Sunday, January 31, 2010

ദ ബോഡിഗാര്‍ഡ് - ഒരു പരസ്യവിചാരണ

പ്രതി ഹാജരുണ്ടോ ?

ഉണ്ടേ

ഈ ചലച്ചിത്രനിരുപണ കോടതി തങ്ങളുടെ മേല്‍ ചുമത്തിയിട്ടുള്ള കുറ്റം എന്താണെന്നു താങ്കള്‍ക്ക് പൂര്‍ണ ബോധ്യമുണ്ടോ ?

സത്യമായും ഇല്ല. ഒന്ന് പറഞ്ഞ് തന്നാല്‍ ഉപകാരം ആയിരുന്നു .

പ്രേക്ഷകന്‍ എന്ന പേരില്‍ അറിയപെടുന്ന താങ്കള്‍ , സിദ്ദിക്ക് സംവിധാനം ചെയ്തതും ദിലീപ്,നയന്‍ താര എന്നിവര്‍ അഭിനയിച്ചതുമായ ദ ബോഡിഗാര്‍ഡ് എന്ന ചിത്രം കണ്ടിരുന്നോ ?

ഉവ്വ് കണ്ടായിരുന്നു . അത് കുറ്റമാണോ ?

കോടതിയോട് ഇങ്ങോട്ട് ചോദ്യം വേണ്ട.ആ ചിത്രം കണ്ടതു ഒരു താക്കീതു തരാനുള്ള കുറ്റമേ ആകുന്നുള്ളൂ(ചീള് പെറ്റി കേസ്) അതിലും ഗുരുതരമായ ഒരു കുറ്റമാണ് തങ്ങളുടെ പേരില്‍ ആരോപിക്കപ്പെട്ടിട്ടുള്ളത് .

ആണോ ? എന്താണാവോ ആ കുറ്റം ?

ആ പടം നിങ്ങള്‍ക്ക് ഇഷ്ടപ്പെട്ടു എന്നും പടം വലിയ കുഴപ്പം ഇല്ല എന്ന് പറഞ്ഞതായി കേള്‍ക്കുന്നത് ശരിയാണോ?

അതെ. സംഗതി സത്യം ആണ് .

അപ്പോള്‍ നിങ്ങള്‍ കുറ്റം സമ്മതിച്ചു ? മലയാള സിനിമ ലോകത്ത് സൂപ്പര്‍ താര ചിത്രങ്ങള്‍ ഒഴികെ മറ്റു ഒന്നിനെ കുറിച്ചും നല്ലത് പറയാന്‍ പാടില്ല എന്നാണ് നിരുപക തൊഴിലാളി യുണിയന്‍ തീരുമാനം എന്നറിയില്ലേ ? പ്രതേകിച്ചു ജയറാം , സുരേഷ്ഗോപി ,ദിലീപ് , ജയസൂര്യ , പ്രിത്വിരാജ് എന്നിവരുടെ പടങ്ങളെ പറ്റി?

അയ്യോ പാവങ്ങള്‍ , കുറച്ചു എങ്കിലും കൊള്ളാവുന്ന സംവിധായകര്‍ ഈ ഈച്ച ചക്കയില്‍ പറ്റിയിരിക്കുനത് പോലെ സൂപ്പര്‍ താരങ്ങളെ പോതിഞ്ഞിരിക്കുനത് കൊണ്ട് വല്ലപ്പോഴും ആണ് ഇവര്ക്കൊകെ ഒരു ഭേദപെട്ട പടം കിട്ടുന്നത് .അപ്പോള്‍ അതിനെ തെറി പറഞ്ഞു ഒതുക്കുനത് ന്യായമാണോ കോടതീ ?

അപ്പോള്‍ ദ ബോഡിഗാര്‍ഡ് ഭേദപെട്ട ഒരു പടം ആണെന്ന വാദത്തില്‍ നിങ്ങള്‍ ഉറച്ചു നില്‍ക്കുന്നു ?

സത്യം ആയിട്ടും ഈ പടം കണ്ടപ്പോള്‍ എനിക്ക് ബോറടിച്ചില്ല

പക്ഷെ കഥാതന്തുവിനു തന്നെ വിശ്വാസ്യത പോര എന്നാണല്ലോ കേട്ടത് ?

അങ്ങനെ ഒരു സാധനം (കഥാതന്തു) ഉണ്ടാവുനത് തന്നെ ഇപ്പോഴത്തെ നിലക്ക് മലയാള സിനിമക്ക് ഒരു ആശ്വാസമാണ്.ഗുണ്ടകളെ ആരാധിക്കുന്ന ഒരു ആളുടെ കഥ പറയുമ്പോള്‍ ഉണ്ടാകുന്ന ഈ വിശ്വസ്യ പ്രശ്നത്തിന് കാരണം കാരണം , കേരളത്തിലുള്ള സകല ചെറുപ്പക്കാരും പ്ലസ്‌ ടൂ കഴിഞ്ഞു എഞ്ചിനീയറിംഗ് / എം ബി എ കഴിഞ്ഞു ഒരു ബഹു രാഷ്ട്ര കമ്പനിയില്‍ ക്ഷൌരം ചെയുന്നവര്‍ ആയിരിക്കണം എന്ന കോണ്‍സെപ്റ്റ് ആണ് .പിന്നെ ഗുണ്ടകള്‍ക്ക് അനുയായികള്‍ ഉണ്ടാകുന്നതു അവനൊക്കെ പത്രത്തില്‍ പരസ്യം കൊടുത്തു , വാക്ക് ഇന്‍ ഇന്റര്‍വ്യൂ നടത്തിയിട്ടാണ് എന്നാണോ വിചാരം? അവരെയൊക്കെ ആരാധിക്കാനും അവരുടെ കൂടെ നടക്കുനതു അഭിമാനം ആയും കാണുന്നവര്‍ ഉള്ളത് കൊണ്ട് തന്നെയാണെന്നു എനിക്ക് തോന്നുനത് .

എന്നാലും കഥയ്ക്ക് ഒരു പുതുമ ഇല്ലല്ലോ . മേം ഹു ന മണക്കുന്നു എന്നാണല്ലോ പൊതുവേ ഒരു സംസാരം ?

അതെ ദിലീപിന്റെ കഥാപത്രം നയന്‍ താരയുടെ ബോഡി ഗാര്‍ഡ് ആയി കോളേജ് ഇല്‍ പോയി ആ ക്ലാസ്സില്‍ തന്നെ പഠിക്കുന്നതിനു പകരം അവിടെ കാന്റീന്‍ നടത്തിയിരുന്നെങ്ങില്‍ ആര്‍ക്കും ഒരു പ്രശ്നവും ഉണ്ടാകുമായിരുന്നില്ല . പിന്നെ നായകന്റെ മാതാ പിതാക്കള്‍ അവിടെ വെച്ചായിരുന്നു മരിച്ചത് എന്നൊരു സൈഡ് ട്രാക്ക് കൂടെ ഉണ്ടായിരുന്നെങ്കില്‍ കേമമായി.

ഡാ ഡാ ..... അത് വിട്ടേ. ബാക്കി പറ .

പൊന്ന് കോടതീ,വലിയ വീട്ടിലെ പെങ്കൊച്ചു ജോലിക്കാരനെ പ്രേമിക്കുനതും, രണ്ടു പേര്‍ പരസ്പരം കാണാതെ പ്രേമിക്കുന്നതും ഒക്കെ പല പ്രാവശ്യം സിനിമകളില്‍ (പല ഭാഷകളിലായി) കണ്ടിട്ടുള്ളതാണ് . അങ്ങനത്തെ ഒരു വിഷയം മര്യാദക്ക് എടുത്ത ഒരു പടത്തെയും അതിന്റെ പ്രവര്‍ത്തകരെയും തെറി പറയാന്‍ എനിക്ക് പാടാണ്.

