Showing posts with label malayalam movie review. Show all posts
Showing posts with label malayalam movie review. Show all posts

Sunday, September 16, 2012

മോളി ആന്‍റി റോക്സ് (Molly Aunty Rocks : Review )



നവ യുഗ സിനിമയുടെ അപ്പുപ്പനായ പാസ്സഞ്ചര്‍ (passenger ) സംവിധാനം ചെയ്ത ശ്രീ രഞ്ജിത് ശങ്കര്‍ ഒരുക്കുന്ന മോളി ആന്‍റി റോക്സ് എന്ന ചിത്രം ..........

അണ്ണാ. ഒന്ന് നിന്നേ..... നവയുഗ സിനിമയുടെ അപ്പുപ്പനോ? അതെന്തോന്നു ?

അനിയാ, മേല്‍പ്പറഞ്ഞ ചിത്രമാണ് നവയുഗ സിനിമയുടെ അപ്പുപ്പന്‍ എന്നും ട്രാഫിക്‌ അതിന്റെ അച്ഛനും ആണെന്നാണ് എന്‍റെ എളിയ വിശ്വാസം .പിന്നെ സന്തതികളും അവിഹിത സന്തതികളും ഒക്കെയായി ഒത്തിരി നമ്മുടെ മുന്നിലൂടെ വന്നു പോയത്.

വലിയ വാചകം ഒന്നും വേണ്ട നിങ്ങളുടെ പഠനം ഒക്കെ കയ്യില്‍ വെച്ചിട്ട് സിനിമയെ പറ്റി പറഞ്ഞെ .....

