . നീ ഇതൊന്നുമറിയാതെ നിരൂപകന്‍ ആണെന്ന് പറഞ്ഞ് തെക്ക് വടക്ക് നടന്നോ.

അണ്ണാ , മലയാള സിനിമ കഴിഞ്ഞാല്‍ ഞങ്ങള്‍ പിന്നെ ഫിലിം ഫെസ്റ്റിവെലുകളില്‍ മാത്രമേ സാധാരണ താത്പര്യം കാണിക്കാറുള്ളു

ഫ്രീ ആയിട്ടു ഇക്കിളി സിനിമകള്‍ കാണാന്‍ അല്ലെ ?

നിങ്ങള്‍ ആളെ വടിയാക്കാതെ മര്‍ഡര്‍ ൨ ന്‍റെ വിശേഷങ്ങള്‍ പറ . മല്ലിക ഷെറാവത്ത് തകര്‍ത്ത് വാരിയ പടമല്ലേ മര്‍ഡര്‍? അപ്പോള്‍ രണ്ടാം ഭാഗവും മോശമാകാന്‍ വഴിയില്ല .

എന്നൊക്കെ പ്രതീക്ഷിച്ച് തന്നെയാണ് ഞാനും പടത്തിന് പോയത് . പടം തുടങ്ങിയപ്പോള്‍ തന്നെ ഒരു കാര്യം മനസിലായി. മര്‍ഡര്‍ 2 വിന് പേരിലല്ലാതെ മര്‍ഡര്‍ എന്ന ഇമ്രാന്‍ ഹഷ്മി- മല്ലിക ഷെറാവത്ത് സിനിമയുടെ കഥയുമായി ബന്ധമൊന്നും ഇല്ല .

കഥയൊക്കെ വഴിയെ പറയാം .ആദ്യം മല്ലികയ്ക്ക് പകരം ഈ സിനിമയില്‍ അഭിനയിച്ച ജാക്വലിന്‍ ഫെര്‍ണാണ്ടെസ് എങ്ങനെ ഉണ്ടെന്ന് പറ .

നിങ്ങള്‍ പ്രൊ: നിരൂപകരുടെ വൃത്തികെട്ട ഭാഷയില്‍ പറഞ്ഞാല്‍ . മര്‍ഡറില്‍ മല്ലികയ്ക്ക് ലഭിച്ച അത്ര 'തുറന്ന് ' അഭിനയിക്കാനുള്ള അവസരങ്ങള്‍ ഈ ചിത്രം ജാക്വലിന് നല്‍കുന്നില്ല എന്നത് തികച്ചും നിരാശാജനകമാണ് .

അപ്പൊ പോയിട്ട് കാര്യമില്ല അല്ലെ ?

ഫാസ്റ്റ് ഹാഫില്‍ ചൂടന്‍ രംഗങ്ങള്‍ കുറച്ചൊക്കെ ഉണ്ട് . സെക്കണ്ട് ഹാഫ് മൊത്തം ക്രൈം ത്രില്ലര്‍ ആണ് എന്നാണ് സംവിധായകന്‍ മോഹിത് സൂരിയുടെ ഭാവം.

ഛെ , കളഞ്ഞില്ലേ. ആ പോട്ട് പുല്ല്. ത്രില്ലര്‍ എങ്കില്‍ ത്രില്ലര്‍, സംഭവം എങ്ങനെ ഉണ്ട് ?

ഡേ , മൊത്തത്തില്‍ ഒരു അലമ്പ് പടം .

അല്ല അപ്പൊ ത്രില്ലര്‍...

കുന്തം. അത് സംവിധാകന്‍റെ ആഗ്രഹം . പക്ഷെ അത് സ്ക്രീനില്‍ എത്തിയപ്പോള്‍ വെറും കൂറ പടമായി.

അഭിനേതാക്കള്‍ , സംഗീതം , ക്യാമറ , എഡിറ്റിംഗ് , ഇതൊക്കെ ?

എന്തിനാടാ നിറുത്തിയത് , വസ്ത്രാലങ്കാരം, കളറിംഗ് , ഗതാഗതം , പി ആര്‍ , ഫിനാന്‍സ് ഇതൊക്കെ കൂടി ചോദിക്ക് .

വേണ്ട അണ്ണാ. അഭിനേതാക്കള്‍ എങ്ങനെ ഉണ്ടെന്നെങ്കിലും ...

ഒരു ഹാസ്യ വിഗ്ഗും വെച്ച് , ലോകം മുഴുവന്‍ കൊച്ചിലെ പീഡിപ്പിച്ചത്(ദുഃഖങ്ങള്‍ നല്‍കിയത് കൊണ്ട്- തെറ്റിദ്ധരിക്കരുത് ) കൊണ്ട് പോലീസ് ജോലി രാജി വെച്ച് കള്ളക്കടത്ത്കാരുടെ ഗുണ്ടാപ്പണി ചെയുകയും , ഫ്രീ ടൈമില്‍ കള്ള് കുടിച്ചു പെണ്ണ് പിടിച്ച് നടക്കുകയും ചെയ്യുന്ന, വേദനിക്കുന്ന ഒരു ആത്മാവ് .അതാണ്‌ ഇമ്രാന്‍ ഹഷ്മിയുടെ ഈ ചിത്രത്തിലെ നായക കഥാപാത്രം. മസില്‍ പിടിച്ച് നടക്കുക, ക്യാമറയിലേക്ക് തുറിച്ചു നോക്കുക , നായികയെ ഉമ്മ വെയ്ക്കുക ...ഈ മൂന്നു കാര്യങ്ങള്‍ ഇമ്രാന്‍ ഹഷ്മി ഈ പടത്തില്‍ ചെയ്തിട്ടുണ്ട് .കൂടുതല്‍ ഒന്നും അങ്ങേരെ കുറിച്ച് പറയാനില്ല . നായികാ ജാക്വലിന്‍ ആദ്യ പകുതിയിലെ മേനി പ്രദര്‍ശനം കഴിഞ്ഞ് പിന്നെ കുറെ നേരത്തേക്ക് അപ്രത്യക്ഷയാകും(ഇടയ്ക്കിടെ മിന്നി മറയും എന്ന് പറയുന്നതാവും കൂടുതല്‍ ശരി ) .ക്ലൈമാക്സില്‍ വീണ്ടും പ്രത്യക്ഷപ്പെടും. അത്ര തന്നെ .പ്രത്യേകിച്ച് അഭിനയം പോയിട്ട് ഒന്ന് നേരെ ചിരിക്കാന്‍ പോലുമുള്ള അവസരം ആ കൊച്ചിന് ഈ റോള്‍ നല്‍കുന്നില്ല .