അപ്പോള്‍ ആ പടത്തില്‍ ഒഴിവാക്കവുന്നതായി ഒന്നും തന്നെ ഇല്ലെന്നോ ?
എനിക്ക് ഒഴിവാകാമായിരുന്നു എന്ന് തോന്നിയത്, ദിലീപ് കോളേജ്ല്‍ മയക്കു മരുന്നു കച്ചവടം നിറുത്തുന്ന രംഗം .പിന്നെ നായകന്റെ തിന്മയെ എതിര്‍ക്കാന്‍ ബലം വേണം എന്ന മട്ടിലുള്ള ന്യായീകരണങ്ങള്‍, അധികം ഇല്ലെങ്കിലും മുഴച്ചു നില്‍ക്കുന്നു . ഒരു പാട്ടും വേണമെങ്ങില്‍ കളയമായിരുന്നു .

പിന്നെ പിന്നെ .. പോരട്ടെ അങ്ങനെ ......
ഇത്രേ ഉള്ളു .....

അപ്പോള്‍ അഭിനയമോ ? സംവിധാനം ? തിരകഥ ?

തിരകഥ,പൊതുവേ പഴുതുകള്‍ ഇല്ലാതെ വൃത്തിയായി ചെയ്തിടുണ്ട് . സംഭവങ്ങളുടെ പരിണാമം സാമാന്യം തെറ്റില്ലാത്ത ഒഴുക്കോടെ പോകുന്നു . ജനത്തെ പൊട്ടിചിരിപ്പികാന്‍ മൂന്നാം കിട തമാശകള്‍, ദ്വയാര്‍ഥ പ്രയോഗങ്ങള്‍ എന്നിവ തീരെ ഇല്ല. പടത്തിന്റെ പോക്ക് കണ്ടപ്പോള്‍ ക്ലൈമാക്സ്‌ കുളം ആകുമെന്ന് കരുതിയെങ്ങിലും,പ്രതീക്ഷിച്ചതിലും വളരെ നന്നായി അവസാന രംഗങ്ങള്‍ ഒരുക്കുവാന്‍ സംവിധായകന് കഴിഞ്ഞിട്ടുണ്ട്.അഭിനയം, എല്ലാവരും അവരവരുടെ റോളുകള്‍ നന്നാക്കാന്‍ പരമാവധി ശ്രമിച്ചിടുണ്ട്. ദിലീപ് അപൂര്‍വമായി പിടികുടുന്ന താര ബോധം (താരമാണെന്ന ബോധം) മാറ്റി നിര്‍ത്തിയാല്‍ നന്നായിട്ടുണ്ട് . ത്യാഗരാജന്‍ വര്‍ഷങ്ങള്‍ക്കു മുന്‍പ് ന്യൂ ഡല്‍ഹിയില്‍ അഭിനയിച്ചത് പോലെ തന്നെ ഇതിലും അഭിനയിച്ചിട്ടുണ്ട്.(അത് വാനോളം പുകഴ്ത്തിയവര്‍ക്ക് ഇപ്പോള്‍ മറിച്ചു തോന്നേണ്ട കാര്യം ഇല്ല ).തമിഴിലും തെലുങ്കിലും തിരക്കുള്ള താരം എന്ന നിലക്ക് പ്രതീക്ഷിക്കാനാവാത്ത ഉത്തരവാദിത്വത്തോടെ നയന്‍താര തന്റെ റോള്‍ ഭംഗിയാക്കി.ഇപ്പോള്‍ ഇറങ്ങുന്ന മലയാള പടത്തില്‍ നിന്നും ഇതില്‍ കുടുതല്‍ പ്രതീക്ഷിക്കുനവനെ വിഡ്ഢി അല്ലെങ്കില്‍ അത്യാഗ്രഹി എന്നല്ലേ വിളിക്കേണ്ടത്?

അപ്പോള്‍ താന്‍ തിരുത്താന്‍ ഭാവം ഇല്ല ?

ഇല്ലെന്നു മാത്രമല്ല ഈയടുത് കണ്ട ചട്ടമ്പിനാട്, ഇവിടം സ്വര്‍ഗമാണ്,ഹാപ്പി ഹസ്ബന്‍സ് എന്നീ പടങ്ങളെകാളും ഭേദം ആണെന്ന് എനിക്ക് തോന്നിയത് ഈ പടം ആണ്.

അപ്പോള്‍ കോടതിക്ക് പടം മോശം ആണെന്നാണ് അഭിപ്രായം എങ്കിലോ ?

കോടതി ഓസിനാണ് പടം കണ്ടതെങ്കില്‍ എനിക്ക് ഒന്നും പറയാനില്ല. മറിച്ചു ജോലി ചെയ്തു ഉണ്ടാക്കിയ കാശു കൊടുത്താണ് പടം കണ്ടതെങ്കില്‍ ആ കാശു പോയതില്‍ എനിക്ക് ദുഃഖം ഉണ്ട്. പക്ഷെ എനിക്ക് കാശു പോയില്ല എന്ന് തോന്നിയത് തെറ്റാണോ?

ഇവന്‍ നന്നാവുന്ന ഒരു ലക്ഷണവും ഈ കോടതി കാണുന്നില്ല . ആയതിനാല്‍ ആദ്യം പറഞ്ഞ കുറ്റങ്ങള്‍ ചെയ്തു എന്ന് വ്യക്തമായി തെളിഞ്ഞതിനാല്‍ പ്രതിയെ മരണം വരെ തൂക്കില്‍ ഏറ്റാന്‍ ഈ കോടതി വിധിക്കുന്നു .

ഒരു മിനിട്ട് കോടതി.. എനിക്ക് കുറച്ചു മാര്‍ക്ക് കൂടി ഇടാന്‍ ഉണ്ടായിരുന്നു ....?

ഇവനെ ഇതു വരെ തൂക്കിയില്ലേ ആരവിടെ .....വേഗം തൂക്കെടെ ഇവനെ.

Saturday, January 30, 2010

ഇവിടം സ്വര്‍ഗം ആണേ...സമ്മതിച്ചു

ഡാ .. അവിടെ നില്‍കെടാ .. നില്ക്കാന്‍ .

മം എന്താ അണ്ണാ.. ഒരു വഴിക്ക് പോകുമ്പോള്‍ ഒരു മാതിരി ....

ഹാ...ചൂടാവല്ലടെ .നീയെന്താ രണ്ടു ദിവസമായി എന്നെ കാണുമ്പോള്‍ ഒരു ഒഴിഞ്ഞു മാറ്റം.സത്യം പറയെടെ

അത് പിന്നെ........... അണ്ണന്‍ ആരോടും പറയരുത് എനിക്കൊരു അബദ്ധം പറ്റി. പറ്റി പോയി എന്ന് പറഞ്ഞാല്‍ മതിയല്ലോ .

ഓഹോ എന്തെടെ കേസ് .....

അണ്ണന്‍ കഴിഞ്ഞ ആഴ്ച്ച പോത്തിന് വേദം ഓതുന്നത്‌ പോലെ ഉപദേശിച്ചിട്ടും ഞാന്‍ പോയി ഇവിടം സ്വര്‍ഗമാണ് എന്ന പടം കണ്ടു .

ഓഹോ അത്രേ ഉള്ളോ. അത് നല്ല പടം ആണെന്നാണല്ലോ മാധ്യമങ്ങളും നിരുപകന്മാരും ഒക്കെ ഒരേ ശബ്ദതില്‍ പറയുന്നേ .ഏതോ ഒരുത്തന്‍ ആ പടത്തിന്റെ തിരകഥ ഒരു റഫറന്‍സ് പുസ്തകം ആക്കണം എന്ന് വരെ എഴുതി കണ്ടു .

നിരുപകര്‍ , മാധ്യമങ്ങള്‍,... ആ വക നാറികളെ കുറിച്ച് എന്നോടൊന്നും പറയരുത് . അവന്റെ ഒക്കെ കൊലവിളി കേട്ടാണ് നാല്‍പതു രൂപ തിയേറ്റര്‍കാരന് പണ്ടാരമടക്കിയത് . അതിനു എനിക്കു കിട്ടി അണ്ണാ .

നീ പോടെ . വര്‍ഷങ്ങള്‍ക്കു ശേഷം ലാലിനെ പ്രേക്ഷരക്ക് തിരിച്ചു കിട്ടി എന്നോ കളഞ്ഞു കിട്ടി എന്നോ മറ്റോ ആണ് ഇന്നലെയും പത്രത്തില്‍ വായിച്ചതു. പിന്നെ നിനക്ക് മാത്രം എന്തെടെ പിടിക്കാത്തത് ? മാത്രമല്ല കേരള സമൂഹത്തെ ഗ്രസിച്ചു കൊണ്ടിരിക്കുന്ന ഭൂമാഫിയ വിപത്തിലെക്കുള്ള ഒരു ചൂണ്ടു പലക കുടിയാണ് ഈ ചിത്രം എന്നാണല്ലോ വായിച്ചതു ?