ശരി കഥ തിരകഥ സംവിധാനം എല്ലാം രഞ്ജിത് ശങ്കര്‍ തന്നെയാണ്.രേവതി,പൃഥ്വിരാജ്,ലക്ഷ്മിപ്രിയ,കൃഷ്ണകുമാര്‍,കെ പി എസ് സി ലളിത എന്നിവര്‍ അഭിനേതാക്കളുടെ നിരയില്‍ ഉണ്ട് .കേരളത്തില്‍ നിന്നും വര്‍ഷങ്ങള്‍ക്കു മുന്‍പ് സകുടുംബം അമേരിക്കയില്‍ പോയി അവിടെ ജീവിക്കുന്ന മോളിയും (രേവതി)ഭര്‍ത്താവു ബെന്നിയും (ലാലു അലക്സ്‌).ഒരു പ്രത്യേക സാഹചര്യത്തില്‍ തന്‍റെ വിരമിക്കല്‍ ആനുകൂല്യങ്ങള്‍ നഷ്ട്ടപെടതിരിക്കാന്‍ നാട്ടിലെത്തി പണ്ട് ജോലി ചെയ്ത ബാങ്കിന്‍റെ ഒരു ഗ്രാമപ്രദേശത്തുള്ള ശാഖയില്‍ ജോയിന്‍ ചെയ്യുകയാണ് മോളി.സ്വതന്ത്രമായി തീരുമാനങ്ങള്‍ എടുക്കാനും , ഇഷ്ടമുള്ളതൊക്കെ ചെയ്യാനും അങ്ങനെ കുറെ കാലം അമേരിക്കയില്‍ ജീവിച്ച ഒരു നവയുഗ എന്‍ ആര്‍ ഐ മാതാവാണ് മോളി ആന്റി എന്ന് പറയാം കുടുംബ സുഹൃത്തുക്കളായ രാജേഷ്‌ (കൃഷ്ണ കുമാര്‍) ഉഷ (ലക്ഷ്മി പ്രിയ) ദമ്പതികളാണ് മോളിയുടെ അയല്‍പക്കക്കാരും സഹായികളും. ബാങ്കിലെ എല്ലാവരുമായും മോളിക്ക് നല്ല ബന്ധമാണ്.ബന്ധുകള്‍ക്കിടയില്‍ മോളിയെ പറ്റി ചില്ലറ കുശുമ്പും മുറുമുറുപ്പും ഒക്കെ ഉണ്ടെങ്കിലും അതൊന്നും അവര്‍ കാര്യം ആക്കുന്നില്ല .കുടുംബ സ്വത്തു വില്‍പ്പനയും വിരമിക്കല്‍ പരിപാടിയും കഴിഞ്ഞു തിരിച്ചു അമേരിക്കയിലേക്ക് പോകാന്‍ തയ്യാര്‍ എടുക്കുമ്പോളാണ് ഇന്‍കം ടാക്സ് വകുപ്പില്‍ നിന്ന് അവര്‍ക്ക് മുപ്പതിനായിരം രൂപ അടയ്ക്കാന്‍ ഉള്ള നോട്ടീസ് കിട്ടുന്നത്.അതിന്‍റെ വിവരങ്ങള്‍ തിരക്കാനായി ഇന്‍ കം ടാക്സ്‌ ഓഫീസില്‍ എത്തുന്ന മോളിയോടു അവിടുത്തെ ഉദ്യോഗസ്ഥന്‍ അടയ്കേണ്ട തുകയുടെ പകുതി കൈകൂലി ചോദിക്കുന്നു.കുപിതയായ മോളി അയാള്‍ക്കെതിരെ പോലീസില്‍ പരാതിപ്പെടുന്നു.പിന്നെ മോളിക്ക് കിട്ടുന്നത് ഒന്‍പതു ലക്ഷം രൂപ നികുതി അടയ്ക്കാനുള്ള നോട്ടിസ് ആണ്.വീണ്ടും ഓഫീസില്‍ എത്തുന്ന മോളി ഇന്‍കം ടാക്സ് കമ്മിഷണര്‍ പ്രണവ് റോയ് (പ്രിത്വിരാജ്)മായി ഉടക്കുന്നു.കാര്യങ്ങള്‍ കൂടുതല്‍ വഷളാകുന്നതോടെ ബെന്നിയും നാട്ടിലെത്തുന്നു.കുടുംബം വഴിയും പള്ളി വഴിയും നോക്കിയിട്ടും മോളിയും പ്രണവും തമ്മിലുള്ള വഴക്ക് തീരാതെ ആകുമ്പോള്‍ ഒടുവില്‍ പ്രശ്നങ്ങള്‍ തീരാന്‍ അഡ്വ സലീമിനെ (മാമുക്കോയ) സമീപിക്കുന്ന തോടെ ബോയിംഗ് ബോയിങ്ങില്‍ ജഗതി പറയുന്നത് പോലെ കഥ മറ്റൊരു വഴിത്തിരിവിലേക്ക് .....

കേട്ടിട്ട് സംഗതി വലിയ കുഴപ്പം ഇല്ലല്ലോ അണ്ണാ .അപ്പ പടം കൊള്ളാം എന്ന് തന്നേ?