അപ്പോള്‍ അഭിനേതാക്കള്‍ ആരും കൊള്ളില്ല, അല്ലേ ?

അല്ലഡേ , മാനസിക രോഗിയായ വില്ലനായി പ്രശാന്ത് നാരായണന്‍ തകര്‍ത്തിട്ടുണ്ട്. ഉഗ്രന്‍ പെര്‍ഫോമന്‍സ് .പക്ഷെ ഈ കൂറ പടത്തിലായിപ്പോയി എന്ന് മാത്രം .മോഹിത് സൂരി എന്ന സംവിധായകനോട് സത്യത്തില്‍ എനിക്ക് ദേഷ്യം തോന്നിയത് പ്രശാന്ത് നാരായണന്‍ അവതരിപ്പിച്ച ധീരജ് പാണ്ഡേ എന്ന കഥാപാത്രത്തെ കണ്ടപ്പോഴാണ് . സംവിധയാകാന്‍ , ക്രിയറ്റിവിറ്റി കാണിച്ചു ചളമാക്കാത്ത ഒരു സിനിമയില്‍ ആയിരുന്നു ഈ കഥാപാത്രമെങ്കില്‍ ഒരു പക്ഷേ ഹിന്ദി സിനിമ എന്നും ഓര്‍ക്കുന്ന ഒരു വില്ലന്‍ കഥാപാത്രം കൂടി ഉണ്ടായേനെ .പക്ഷെ പറഞ്ഞിട്ട് കാര്യമില്ല .

പാട്ടുകളും കൊള്ളില്ലേ അണ്ണാ ?

അതല്ലേഡേ മറ്റൊരു സങ്കടം . മര്‍ഡറില്‍ നല്ല പാട്ടുകള്‍ ഉണ്ടായിരുന്നു. മര്‍ഡര്‍ 2 വില്‍ നല്ലത് പോയിട്ട്, സഹിക്കാവുന്ന ഒരെണ്ണം പോലുമില്ല .

അപ്പോള്‍ ചുരുക്കത്തില്‍ വലിയ പ്രതീക്ഷകള്‍ ഒന്നും വേണ്ടാ എന്ന് സാരം.

നിന്‍റെ പ്രതീക്ഷ മര്‍ഡറിലെ മല്ലികയെ ഓര്‍ത്താണ് എന്ന് എനിക്കറിയാം. അത് ഏതായാലും വേണ്ട . പിന്നെ നല്ല പടമായിരിക്കും എന്നാ പ്രതീക്ഷയില്‍ വേണേല്‍ പൊയ്ക്കോ .ഒന്നാന്തരം നിരാശയോടെ മടങ്ങി വരാം .

അണ്ണന്‍ ഇതു പ്രതീക്ഷയുമായിട്ടാണ് പോയത് ?

അണ്‍ഫെയിത്ത്ഫുള്‍ എന്ന നല്ല ഇംഗ്ലീഷ് സിനിമയുടെ വൃത്തികെട്ട അനുകരണമായിരുന്നു മര്‍ഡര്‍ എന്നാണ് എന്‍റെ അഭിപ്രായം. അപ്പോള്‍ മര്‍ഡര്‍ 2 വിന് ഞാന്‍ എന്ത് പ്രതീക്ഷയും കൊണ്ടായിരിക്കും പോയിരിക്കുക ? നിനക്ക് എന്ത് തോന്നുന്നു

നായിക...

ലത് തന്നെ .പക്ഷെ തിയറ്ററില്‍ നടന്നത് ചതിയാണ് അനിയാ കൊടും ചതി !!!

3 comments:

  1. ഇതില്‍ ഒരു Item Song നെ പറ്റി വാര്‍ത്തകള്‍ വന്നിരുന്നു Censor Boardപറഞ്ഞു TVയില്‍ കാണിക്കാന്‍ പാടില്ല എന്നൊക്കെ, അതിനെ പറ്റി പ്രേക്ഷകന്‍ ഒന്നും പറഞ്ഞില്ല...അത്രക്കും ചൂടുള്ള പാട്ടാണോ

    ReplyDelete
  2. ചതിയില്‍പെട്ട പ്രേക്ഷകന്‍

    ReplyDelete
  3. കൊറിയന്‍ ചിത്രമായ ദി ചേസര്‍ എന്നതിന്റെ വികലമായ ഒരു അനുകരണം ആണ് മര്‍ഡര്‍ 2

    ReplyDelete