അവന്റെ ഒക്കെ ഒരു ചൂണ്ടു പലക !!! ആ പലക കിട്ടിയിരുന്നേല്‍ ഈ പടത്തിന്റെ സംവിധായകനും തിരകഥ കൃത്തിനും ഓരോന്ന് കൊടുക്കാമായിരുന്നു .ഇത്ര നല്ല ഒരു വിഷയത്തെ ഇത്ര സില്ലി ആയി എടുത്ത ധീര കൃത്യത്തിനു അവര്‍ക്ക് പത്തില്‍ ഒരു ഒന്‍പതു അര മാര്‍ക്ക് വരെ കൊടുക്കാം .

ഡേ നില്ല് നില്ല് ... കേറി മാര്‍ക്കിടാന്‍ നീ ആരു ബൂലോക നിരുപകനാണോ ? മര്യാദക്ക് കാര്യം പറയെടെ .

ഈ പടത്തിന്റെ കഥ അറിയാമല്ലോ. പടം തുടങ്ങുന്നത് തന്നെ മികച്ച അദ്ധ്യാപനത്തിനുള്ള അവാര്‍ഡോ, മികച്ച എഴുത്തുകാരിക്കുള്ള അവാര്‍ഡോ അങ്ങനെ ഏതാണ്ട് ഒരെണ്ണം വാങ്ങിയ ഒരു ടീച്ചറിനെ കുറിച്ചുള്ള ഡോകുമെന്ററി എടുക്കാന്‍ (ദിവസവും നാലു വിവാദം വീതം കിട്ടുന്ന ഈ കാലത്ത് ഏത് ചാനലുകാരാടെ അങ്ങനെ ഒരു പരിപാടിക്ക് സമയം കളയുന്നത് ) ഒരു ചാനല്‍ സംഘം ഒരു പെങ്കൊച്ചിന്റെ (പ്രിയങ്ക) നേതൃത്വത്തില്‍ ടീച്ചറ്മായി ഒരു നാട്ടിന്‍ പുറത്തു എത്തുന്നതാണ് .പതിവ് പോലെ ആ നാട്ടിലെ സ്ഥിരം ദിവ്യന്മാര്‍ കോമാളി കളികളുമായി ചാനലില്‍ തല കാണിക്കാന്‍ തള്ളുന്നു . ഇതിനിടയില്‍ ഒരാള്‍, ടീച്ചര്‍ന്റെ നിരവധി പ്രത്യേകതകള്‍ ഉള്ള (ഈ പ്രത്യേകതകള്‍ എന്താണെന്നു പടം തീരുന്ന വരെ എനിക്കു മനസിലായില്ല )ഒരു ശിഷ്യന്‍ വേറെ ഉണ്ടെന്നും.പക്ഷെ അയാള്‍ക്ക് ഇതിലൊന്നും താല്പര്യം ഇല്ലാത്തതിനാല്‍ ഇങ്ങോട്ട് വരില്ലെന്നും വേണമെങ്കില്‍ അങ്ങോട്ട്‌ പോയി നിര്‍ബന്ധികണം എന്നും പറയുന്നു.( ഇതു പറയുന്നത് വല്ല സായികുമാറിനെയോ സിദ്ധിക്കിനെയോ പറ്റി ആയിരുന്നേല്‍ എന്തൊരു മൊഡ എന്ന് നമ്മള്‍ പറഞ്ഞേനെ ) കേട്ട പാതി പെങ്കൊച്ചു ചാനല്‍ സംഘവും ടീച്ചര്‍മായി അങ്ങോട്ട്‌ നീങ്ങുന്നു(ഇതിനിടയില്‍ എപ്പോളോ പ്രിയങ്ക "ഒന്ന് പൊയ് നോക്കാം ഷൂട്ട്‌ ചെയ്യാന്‍ എന്തെങ്ങിലും കിട്ടുമോ എന്ന് നോക്കാം " പറയുന്നതാണ് എന്റെ ഓര്‍മയില്‍ ഈ ചിത്രത്തിലെ ഏറ്റവും (ഒരു പക്ഷെ ഒരേ ഒരു ) സ്വാഭാവികമായ സംഭാഷണം).പോകുന്ന വഴിക്ക് നമ്മള്‍ കാണുന്നത് ലാലേട്ടന്‍ ഒരു ഇടവഴിക്ക് മുന്നില്‍ നിന്ന് അകത്തേക്ക് നോക്കി "എടി നീ ഇറങ്ങി വരുന്നോ അതോ ഞാന്‍ അങ്ങോട്ട്‌ വരണോ .ഇവിടെ ആണുങ്ങള്‍ ഇല്ലെന്നോ നിന്റെ വിചാരം .മര്യാദക്ക് വന്നില്ലേല്‍ നിന്റെ മുലക്കു പിടിച്ചു ഞെക്കും " ഇത്യാദി ഡയലോഗുകള്‍ വിടുന്നു . മണ്ടന്മാരായ നമ്മളും ചാനല്‍ ടീമും ഇതു ഏതോ സ്ത്രീയോടാണ് പറയുന്നത് എന്നോര്‍ത്ത് അമ്പരന്നു നില്‍ക്കുമ്പോള്‍ ക്യാമറ തിരിഞ്ഞു ഒരു പശുവിനോടാണ് ഇതു പറയുന്നത് എന്ന് കാണിക്കുന്നു .ഓഹ് ഗംഭീര തുടക്കം അല്ലെ അണ്ണാ.

എടെ അതിപ്പോള്‍ ഒരു സിനിമ ആകുമ്പോള്‍ ......

അത് കൊണ്ട് നില്കണ്ടേ ... ഇയാളുടെ കൂടെ പോകുന്ന ചാനല്‍ സംഘവും നമ്മളും കാണുന്നത് .അടിസ്ഥാന വിദ്യാഭ്യാസവും മൂന്ന് ഏക്കര്‍ സ്ഥലവും ഒള്ള ഒരു മനുഷ്യന്‍ മര്യാദക്ക് പച്ചകറി കൃഷിയും കാലിവളര്‍ത്തലും ആയി ജീവിച്ചു പോകുനതാണ് .നാട്ടിന്‍ പുറത്തു ഇതു ഒരു മഹത്തായ സംഭവമാണെന്ന് എനിക്ക് ഇതു കണ്ടപ്പോളാണ് മനസിലായത്.ഏതായാലും ഈ അത്ഭുതദൃശ്യം കണ്ടതോടെ പ്രിയങ്കയുടെ ചാനല്‍കാരി മൂക്ക് കുത്തി താഴെ വീഴുന്നു .
അവാര്‍ഡു ടീച്ചറിനോട് പോയി പണിനോക്കാന്‍ പറഞ്ഞിട്ട് പുള്ളിക്കാരി മോഹന്‍ലാലിന്റെ ഫാമിനെ കുറിച്ചു പരിപാടി ചെയ്യാന്‍ തീരുമാനിക്കുന്നു. ജനിച്ചപ്പോഴേ വിനയം ഒരു എഴുപത്തിയഞ്ച് കിലോയെങ്കിലും (ബാക്കി തൊണ്ണൂറ് കിലോ മാംസവും) ശരീരത്തിലുള്ള ലാല്‍ സമ്മതിക്കുന്നില്ല. പിന്നെ ആ ഫാമിനെക്കുറിച്ചുള്ള പരിപാടി ചിത്രീകരിക്കുക്ക എന്നത് ചാനലുകാരിയുടെ ജീവിതവൃതം പോലെയായി മാറുകയാണ് .

പിന്നെ നായകന് ഒരു കുടുംബം ഇരിക്കട്ടെ എന്ന് കരുതി തിലകനെയും,കവിയൂര്‍ പൊന്നമ്മയേയും,സുകുമാരിയേയും കാസ്റ്റ് ചെയിതിടുണ്ട് .