അനിയാ എനിക്ക് ഇനി സംസരിക്കാനുള്ളത് ശ്രീ രഞ്ജിത്ത് ശങ്കറിനോടാണ്.സുഹൃത്തേ താങ്കളുടെ ഈ ചിത്രത്തിന് പ്രധാനമായും രണ്ടു പോരായ്മകള്‍ ഉള്ളതായാണ് എനിക്ക് തോന്നുന്നത്.ആദ്യായി ചിത്രത്തിന്‍റെ ഒന്നാം പകുതി.മോളി മാമന്‍ എന്ന അമേരിക്കന്‍ ‍ റിട്ടേണ്‍ഡു വനിതയെയും അവരുടെ സ്വഭാവ വിശേഷങ്ങളെയും വരച്ചു കാണിക്കാന്‍ ഉപയോഗിക്കുന്നു. അതല്‍പ്പം നീണ്ടു പോയി എന്നത് ഇരിക്കട്ടെ.ശരിക്ക് ഉള്ള കഥ തുടങ്ങുന്നത് മോളി മാമ്മന് ഇന്‍കം ടാക്സ് വകുപ്പില്‍ നിന്ന് നോട്ടീസ് കിട്ടുന്നത് മുതല്‍ ആണല്ലോ.അത് മുതല്‍ തങ്ങള്‍ വളരെയധികം സമയം ചിലവാക്കി കെട്ടി പൊക്കിയ മോളി മാമന്‍ എന്നാ മധ്യ വയക്സ്കയായ ലോകം കണ്ടിട്ടുള്ള , തനിക്കെന്താണ് വേണ്ടത് എന്ന് തികഞ്ഞ പ്രായോഗിക ബുദ്ധിയോടെ ചിന്തിക്കുന്ന അതനുസരിച്ച് ജീവിക്കുന്ന സ്ത്രീയില്‍ നിന്നും അന്തവും കുന്തവും ഇല്ലാത്ത ഒരു ദുര്‍വാശിക്കാരി ആയി മാറുകയാണ് അവര്‍.പ്രത്യേകിച്ചു പ്രണവ് റോയിയുമായി ഉണ്ടാകുന്ന ആദ്യ കൂടി കാഴ്ച മുതല്‍. ഉദാഹരണമായി ആദ്യ നോട്ടീസ് കിട്ടുമ്പോള്‍ ഒരു നല്ല സി എ ക്കാരനെ സമീപിച്ചു ഇതിനു എന്ത് ചെയ്യാം എന്ന് ചോദിക്കുകയാണ് ആദ്യം ആരും ചെയ്യുന്നത് . കുടുംബ സുഹൃത്തുക്കള്‍ അത് മോളിയോടു പറയുന്നുമുണ്ട് . പക്ഷെ മോളി മാമ്മന് സംഗതി നേരിട്ടറിയണം.(അതും അമേരിക്കയില്‍ പോകാന്‍ വിമാനം കയറാന്‍ നില്‍ക്കുമ്പോള്‍ ) ശരി അറിഞ്ഞോട്ടെ,അവിടെ എത്തുമ്പോള്‍ ഉദ്യോഗസ്ഥന്‍ കൈകൂലി ചോദിക്കുന്നു.മോളി മാമന്‍ ഞെട്ടി തെറിക്കുന്നു.(എന്ത് ...? കൈക്കൂലിയോ ..... ഇവര്‍ ചുരുങ്ങിയത് ഒരു ഇരുപതു കൊല്ലം എങ്കിലും ഭാരതത്തില്‍ അല്ലെ ജീവിച്ചത്?) ശരി അത് തെറ്റാണു എന്ന് തോന്നുന്നു എങ്കില്‍ അവര്‍ ചെയ്യേണ്ടത് ആ ഉദ്യോഗസ്ഥന്‍റെ മേലധികാരിക്ക് പരാതി നല്‍കുക എന്നതാണ് അല്ലെങ്കില്‍ നോട്ടില്‍ മഷി പുരട്ടി പിടിക്കുന്ന വിജിലന്‍സിന്‍റെ സഹായം തേടുക എന്നതാണ്.അല്ലാതെ എന്നെ ഒരുത്തന്‍ ബസില്‍ വെച്ച് തോണ്ടി എന്ന മട്ടില്‍ പോലീസ് സ്റ്റേഷനില്‍ പോയി പരാതിപ്പെടുക എന്നാ മണ്ടത്തരം അടിസ്ഥാന വിദ്യാഭ്യാസം പോലും ഉള്ളവര്‍ ചെയ്യില്ല എന്ന് ഞാന്‍ കരുതുന്നു.ശരി അതും പോകട്ടെ.ഇതെല്ലാം പോകട്ടെ പിന്നീടു ഒന്‍പതു ലക്ഷം അടയ്ക്കാന്‍ പറയുന്ന നോട്ടിസുമായി വരുന്ന മോളി ആന്റി നികുതി വെട്ടിപ്പ് നടത്തി എന്നത് വ്യക്തമായി തെളിയിക്കപ്പെടുമ്പോള്‍ അവര്‍ വെറുതെ നിന്ന് കണാ കുണ ന്യായം പറയുകയാണ്.അവിടം മുതല്‍ അവസാനം വരെ യാതൊരു വ്യക്തിത്വവും ഇല്ലാത്ത ഒരു സ്ത്രീ ആയി മോളി ആന്റി എന്ന കേന്ദ്ര കഥാപാത്രം തുടരുന്നു.ഏറ്റവും കഷ്ട്ടം ഈ സിനിമയിലെ മറ്റെല്ലാ കഥാപാത്രങ്ങളും തികച്ചും സ്വാഭാവികമായാണ് പെരുമാറുന്നത്.മോളിയുടെ ഭര്‍ത്താവായ ബെന്നി പോലും പ്രണവ്മായി ആദ്യം സംസാരിക്കുന്ന രംഗം വിട്ടാല്‍ (ആ ടെന്നീസ് കോര്‍ട്ടിലെ രംഗം.സംഗതി പരമ ബോറായി പോയി) ഒഴിവാക്കിയാല്‍ ഒരു അനുസരണയുള്ള ഭര്‍ത്താവു എന്ന നിലയില്‍ തികച്ചും സ്വാഭാവികമായി ആണ് പെരുമാറുന്നത്.

അത് നില്‍ക്കട്ടെ.ഈ ചിത്രത്തില്‍ ചില അപ്രധാന കഥാപാത്രങ്ങള്‍ക്കും വിചിത്രമായ പേരുകള്‍ നല്‍കുന്നത് വഴി എന്താണ് ഉദേശിക്കുന്നത് (ഉദാഹരണം ഒരു സീനില്‍ വരുന്ന ഫ്ലെമിഗ് രാജ് എന്ന പയ്യന്‍ ) ? വിവാഹ മോചനം നേടിയ ഒരച്ചനെ കാണിക്കുന്നത് വഴി കാണികളെ ചിരിപ്പിക്കാന്‍ ആണോ അതോ വര്‍ധിച്ചു വരുന്ന വിവാഹ മോചനത്തെ കളിയാക്കനാണോ ഉദ്ദേശിച്ചേ ?

ഇനി ക്ലൈമാക്സ്‌.ശരിക്കും മോളിയെ ഒരു സ്മാര്‍ട്ട്‌ ആയ ഒരു മധ്യവര്‍ഗ കുടുംബനാഥ ആയി കാണിച്ചിട്ട് ബോധ പൂര്‍വ്വം നടത്തിയ നികുതി വെട്ടിപ്പ് പിടിക്കും എന്നും വേറെ വഴി ഇല്ല എന്നാകുമ്പോള്‍ ഒടുവില്‍ പണ്ട് എപ്പോളോ ആരോ ചെയ്ത (അല്ലെങ്കില്‍ പണ്ട് എന്നോ ചെയ്ത) ചാരിറ്റി സ്വന്തം പേരിലാക്കി മാധ്യമ പ്രചരണം വഴി ഒരു സെലിബ്രിറ്റി ആയി മാറുകയും.അതോടെ ലോക്കല്‍ ഇന്‍കം ടാക്സ് വകുപ്പിനു അവരെ തൊടാന്‍ പറ്റാതെ ആകുകയും അവസാനം ഇളിഭ്യരായി നില്‍ക്കുന്ന പ്രണവിനും കൂട്ടര്‍ക്കും മുന്നിലൂടെ കൂള്‍ ആയി അമേരിക്കയ്ക്ക് പോകുകയും ചെയ്യുന്ന അവസ്ഥയില്‍ ഒരു പക്ഷെ ടൈറ്റിലുകള്‍ എഴുതി കാണിക്കുമ്പോള്‍ പശ്ചാത്തലമായി കാണിച്ച കാര്‍ട്ടൂണുകള്‍ക്ക് ഒരു അര്‍ഥം ഉണ്ടാകുക മാത്രമല്ല സിനിമയുടെ പേരിനും ഒരു അര്‍ഥം ഉണ്ടാകുക എന്നതിനോടൊപ്പം ചിത്രം ഒരു മികച്ച ആക്ഷേപഹാസ്യ ചിത്രം എങ്കിലും ആയേനെ എന്നാണ് എന്‍റെ അഭിപ്രായം.ഇനി വേറൊരു രീതി അമേരിക്കയില്‍ നിന്ന് തിരിച്ചു വന്നു ബാങ്കില്‍ ചേരുന്ന മോളി,അവരുടെ വിടപറയല്‍ പ്രസംഗത്തില്‍ നടത്തുന്ന സാരോപദേശം പ്രവത്തിയിലൂടെ കാണിച്ചു കൊടുത്തു (കസ്റ്റമേഴ്സ് നോട് പെരുമാറുന്ന രീതി,ജോലിയോടുള്ള സമീപനം അങ്ങനെയുള്ള കാര്യങ്ങള്‍ ) മൊത്തത്തില്‍ നന്നാക്കുന്ന സാമ്പ്രദായിക രീതി സത്യന്‍ അന്തികാടിന്‍റെ ഗിരി പ്രഭാഷണം ആക്കാതെ എടുത്താല്‍ പോലും ഇതിലും നന്നായേനെ