നായകന്‍ പതിവ് പോലെ കല്യാണ പ്രായം കഴിഞ്ഞു നില്‍ക്കുന്ന വ്യക്തി (ഇതു മലയാള സിനിമയുടെ ഒരു സ്ഥിരം സാധനം ആയിട്ടുണ്ട് ) ലാലേട്ടനെ കണ്ടാല്‍ ആരും പറയും ലാലേട്ടന്റെ അത്ലെറ്റിക്ക് ബാഡി കണ്ടാല്‍ ആരും പറയും പുള്ളി അതിരാവിലെ തൂമ്പയുംമായി ഇറങ്ങിയാല്‍ സൂര്യന്‍ താന്നിട്ട് മണ്ണില്‍ നിന്നും കയറുന്ന ഒരു മനുഷ്യനാണെന്ന്!!! പിന്നെ അദേഹത്തിന് വരുന്ന കല്യാണ ആലോചന ആണെങ്ങില്‍ ബംഗ്ലൂര്‍ ഇല്‍ ഒരു കമ്പനിയുടെ സീ ഈ ഓ (CEO യേ !!!) ബംഗ്ലൂരില്‍ ഒരു ഐ ടി കമ്പനിയുടെ സി ഇ ഓ പോസ്റ്റ് കുടുമ്പക്കാര്‍ പറഞ്ഞത് കൊണ്ട് മാത്രം പുല്ലു പോലെ കളഞ്ഞിട്ട് ആ ഓണം കേരാ മൂലയിലെ സര്‍വീസ് സഹകരണ ബാങ്കില്‍ മാനേജരായി ജോലി നോക്കുന്ന ഒരു സുന്ദരിയുടെയും(ലക്ഷ്മി ഗോപാലസ്വാമി). ആ കഥാപാത്രത്തിന്റെ രൂപവും ഭാവവും കണ്ടാന്‍ ബ്രില്യന്‍സ് അക്കാദമി ഓഫ് എക്സലന്‍സ് ടോറ്റൊരിയലില്‍ ക്ലെറിക്കല്‍ പരീക്ഷയുടെ കോച്ചിംഗ് കഴിഞ്ഞു റെസ്റെഴുതി പാസായി ക്ലാര്‍ക്കായി , പിന്നെ അത് മൂത്ത് മാനേജരായ ഒരാളുടെ ശരീര ഭാഷയാണ്‌ എന്തോകൊണ്ടോ റോഷന്‍ ആണ്ട്രൂസ് ഇവരുടെ കഥാപാത്രത്തിന് നല്‍കിയിരിക്കുന്നത്. പിന്നെ അവര്‍ ഐ ടി കമ്പനിയുടെ സി ഇ ഓ ആയിരുന്നു എന്ന് പറഞ്ഞത് ഒരു പക്ഷെ എട്ടാം ക്ലാസില്‍ പഠിത്തം നിറുത്തി കര്‍ഷകനായ ലാലേട്ടനെ തേടി ബി ടെക്- എംബി എ കഴിഞ്ഞ യുവ സുന്ദരികള്‍ ഇപ്പോഴും ക്യൂ നില്‍ക്കും എന്ന് ഫാന്‍സിനെ രഹസ്യമായി അറിയിക്കാന്‍ വേണ്ടിയായിരിക്കും , അല്ലെ അണ്ണാ ?

അവരോടു കല്യാണം കഴിഞ്ഞാല്‍ തൊഴുത്ത് കഴുകിയും ചാണകം വാരിയും ജീവിച്ചോണം എന്ന് ലാല്‍ പറയുന്നതോടെ പോയി അവര്‍ അങ്ങേരോട് പണി നോക്കാന്‍ പറയുന്നു ( തികച്ചും ന്യായം ).

ഇനിയാണ് കഥ എന്ന് പറയപ്പെടുന്ന സാധനം പുതിയ വഴിത്തിരിവില്‍ എത്തുന്നത്‌ . ദാ വരുന്നു വില്ലന്‍ ആലുവ ചാണ്ടി എന്ന ലാലു അലക്സ്‌ അവതരിപ്പിക്കുന്ന വില്ലന്‍ .(റിയല്‍ എസ്റ്റേറ്റ്‌ മാഫിയയുടെ ഭീകര മുഖം !!!)

ഒരു മിനിറ്റ് . ആലുവ ചാണ്ടി മലയാളത്തിലെ തികച്ചും വ്യത്യസ്ടമായ ഒരു കഥാപാത്രം ആണെന്നും മലയാളീകളുടെ മനസ്സിലേക്ക് ഈ കഥാപാത്രം ഇടിച്ചു കേറി എന്നാണല്ലോ വായിച്ചതു ?

പൊന്ന്‌ അണ്ണാ ആ കഥ അവിടെ എത്തിയപ്പോളാണ് ഈ റിയല്‍ എസ്റ്റേറ്റ്‌ മാഫിയ എന്താണെന്നു എന്നിക്ക് മനസിലായത് . ഒരു കോമാളി വില്ലനും പിന്നെ ഒരു മന്ദബുദ്ധി ഗുണ്ടയും അന്ന് ഈ സംഭവത്തിന്റെ മുഖം. ഇവരെ കാണുമ്പോള്‍ നമുക്ക് ചിരി അല്ലാതെ ഒരു നിമിഷം പോലും ഒരു ഗൌരവം തോന്നില്ല .ഈ പടത്തിന്റെ കഥയെ സില്ലി ആക്കി തീര്‍കുനതില്‍ ഈ രണ്ടു കഥാ പാത്രങ്ങളും വലിയ പങ്കു വഹിക്കുണുണ്ട് . തിരക്കഥ എഴുതിയവന് പത്തില്‍ പത്തു മാര്‍ക്ക്

ഡാ നീ വീണ്ടും തുടങ്ങിയോ .. കാര്യം പറയെടെ . എന്നിട്ട് ?

പിന്നെ കാര്യങ്ങള്‍ , ചാണ്ടിക്ക് സ്ഥലം വേണം ലാലേട്ടന്‍ കൊടുക്കില്ല . ലാലിന്റെ ഫാം വേണം. ലാലേട്ടന്‍ കൊടിക്കില്ല . പണം, സ്വാധീനം, ഭീഷണി, കള്ളക്കേസ് തുടങ്ങി പല നമ്പരുകളിലൂടെ ചാണ്ടി ലാലിനെ പീഡിപ്പിക്കുന്നു. മാത്രമ്മല്‍ ആ ഫാം കൂടി കൊടുത്താല്‍ ആ നാട്ടില്‍ അങ്ങേര ഒരു മുട്ടന്‍ ടൌണ്‍ ഷിപ്പ് കൊണ്ട് വരുമെന്ന് നാട്ടുകാരെ പറഞ്ഞു വിശ്വസിപ്പിക്കുകയും ചെയ്യുന്നു. അതോടെ അതിന്റെ തലേ ദിവസം വരെ ലാലിന്റെ കഥാപാത്രത്തിന് രൂപകൂട് കെട്ടാന്‍ പിരിവെടുത്തു നടന്നിരുന്ന നാട്ടുകാര്‍, വികസന വിരോധിയായ ലാലിന് എതിരാകുന്നു. ഫയങ്കരമായി അവര്‍ പുള്ളിയെയും കുടുമ്പത്തെയും ഒറ്റപ്പെടുത്തുന്നു.(ഒറ്റപെടുന്നവന്റെ ദുഃഖം കാണിക്കുന്ന ഒരു പാട്ട് ഇവിടെ ഇടാമായിരുന്നു).

ചാപക്ഷെ ലാലേട്ടന്റെ കഥാപാത്രം ഇപ്പോഴും ബുദ്ധിമാനായിരിക്കുമല്ലോ. അതൊകൊണ്ട് മാത്രം ആലുവാ ചാണ്ടി എന്നാ ഭീകര വില്ലന്റെ (ഓര്‍ത്തിട്ടു ഇപ്പോഴും ചിരി അടക്കാന്‍ വയ്യ അണ്ണാ, അത്രയ്ക്ക് ഭയങ്കര വില്ലനാ പുള്ളി) ഒരു നമ്പരും ലെട്ടനോട് ചിലവാകുന്നില്ല. പിന്നെ അത്രയൊക്കെ ബുദ്ധിയും, ശക്തിയും ഉണ്ടെങ്കിലും ലാലേട്ടന്‍ ഒരു സാധാരണക്കാരന്‍ തന്നെയാണ് എന്ന് കാണിക്കാന്‍ ഇടയ്ക്കിടെ "ഞാന്‍ വിയര്‍പ്പൊഴുക്കിയ മണ്ണ് തരില്ല ചാണ്ടി " അങ്ങനെ ഏതാണ്ടൊക്കെ വികാര ഭരിതമായ ഡയലോഗുകള്‍ അടിക്കുന്നുണ്ട്.