നേരത്തെ പറഞ്ഞതിന് ഉദാഹരണമായി പെട്ടന്ന് തോന്നുന്നത് ആദ്യ നോട്ടീസ് കിട്ടുബോള്‍ കുടുംബ സുഹൃത്തിന്റെ പ്രതികരണം തികച്ചും സ്വാഭാവികമാണ് . വഴക്ക് കൂടുമ്പോള്‍ പ്രണവ് പറയുന്നത് നോക്കു,നിങ്ങളുടെ അമേരിക്കയില്‍ ഇത്തരം കുറ്റങ്ങള്‍ക്ക് കിട്ടുന്ന ശിക്ഷ ഇതിലും വളരെ വലുതാണ് (സത്യം,ബ്ലേഡ് എന്ന ഹിറ്റ്‌ സീരീസ്‌ ചിത്രങ്ങളിലെ നായകന്‍ പോലും ഈ കുറ്റത്തിനു ജയിലില്‍ ആണെന്ന് ശ്രീനി എപ്പോളോ പറഞ്ഞത് ഓര്‍ക്കുന്നു ),അമ്മായി അമ്മയുടെ പെരുമാറ്റം,കുടുംബത്തിലെ മറ്റു ബന്ധുക്കളുടെ സമീപനം,(ആകെ കല്ല്‌ കടിയായി തോന്നിയത് ഓഫീസില്‍ ഒരാള്‍ക്ക് പോലും ഇവരോട് ഒരു അസൂയ ഇല്ല എന്നിടത്താണ്) ഇങ്ങനെ നോക്കിയാല്‍ മോളി എന്ന കഥാപാത്രം ഒഴികെ ബാക്കി എല്ലാരും ഈ ഭൂമിയില്‍ തന്നെ ഉള്ളവര്‍ ആണെന്ന് പറയേണ്ടി വരും .(ഇതൊരിക്കലും രേവതി എന്ന നടിയെ പറ്റിയല്ല മറിച്ചു മോളി എന്ന കഥാപാത്രമാണ് ഇവിടെ വിഷയം)

ഒരു ചെറിയ തമാശ കൂടി പറഞ്ഞു നിര്‍ത്തട്ടെ പണ്ട് പണ്ട് മലയാളത്തിലെ ഇന്നുള്ള എല്ലാ കുഴപ്പത്തിനും കാരണക്കാരനായ ഷാജി കൈലാസ് എന്നൊരു മനുഷ്യന്‍ ഉണ്ടായിരുന്നു . അങ്ങേര്‍ സംവിധാനം ചെയ്ത ബാബാ കല്യാണി എന്ന ത്രില്ലെര്‍ ചിത്രത്തില്‍ ഒരു രംഗം.വക്കീലായ നായികയെ പോലീസ് ഉന്നത ഉദ്യോഗസ്ഥനായ നായകന്‍ കോടതി മുറ്റത്ത്‌ വെച്ച് പരസ്യമായി കാരണത്തടിക്കുന്നു. കോടതിയോ വനിതാ കമ്മിഷനോ ഏതാണ്ട് കേസ് എടുക്കുന്നു.വിചാരണ ചെയ്യപ്പെടുമ്പോള്‍ നായകന്‍ കൂളായി കുറ്റം സമ്മതിക്കുന്നു എന്നിട്ട് പറയുന്നു എനിക്ക് അതിനുള്ള അധികാരം ഉള്ളത് കൊണ്ടാണ് അടിച്ചതു കാരണം പണ്ട് ഞങ്ങള്‍ ലൈന്‍ ആയിരുന്നു (ഇപ്പോള്‍ അല്ല). ഇതു കേട്ടതും വിചാരണ ചെയ്യുന്നവര്‍ അയ്യോ സോറി ഞങ്ങള്‍ അറിഞ്ഞില്ല എന്ന് പറഞ്ഞു നിരുപാധികം മാപ്പ് പറഞ്ഞു ലാലേട്ടനെ വിട്ടയക്കുന്നു.ചുരുക്കമാ സോന്നാല്‍ ചെയ്ത കുറ്റകൃത്യവുമായി യാതൊരു ബന്ധവും ഇല്ലാത്ത വേറൊരു സംഭവത്തിന്റെ പേരില്‍ പ്രതിയെ വെറുതെ വിടുന്നു എന്നതാണ് മേല്പറഞ്ഞ സംഭവത്തില്‍ കാണുന്നത് . അങ്ങനെ തന്നെ അല്ലെ രഞ്ജിത് താങ്കളുടെ ഈ ചിത്രത്തിലും? ഇനി അവസാനം കോടതിയില്‍ മോളി നടത്തുന്ന പ്രഭാഷണം നോക്കു എന്ത് ബോറന്‍ ആണ് ആ രംഗം.ഈ നാട്ടില്‍ സ്വകാര്യമായി ചാരിറ്റി പ്രവര്‍ത്തനം നടത്താന്‍ എന്താ പ്രശ്നം? ഒന്നുമില്ല എന്നതല്ലേ സത്യം? അത് പോലെ ഈ നാട്ടില്‍ നികുതി കൊടുക്കുന്നവനു ഒരു തേങ്ങയും കിട്ടുന്നില്ല എന്നത് സത്യം.പക്ഷെ നികുതി വെട്ടിക്കുന്ന ഒരാള്‍ അത് പറയുമ്പോള്‍ അത് ഒരു നയീകരണത്തിന് അപ്പുറം ഒന്നുമാകുന്നില്ല.

അപ്പോള്‍ ചുരുക്കത്തില്‍ പറഞ്ഞാല്‍ .....

അര്‍ജുനന്‍ സാക്ഷി എന്ന ചിത്രത്തിന് ശേഷം ഇത്രയും സമയം എടുത്തു ചെയ്ത ഒരു ചിത്രം എന്ന നിലയ്ക്ക് നോക്കിയാല്‍ വളരെ മോശം എന്ന് തന്നെ പറയേണ്ടി വരും. പക്ഷെ വിഷമം ഒരൊറ്റ ആളുടെ അല്ലെങ്കില്‍ ഒരൊറ്റ കഥാപാത്രസൃഷ്ട്ടിയുടെ പാളിച്ച മൂലം ഒരു ചിത്രം മൊത്തത്തില്‍ മോശമാവുന്നു എന്നതിലാണ്. മൊത്തത്തില്‍ എന്തോന്ന് റോക്ക്സ് ????