ഇതിനിടയില്‍ ലക്ഷ്മി റായ് അവതരിപ്പിക്കുന്ന ദേഷ്യം, നിര്‍വികാരത എന്നീ ഭാവങ്ങള്‍ മാത്രം കാണിക്കുന്ന വക്കീല്‍ കഥാപാത്രവും ഉണ്ട് .

ഒടുവില്‍ ലാലേട്ടന്‍ കോടതിയില്‍ നിന്നും ഒരു അമരീഷ്പുരിയെ (വേറെ എന്തോ ആണ് അതിനു പറയുന്നേ.ഓര്‍മ്മ വരുന്നില്ല ) ഇറക്കുന്നു.ശ്രീനിവാസന്‍ അവതരിപ്പിക്കുന്ന ഈ അമരീഷ്പുരി ലാല്‍ ഏട്ടന്റെ ബന്ധു ആയി അഭിനയിച്ചു എല്ലാം കണ്ടു മനസിലാക്കുന്നു. അതിനു വേണ്ടി മാത്രം സ്ഥലം വില്കാന്‍ റെഡി ആണെന്ന് ചാണ്ടിയോട് പറയുന്നു ബുദ്ധിമാനായ ലാലേട്ടന്‍.(ലാലേട്ടനോടാ കളി ?)

എടേ ചിലപ്പോള്‍ ഈ അമീഷ്പുരി എന്ന് നീ പറയുന്ന ഈ സാധനം ശരിക്കും ഉള്ളതായി കൂടെ ?

ദൈവത്തിനറിയാം .ഈ അമീഷ്പുരിയെ കുറിച്ച് അകെ പറയുന്നത് അദേഹം കണ്ടാല്‍ കോടതി കണ്ടത് പോലെയാണ് എന്നാണ് . ശരി ഇനി അങ്ങനെ ആണെങ്ങില്‍ ഈ രാജ്യത്തു വര്‍ഷങ്ങളായി തെളിയാതെ കിടക്കുന്ന അഭയ കേസ് മുതല്‍ ഏതൊന്നും ഇങ്ങനെ ഓരോ അമീഷ്പുരിയെ ഇറക്കി തെളിച്ചു കുടായിരുന്നോ എന്ന് പടം കാണുന്ന പാവങ്ങള്‍ക്ക് തോന്നിയാലോ ? ശരി അതെന്തോ ആകട്ടെ അവസാനം വില്ലന്മാരെ ചുമ്മാ ഒരു രസത്തിനു ടെന്‍ഷന്‍ അടിപ്പിക്കാന്‍ വേണ്ടി ലാലേട്ടന്‍ പ്രത്യേകം റെഡി ആക്കിയ പിരി മുറുക്കം ഏറിയ (കണ്ടു കൊണ്ടിരിക്കുന്ന അവന്മാരുടെ പിരി !) ഒരു ക്ലൈമാക്ക്സോടെ ചാണ്ടി ഉള്‍പ്പെടെ ഉള്ള സകല വില്ലന്മാരെയും ലാലേട്ടനും അമീഷ്പുരിയും ചേര്‍ന്ന് അകത്താക്കുന്നു. വിജയശ്രീ ലളിതനായി പുറത്തു വരുന്ന ലാലേട്ടന്‍ കാണുന്നത് ചാനല്‍കാരിയും,വക്കീലും,പിന്നെ ബാങ്ക് മാനേജരും( നമ്മുടെ ഐ ടി എക്സ് സി ഇ ഓ )യും ലാലേട്ടന്റെ ബുദ്ധി ശക്തിയും,സൌന്ദര്യവും കണ്ടു മയങ്ങി എന്നെ ഒന്ന് പ്രേമിച്ചു തരണേ എന്ന അപേക്ഷയുമായി നില്‍ക്കുന്നതാണ് .വി ഐ പി വേണോ , ജോക്കി വേണോ അതോ ലോക്കല്‍ ടാന്‍റ്റെക്ക്സ്സ് മതിയോ എന്ന് അണ്ടര്‍വെയര്‍ തിരഞ്ഞെടുക്കുന്നത് പോലെ പോലെ ലാലേട്ടന്‍ ഏറ്റവും ബെസ്റ്റ് നോക്കി തിരഞ്ഞെടുക്കുന്നു .ശുഭം. ഇവിടെ മൂന്ന് സുന്ദരികളും ചേര്‍ന്നോ ഒറ്റക്കൊറ്റയ്ക്കോ ഒരു മാദക നൃത്തം കുടി ആകാമായിരുന്നു .ഒരു തെലുങ്ക് പടം വശീകരണ ലൈന്‍. അണ്ണന്‍ നോക്കണ്ട. റോഷന്‍ ആണ്ട്രൂസിനും ലാലേട്ടനും മാത്രമല്ല എനിക്കുമില്ലേ ആഗ്രഹങ്ങള്

നീ അത് കള . അപ്പൊ ചുരുക്കത്തില്‍ ?

ലാലേട്ടന്‍ കുറച്ചു കാലമായി സ്ഥിരമായി ചെയ്യുന്ന കാര്യം (വന്നു ഡയലോഗ് പറഞ്ഞിട്ട് പോകുന്ന പരിപാടി ) ഇവിടെയും തുടരുന്നു.ബാക്കി കഥാ പത്രങ്ങളില്‍ ജഗതി ഒഴികെ ആരും ബോര്‍ അടിപ്പിക്കാതെ വിടുന്നില്ല .ജഗതി പതിവ് പോലെ തന്റെ വേഷം ഭംഗിയാക്കി .സംവിധായകന്‍,തിരകഥകൃത് എന്നിവര്‍ റിയല്‍ എസ്റ്റേറ്റ്‌ രംഗത്തെ തട്ടിപ്പ് പരിപാടികളെ കുറിച്ച് പറയാന്‍ ശ്രമിക്കുന്നു എങ്കിലും ആകെ ഒരു തമാശ മൂഡ്‌ ആയതിന്നാല്‍ അതൊന്നും പ്രേക്ഷകരിലേക്ക് എത്തുന്നില്ല.

പിന്നെ ബാക്കി നടി നടന്മാരോ ?

പഴയ നായകന്‍ ശങ്കറിനെ ഒരു സുഹൃത്തിന്റെ റോളില്‍ കാസ്റ്റ് ചെയ്തിടുണ്ട് . ശങ്കറിന് പകരം ആ റോള്‍ മധു മോഹന്‍ (പഴയ സീരിയല്‍ താരം)അഭിനയിച്ചാലും ഒരു മാറ്റവും വരാന്‍ പോകുന്നില്ല. തിലകനെ പോലെയുള്ള നടന്‍മാര്‍ ഈമാതിരി റോള്‍ചെയ്യുന്നത് കാണുമ്പോള്‍ കഷ്ടവും സഹതാപവും തോന്നും .മറ്റു പല കഥാ പത്രങ്ങളെയും പോലെ സുകുമാരിയുടെയും റോള്‍ വെറുതെ. ചുമ്മാ.

എന്റെ കണ്ട്രോള്‍ പോകുന്നു . ഇനി താന്‍ എന്തൊക്കെ പറഞ്ഞാലും എനിക്ക് കുറച്ചു മാര്‍ക്ക്‌ ഇട്ടേ പറ്റു.

1) ഗൌരവം ഉള്ള ഒരു വിഷയം അത് അര്‍ഹിക്കുന്ന ഗൌരവത്തോടെ എടുത്തതിനു പത്തില്‍ എട്ടു മാര്‍ക്ക്

2) ആവശ്യത്തിനു മാത്രം ഉള്ള കഥാപാത്രങ്ങളെ ഉള്‍പ്പെടുത്തി ചിത്രീകരിച്ചതിന് പത്തില്‍ ഒന്‍പതു മാര്‍ക്ക്‌ .