Sunday, February 5, 2012

സെക്കന്റ്‌ ഷോ (Second Show )

അണ്ണാ ഇതു വളരെ മോശം ... അയ്യം എന്ന് തന്നെ പറയാം

എന്തുവാടെ രാവിലെ ?

മലയാള സിനിമയില്‍ മാറ്റത്തിന്‍റെ ടൊര്‍ണാഡോ വീശി അടിക്കാന്‍ തുടങ്ങിയിട്ട് ഇന്നേക്ക് മൂന്നാം ദിവസം.മലയാള സിനിമയില്‍ വല്ലപ്പോഴും സംഭവിക്കുന്ന മഹാ അത്ഭുതം,പുതിയ താരോദയം ഇതൊക്കെ സംഭവിച്ചിട്ടും നിങ്ങള്‍ ഒരുമാതിരി .. കുരങ്ങു ചത്ത കുറവനെ കൂട്ട് ഇങ്ങനെ.....കഴിഞ്ഞ വര്‍ഷം ട്രാഫിക്‌ ഈ വര്‍ഷം ദാ സെക്കന്റ്‌ ഷോ

അനിയാ നില്‍.നീ ഇല്ല നമ്മുടെ പുതിയ നായകന്‍ സുപ്പര്‍ താരം ഡോക്ടര്‍ മമ്മൂട്ടിയുടെ മകന്‍ അഭിനയിച്ച പടത്തെ പറ്റി തന്നെ അല്ലെ ഈ പറയുന്നേ? എന്തായിരുന്നു ആ പയ്യന്‍റെ പേര് നിക്കര്‍ സല്‍മാനോ ദുഷ്ടന്‍ സല്‍മാനോ അങ്ങനെ ഏതാണ്ട് അല്ലേ ?

ഇതെന്തോന്ന് അണ്ണാ? നിങ്ങള് പത്രം വായിക്കാറില്ലേ .മകന് സുപ്പര്‍ താര സന്തതി എന്ന യാതൊരു പരിഗണനയും നല്‍കി പോകരുത് എന്ന സുപ്പര്‍ താരം വക കര്‍ശനമായ താക്കീതിനെ സാഹസികമായി മറികടന്നു ഇവിടുത്തെ മാധ്യമങ്ങള്‍ കുറച്ചു ദിവസമായി അദേഹത്തിന്‍റെ വിശേഷങ്ങള്‍ കാന്ധം കാന്ധമായി വിളമ്പുക അല്ലായിരുന്നോ? പേര് ദുല്‍ക്കര്‍ സല്‍മാന്‍ വീട്ടില്‍ ചാലു മോനെ എന്ന് വിളിക്കും.പിന്നെ ഈ പടം,ദയവായി നിങ്ങള്‍ പുതുമുഖ നായകന്‍ പയ്യനെ കേറി സുപ്പര്‍ താരം മമൂട്ടിയുമായി കേറി
താരതമ്യപ്പെടുതരുത്.