3) തികച്ചും യുക്തി ഭദ്രമായ തിരകഥ (അത് പിന്നെ ജെയിംസ്‌ സര്‍ എഴുതുമ്പോള്‍ മോശമാകുമോ ?) മാര്‍ക്ക്‌ പത്തില്‍ ഒന്‍പതു

4) അഭിനയം (അത് ചോദിക്കാനുണ്ടോ ) കിടക്കട്ടെ പത്തില്‍ ഒന്‍പതര .ലാലേട്ടന് മാത്രം പത്തില്‍ പതിനൊന്ന്

5) ഇതൊരു മികച്ച ചിത്രം ആണെന്ന് മാധ്യമങ്ങളെ കൊണ്ട് കൊട്ടി പാടിച്ചതിനു പത്തില്‍ പത്തു മാര്‍ക്ക്‌ . ഇനി ഏതെങ്കിലും ഒരു ദിവ്യന്‍ ഈ പടം അടുത്ത കാസാബ്ലാങ്ക ആണെനു കുടി പറഞ്ഞാല്‍ തികഞ്ഞു (

എങ്ങനെയുണ്ട് അണ്ണാ?

പൊന്ന്‌ അനിയ , നിന്റെ വിഷമം എന്നിക്ക് മനസിലാകും എനിക്ക് ഒന്നേ പറയാന്‍ ഉള്ളു. ഈ വര്ഷം മികച്ച സംവിധായകനുള്ള സംസ്ഥാന അവാര്‍ഡ്‌ റോഷന്‍ സാറിനോ , തിരകഥക്കുള്ള അവാര്‍ഡ്‌ ജെയിംസ്‌ സാറിനോ സഹനടനുള്ള അവാര്‍ഡ്‌ അലക്ക്സിനോ കിട്ടിയാല്‍ നീ കടുംകൈ ഒന്നും ചെയ്തു കളയല്ലേ.

Monday, January 25, 2010

മലയാള സിനിമയും ഞാനും പിന്നെ ഗതികേടും (സൂപ്പര്‍ താരങ്ങള്‍ സിന്ദാബാദ് )

അണ്ണന്‍ എന്താ രണ്ടു ദിവസം ആയി ആകാശത്തേക്ക് നോക്കി ഒടുക്കത്തെ ധ്യാനം ആണല്ലോ .എന്ത് പറ്റി?

ഓ.. എന്തരു പറയനെടെ മലയാള സിനിമ 2009 ഇല്‍ എന്നൊരു സാധനം എഴുതാന്‍ ഇരുന്നിട്ട് ദിവസം രണ്ടായി .ഒരക്ഷരം എഴുതാന്‍ പറ്റണ്ടേ .

മം.... അതിനെന്താ ഇത്ര താമസം? ഇപ്പോഴേ സംഗതി പഴഞ്ചനായി. ഡിസംബര്‍ മുതല്‍ കണ്ട പത്രത്തിലും ബൂലോകത്തും ഒക്കെ ചൂടപ്പം പോലെ അല്ലെ സാധനം വരുന്നേ .

എടെ ഞാന്‍ ഈ ചവറൊക്കെ വായന നിര്‍ത്തിയിട്ടു കാലം കുറച്ചായി. എന്നാലും ഇവനൊക്കെ എങ്ങനെയെടെ ഇതൊക്കെ പുല്ലു പോലെ എഴുതുന്നത്‌ ?

ഛീ താനൊക്കെ എഴുത്തുകാരന്‍ എന്ന് പറഞ്ഞു നടന്നോ ഇതൊക്കെ എന്നോട് പറഞ്ഞത് പറഞ്ഞു. വേറെ ആരെങ്കിലും അറിഞ്ഞാല്‍ വെറും അയ്യം അല്ലെ അണ്ണാ?

എടാ ഇതു റയിട്ടേര്‍സ് ബ്ലോക്ക്‌ എന്ന് പറയുന്ന ഒരുതരം സാധനം ആകുന്നു.നിന്നെ പോലെയുള്ള നികൃഷ്ട ജീവികള്‍ക്ക് മനസിലാകില്ല . ശരി അതിരിക്കട്ടെ നീ ഒന്ന് തുടങ്ങിതാ ബാക്കി ഞാന്‍ തകര്‍ക്കാം.

ശരി എന്നാ പിടിച്ചോ ആദ്യം തലകെട്ട്. മലയാള സിനിമ തളിര്‍ക്കുന്നു/ പൂക്കുന്നു/കായിക്കുന്നു (ഏതെങ്കിലും ഒന്ന് ). എന്താ ?

എടെ ഇതൊരുമാതിരി പൈങ്കിളി ലൈന്‍ ..... എന്തോന്നടെ ?

ഓ ഇയാള് ബുദ്ധി ജീവി ആണല്ലോ . എന്നാല്‍ ഇതു പിടി . സൂപ്പര്‍ താരങ്ങളുടെ സര്‍വ്വാധിപത്യം . എപ്പിടി ?

എടാ മനുഷ്യന്‍ ആയാല്‍ മനസാക്ഷി എന്നൊന്ന് വേണം സൂപ്പര്‍ താരങ്ങള്‍ അഭിനയിച്ചു മാന്യമായി അമ്പതു ദിവസം തികച്ച ഒരു മൂന്ന് പടം പറഞ്ഞെ .

അണ്ണന്‍ അങ്ങനെ അറുത്തു മുറിച്ചു പറയല്ലേ നമ്മുടെ പഴശിരാജ അല്ലെ ഈ വര്‍ഷത്തെ സൂപ്പര്‍ ഹിറ്റ്‌ ചിത്രം. അത് സൂപ്പര്‍ താരങ്ങളുടെ വിജയം അല്ലെ . (ആണെന്നാണ് ബൂലോകത്തെ വലിയ അണ്ണന്‍ മാരൊക്കെ പറയുന്നേ )

എടാ ചെറുക്കാ ഈ പഴശിരാജ എന്നത് ഇരുപത്തി ഒന്‍പതു കോടി മുടക്കി എടുത്ത സാധനം അന്നെനാണ് ഈ പറയുന്ന മാധ്യമങ്ങളും മറ്റു കീ ജെയ്‌ വിളിക്കാരും എഴുതിയത് .കേരളത്തില്‍ എത്ര കിടന്നോടിയാലും ഈ കാശു കിട്ടില്ല എന്നറിയാന്‍ സാമാന്യ ബുദ്ധി മതി .തമിള്‍ നാട്ടിലും മറ്റും ഈ പടം കളക്ഷന്‍ റെക്കോര്‍ഡ്‌ തകര്‍ത്തതായി ഒരിടെത്തും കണ്ടില്ല.അപ്പോള്‍ പിന്നെ മുടക്കിയ കാശു പോലും കിട്ടാത്ത പടം എങ്ങനാടാ സൂപ്പര്‍ ഹിറ്റ്‌ ആകുന്നെ?.അത് കൊണ്ട് നീ അതിന്തെ കാര്യം പറഞ്ഞു കുര്രക്കാന്‍ വരണ്ട . അതിനു ഇഷ്ടം പോലെ ആള്‍ക്കാര്‍ വേറെ യുണ്ട് . പിന്നെ തിരുവനന്തപുരത്ത് 75 ദിവസം കഴിഞ്ഞപ്പോള്‍ പടം നൂണ്‍ ഷോ ആയി മാറി. ഇതാണോ ഹിറ്റ്‌ ?

ഹാ അണ്ണന്‍ കേറി പിണങ്ങാതെ, ഇതൊക്കെ ആലോചിക്കാനുള്ള ബോധം ഇവിടുത്തെ ജനങ്ങള്‍ എന്ന പന്നകള്‍ക്ക് ഉണ്ടായിരുന്നെങ്കില്‍ ഈ നാട് എന്നേ നന്നായി പോയേനെ .നമ്മളൊക്കെ എഴുതുന്നത്‌ തൊണ്ട തൊടാതെ വിഴുങ്ങി അതിന്‍റെ പേരില്‍ വാഗ്വാദവും വിവാദവും ഉണ്ടാക്കാനല്ലാതെ ഇവനെയൊക്കെ എന്തിന്നു കൊള്ളാം? അത് വിട് . പിന്നെ പലേരി മാണിക്യം, അത് അഭിനയ മികവിന്‍റെ മാത്രമല്ല സംവിധാന പ്രതിഭ യുടെയും കുടെയുള്ള മിശ്രിതം ആണെന്നാണല്ലോ പറയുന്നേ ?

എടാ ആ പടത്തെ കുറിച്ചുള്ള അഭിപ്രായം തല്‍കാലം പറയുന്നില്ല. ഈ പടം ഒരു സംഭവം ആണെന്ന് പാടി നടന്നവന്മാരോട് ഒരേ ഒരു ചോദ്യം . ഈ സാധനം ഇരുപതാം ദിവസം മുതല്‍ തിരുവനതപുരത്ത് കഷ്ടിച്ചു അമ്പതു പേര്‍ കൊള്ളുന്ന ഒരു പെട്ടി തിയേറ്റര്‍ ഇല്‍ലാണ് ഓടുന്നത് . മറ്റു സ്ഥലങ്ങളിലെ കാര്യം എനിക്ക് അറിയില്ല . എങ്കിലും ചോദിക്കട്ടെ ഇത്ര മഹത്തായ സംഭവം ആര്‍ക്കും വേണ്ടേ ?

അത് പിന്നെ കലാമൂല്യം ഉള്ള പടം ആകുമ്പോള്‍ സാധാരണ ജനങ്ങള്‍ക്ക്‌...

അപ്പോള്‍ നീ പറയുന്നത് അത് മാസ്സിനെ ഉദേശിച്ചു എടുത്തതല്ല ക്ലാസ്സിനെ ഉദേശിച്ചു ഉള്ളതാനെനല്ലേ . എടാ ഇതല്ലേ നീയൊക്കെ ആര്‍ട്ട്‌ സിനിമാക്കാര്‍ എന്ന് മുദ്ര കുത്തിയവര്‍ സ്ഥിരമായി പറഞ്ഞു കൊണ്ടിരുന്നത്. അപ്പോള്‍ നിനക്കൊക്കെ അവരെ പുച്ഛം . ഇപ്പോള്‍ ഇവന്റെ ഒക്കെ കലമുല്യം ജനം വരിക്കു നിന്ന് കണ്ടു കൊള്ളണം. നല്ല ബെസ്റ്റ് ന്യായം .

എന്തൊക്കെയായാലും അവസാനം ഇറങ്ങിയ ചട്ടമ്പിനാട് ഒരു ഷുവര്‍ ഹിറ്റ്‌ ആണെന്ന് പലരും പറയുനുണ്ടല്ലോ?

രാജമാണിക്യം, പ്രജാപതിയുടെ കുപ്പിയില്‍ ഒഴിച്ച ആ കഷായം ഇന്നു കുടിച്ചതെ യുള്ളൂ .പൊന്നു മോനെ മോനെ വ്യത്യസ്തം എന്നു പറഞ്ഞാല്‍ ഒന്ന് ഒന്നര വ്യത്യസ്തം.രാജമാണിക്യത്തില്‍ നിറമുള്ള വസ്ത്രങ്ങള്‍ ഇട്ടിരുന്ന മമൂട്ടി ഇതില്‍ തൂവെള്ളയാണ് ധരിക്കുനത്‌ . കന്നഡ ഇട്ടു കലക്കിയ മലയാളം അന്ന് പറയുന്നത് .പിന്നെ ആദ്യം കാണിക്കുന്നത് തല മൂടി ആവി പിടിക്കുനതാണ് . പ്ലീസ് ഇതില്‍ കുടുതല്‍ വ്യത്യസ്തം ചോദിക്കല്ലേ . പിന്നെ ആ പടത്തിന് ചട്ടമ്പിനാട് എന്നാ പേര് തന്നെ എന്തിനാണെന്ന് അത്ര ആലോചിട്ടും മനസിലാകുന്നില്ല . അകെക്കുടി അതില്‍ ചട്ടമ്പിത്തരം കാണിക്കുന്നത് അതിലെ ആസ്ഥാന വില്ലനായ സിദ്ദിക്ക് മാത്രമാണ് .(അത് പിന്നെ സൂപ്പര്‍താര ചിത്രങ്ങള്‍ ആകുമ്പോള്‍ ഒരു വില്ലന്‍ എങ്കിലും വേണ്ടേ !) സൂപ്പര്‍ താരം വലിയ ചട്ടമ്പി ആണെന്ന് പറയുന്നെങ്ങിലും സിദ്ദിക്കിനെ വിരട്ടുക എന്ന പതിവ് കലാപരിപാടിക്ക് അപ്പുറം ഒന്നും ചെയുന്നില്ല . പിന്നെ കുറെ കാലമായി മലയാള സിനിമ നായികമാര്‍ക്ക് പ്രേമിക്കല്ലാതെ വേറെ ഒരു ജോലിയും ഇല്ലലോ. തികച്ചും പുതുമക്ക് വേണ്ടി രണ്ടു നായികമാരും സൂപ്പര്‍ സ്റ്റാര്‍നെ പ്രേമിക്കാതെ ഒരാളെ കൊണ്ട് ശിങ്കിടി വിനു മോഹനെ പ്രേമിപ്പിക്കുന്നുണ്ട് . പിന്നെ കന്നഡ,മലയാളിക്ക് പൊതുവെ കന്നഡ മനസിലാവില്ലെങ്കിലും മമ്മൂട്ടി വായ തുറന്നാല്‍ എന്താണ് പറയാന്‍ പോകുനത് എന്ന് കൃത്യമായി മനസിലാക്കാന്‍ തിരകഥയുടെ പുതുമ സഹായിക്കുന്നത് കൊണ്ട് ആ പ്രശ്നവും ഇല്ല. ഇതിനെക്കാളും എത്ര ഭേദം ആയിരുന്നു ഷാഫി ചെയ്ത ലോലിപോപ്പ് . ഹോ ആ പടം ഇറങ്ങിയപ്പോള്‍ ഉണ്ടായ പുകില്ലേ . സ്ഥിരം കഥ , പുതുമയില്ല അങ്ങനെ എന്തൊക്കെ ..
പിന്നെ ഈ വര്ഷം ആദ്യപകുതിയില്‍ ആ മഹാ ദേഹം അഭിനയിച്ചു തകര്‍ത്ത സിങ്കപൂര്‍ , ഭൂതം , ഡാഡി തുടങ്ങിയ ക്ലാസിക്സ് അന്നോടെ നീ ഉദേശിച്ചത്‌ ?

ശരി ശരി അത് വിട് . ഇപ്പോള്‍ എല്ലാം മനസിലായി അണ്ണന്‍ മറ്റേ സുപ്പറിന്റെ ആരാധകന്‍ അന്നല്ലേ .ചുമ്മാതെ അല്ല ഇങ്ങേരെ എങ്ങനെ തെറി പറയുന്നേ .

പൊന്നനിയ അങ്ങേരോട് എനിക്ക് സഹതാപം മാത്രമേയുള്ളൂ . ഈ വര്ഷം അദേഹം അഭിനയിച്ച ഇവിടം സ്വര്‍ഗം ആണ് ഒഴിച്ച് എല്ലാം കണ്ട നിര്ഭാഗ്യവനാ ഞാന്‍ ഭഗവാന്‍ (ഭാഗവന്നേ!!!!) ,എയ്ഞ്ചല്‍ ജോണ്‍ , ചില്ലീസ് , ജാക്കി, പിന്നെ കൊട്ടും കുഴലും ആയി നിരക്കി അമ്പതു അറുപതു ദിവസം ഓടിച്ച ഭ്രമരം

അതൊന്നും ദയവായി ഓര്‍മിപ്പിക്കല്ലേ അണ്ണാ. ശരി അപ്പോള്‍ പിന്നെ ...

എടെ സ്വന്തം ചുമലില്‍ ഒരു പടം വിജയിപ്പിച്ച ഒരൊറ്റ നടനെ ഈ വര്ഷം ഉണ്ടായുള്ളൂ . പ്രിത്വിരാജ്‌ എന്ന നടനും പുതിയ മുഖം എന്ന പടവും . ഇതു വിളിച്ചു പറയാന്‍ ഈ തൂലിക കൊണ്ട് ക്ഷൌരം ചെയുന്ന ആര്‍ക്കു പറ്റും ഈ നാട്ടില്‍ ? പിന്നെ റോബിന്‍ ഹൂഡ്‌ എന്ന പടം നിലവാരത്തിലും ഓടിയതിലും സൂപ്പര്‍ താരങ്ങളുടെ മിക്ക പടങ്ങളിലും ഭേദം ആയിരുന്നു . പക്ഷെ ആരു സമ്മതിക്കും അനിയാ ഇതൊക്കെ ? ഒരു തരത്തിലും അവഗണിക്കാന്‍ പറ്റാതെ വന്നാലല്ലേ ഇവനൊക്കെ സമ്മതിക്കൂ .

എന്നാലും സൂപ്പര്‍ താരങ്ങളുടെ മുകളില്‍ പ്രിത്വിരാജ്‌ എന്നൊക്കെ പറഞ്ഞാല്‍ ..........

പറഞ്ഞാല്‍ എന്താടെ ?മുടക്കിയ കാശും കിട്ടിയ കാശും തമ്മിലുള്ള വ്യത്യാസം ആണ് ഹിറ്റ്‌ഇന് മാനദണ്ഡം എങ്കില്‍ സത്യം അതാണ് . എടെ ഇതു ഇന്നും ഇന്നലെയും ഒന്നും തുടങ്ങിയതല്ല . ഭരത്ചന്ദ്രന്‍ IPS എന്ന സുരേഷ്ഗോപി ചിത്രവും വെറുതെ ഒരു ഭാര്യ എന്ന ജയറാം ചിത്രവും പുറത്തു വന്ന വര്‍ഷങ്ങളില്‍ ഏറ്റവും വലിയ ഹിറ്റ്‌ (മുകളില്‍ പറഞ്ഞ മാനദണ്ഡം അനുസരിച്ച് ) ആ പടങ്ങള്‍ ആണെന്ന് ആരെങ്കിലും എഴുതിയോ ?പിന്നെ മലയാളിക്ക് എന്തെങ്ങിലും അഭിമാനിക്കാന്‍ ഉണ്ടെങ്കില്‍ ഈ വര്ഷം മേല്‍പറഞ്ഞത്‌ കുടാതെ പസ്സെങ്ങേര്‍, ഇവര്‍ വിവാഹിതര്‍ ആയാല്‍ എന്ന പടങ്ങള്‍ ജന ശ്രദ്ധ നേടി എന്നതിലാണ് .

അപ്പോള്‍ ടു ഹരിഹര്‍ നഗര്‍ ?

അത് കാര്യം പറഞ്ഞാല്‍ ലോജിക് എന്നൊരു സാധനം ഇല്ലെങ്കിലും സൂപ്പര്‍ താരങ്ങളുടെ പടം കണ്ടു പ്രാന്തായ ജനം കണ്ടു വിജയിപ്പിച്ച പടം അന്നെന്നാണ് എനിക്ക് തോന്നിയത് . ആ ഒരു നന്ദി ലാലിന് സൂപ്പര്‍ താരങ്ങളോട് ഉണ്ടെങ്കില്‍ കൊള്ളാം. പിന്നെ അറിയുന്ന പണി ചെയ്യാന്‍ തീരുമാനിച്ച സത്യന്‍അന്തികാടിന്റെ പടവും ഭേദം ആയിരുന്നു .

ശരി അപ്പോള്‍ മറ്റു താരങ്ങളോ

എടെ മലയാളത്തില്‍ രണ്ടു മൂത്ത താരങ്ങള്‍ ഒഴിച്ചു വേറെ ഒരുത്തനും ചൂസി ആക്കാന്‍ പറ്റും എന്നു എനിക്ക് തോന്നുന്നില്ല (ആയാല്‍ പണി ഇല്ലാതെ വീട്ടില്‍ ഇരിക്കും അത്ര തന്നെ ) .കിട്ടുന്നത് അഭിനയിക്കുക .രക്ഷപെടാന്‍ പ്രാര്‍ത്ഥിക്കുക എന്നതിനപ്പുറം ഒന്നും അവരെ കൊണ്ട് നടക്കില്ല . ഈ വര്ഷം ആ ഭാഗത്ത്‌ നിന്നും പ്രത്യേകിച്ച് ഒന്നും ഉണ്ടായില്ല.

അപ്പോള്‍ സൂപ്പര്‍ താരങ്ങള്‍ നന്നായാലേ മലയാള സിനിമ നന്നാക്കു അല്ലെ ?

പാവങ്ങള്‍ അവര്‍ എന്ത് പിഴച്ചു ? മറ്റു ആര്‍ക്കും ഉള്ളത് പോലെ അവനവന്റെ പദവിയും സ്ഥാനവും എന്നും നില നിര്‍ത്തണം എന്ന് ആഗ്രഹിക്കുനത് തെറ്റാണോ .ഇവരുടെ ഒക്കെ വര്‍ഷങ്ങള്‍ക്കു മുന്‍പ് വന്ന നല്ല പടങ്ങള്‍ കണ്ടു ഇനിയും അത് പോലെ ഒന്ന് പ്രതീക്ഷിച്ചു തള്ളുന്ന ജനം അല്ലെ കുറ്റക്കാര്‍ ? (എപ്പോള്‍ ആ വിഭാഗം വളരെ കുറവാണു. ആകെ കുറെ ഫാന്‍സ്‌ ഉം പിന്നെ മീഡിയ കുഴല്‍ ഊത്തുകാരും ആണ് ഉള്ളത് ).ഇത്രയും കിട്ടിയിട്ടും പഠിക്കാതെ പിന്നെയും മാധ്യമ കുഴല്‍ ഊത്ത് കേട്ട് ഇതിനൊക്കെ പിന്നെയും തള്ളുന്ന പൊതുജനം എന്ന കഴുതയെ പറഞ്ഞാല്‍ പോരെടെ. ഒരു രാഷ്ട്രീയകരെനെയോ സാധാരണകാരനെയോ കൈയില്‍ കിട്ടിയാല്‍ എടുത്തു ഉടുക്കുന്ന ചാനലുകള്‍ പോലും സൂപ്പര്‍ താരങ്ങള്‍ വരുമ്പോള്‍ പഞ്ചപുച്ഛം അടക്കി മലയാള സിനിമയുടെ ദാരിദ്യത്തെ കുറിച്ചും അന്യഭാഷാ ചിത്രങ്ങളുടെ കടന്നാക്രമണത്തെ കുറിച്ചും അല്ലെ ചോദിക്കുന്നത്. അല്ലാതെ നിങ്ങളുടെ എത്ര പടം ഈ വര്ഷം പൊട്ടി ഏന്നും എന്ത് കൊണ്ട് എങ്ങനെ സംഭവിക്കുന്നു ഏന്നും ചോദിക്കതെന്താ ..?
( ഹോ എന്തൊരു വിനയം , എന്തൊരു മര്യാദ !!!)

അപ്പോള്‍ സുരുക്കമാ സോന്നാല്‍ .......

മലയാള സിനിമയുടെ നിലവാരം ഒരു പടി കൂടെ താഴ്ന്ന വര്ഷം ..അതിരിക്കട്ടെ നിന്നെ ഇന്നലെ കണ്ടില്ലലോ . എവിടെ ആയിരുന്നു ?

അണ്ണാ അത് പിന്നെ ... അവതാര്‍ കാണാന്‍ പോയതാ

ഡാ... സൂപ്പര്‍ താരങ്ങള്‍ അറിയണ്ട ഇതൊന്നും . അല്ലെങ്കിലെ അന്യഭാഷാ ചിത്രങ്ങള്‍ നിരോധിച്ചാലേ നാട് രക്ഷപെടു എന്നാണ് മഹാന്മാരുടെ അഭിപ്രായം . ഭാഗ്യത്തിന് ഇവരുടെ ഫാന്‍സ്‌ പോലും അന്യ ഭാഷ ചിത്രങ്ങള്‍ കാണുന്നവര്‍ ആയതു കൊണ്ട് രക്ഷപെട്ടു .വല്ലപ്പോഴും നമുക്ക് കൊള്ളാവുന്ന നാല് പടം കാണാന്‍ കിട്ടും