അനിയാ മമ്മൂട്ടി എന്ന നടനെ മര്യാദക്കുള്ള ഏതൊരു പുതുമുഖ നടനുമായി താരതമ്യപ്പെടുത്തിയാലും പുതുമുഖത്തിന്‌ മാര്‍ക്ക് കൂടുതല്‍ ആയിരിക്കും എന്നാണ് ഞാന്‍ വിശ്വസിക്കുന്നത്.ശ്രീ മമ്മൂട്ടി അടിയൊഴുക്കുകള്‍,ആവനാഴി എന്നെ ചിത്രങ്ങള്‍ ആകുന്ന കാലത്താണ് അദേഹം അഭിനയിക്കുമല്ലോ എന്നൊരു സംശയം പോലും കാണികള്‍ക്ക് വരുന്നത് എന്നാണ് എന്‍റെ ഓര്‍മ്മ,അത് വരെ അദേഹം അഭിനയിച്ചു തകര്‍ത്തിരുന്നത് ആര്‍ക്കും ചെയ്യാമായിരുന്ന ചിത്രങ്ങളോ (പെട്ടി കുട്ടി സീരീസ്‌ ) അല്ലെങ്കില്‍ അഭിനയിച്ചു കുളമാക്കിയ ചിത്രങ്ങളോ (പടയോട്ടം, തൃഷ്ണ പോലുള്ളവ) ആണ്.(ഈ പറഞ്ഞ എല്ലാ ചിത്രങ്ങളും റീലീസ് കാലത്ത് തീയറ്റെറില്‍ പോയി കണ്ട ആളാണ് ഈയുള്ളവന്‍.) പടയോട്ടം എന്ന ചിത്രം ഇപ്പോള്‍ സി ഡി ഇറങ്ങിയിട്ടുണ്ട് വാങ്ങി കണ്ടു നോക്കണം ആ ചിത്രത്തില്‍ ശ്രീ മമൂട്ടി ഒഴികെ എല്ലാരും (മുതിര്‍ന്ന താരങ്ങളായ നസീര്‍,മധു,ഗോവിന്ദന്‍കുട്ടി തുടങ്ങി അന്നത്തെ ഇളമുറക്കാരായ മോഹന്‍ലാലും (അതൊരു കാലം !!) ശങ്കറും വരെ) നന്നായിട്ടുള്ള ചിത്രമാണ്.

ശരി ശരി ..എന്നാലും പയ്യന്‍ നമ്മുടെ അഹങ്കാരി നായകന്മാരെ പോലെയല്ല. ഇത്ര നല്ല സെറ്റപ്പില്‍ നിന്ന് വന്നിട്ട് ഇത്ര എളിയ ഒരു ലോഞ്ച് .. അത് കണ്ടാല്‍ തന്നെ അറിയില്ലേ പയ്യന്‍ വിനയവാനും നല്ല സിനിമയെ സ്നേഹിക്കുന്നവനും.പോരാത്തതിനു പയ്യന്‍ സിനിമയെ പറ്റി,അഭിനയത്തെ പറ്റി ഒക്കെ ശാസ്ത്രീയമായി പഠിച്ചിട്ടൊക്കെ തന്നെയാണ് ഈ പണിക്കിറങ്ങിയത്. പിന്നെ ഒന്നുമല്ലേലും ഇതൊരു നവയുഗ സിനിമയല്ലേ ?

എടാ, സ്ഥലം അഹങ്കാരി എന്ന സ്ഥാനം പ്രിഥ്വിരാജില്‍ നിന്നും ഇന്നലെ വരെ സല്‍ഗുണ സബന്നന്‍ ആയിരുന്ന ശ്രീ ആസിഫലിയിലേക്ക് നീങ്ങുന്നത്‌ കണ്ടപ്പോള്‍ തന്നെ ഞാന്‍ കരുതിയതാ ഈ സല്‍മാന്‍ വരാറായി എന്നത് (പറഞ്ഞു വരുമ്പോള്‍ ആസിഫലി ആണല്ലോ ഏറ്റവും ഇളയ താരം).പിന്നെ സിനിമയുമായി ഒരു ബന്ധവും ഇല്ലാത്ത പേര്,കുറ്റി താടി നായകന്‍,വേറെ ഒന്ന് രണ്ടു താടികള്‍,ചെലവു കുറക്കാന്‍ കൊണ്ട് വന്ന കൈയില്‍ പിടിക്കാവുന്ന ക്യാമറ(ചാപ്പാ കുരിശുകാര്‍ കൈയ്യില്‍ കാശില്ലാതെ ഗതികേട് കൊണ്ട് ഉപയോഗിച്ച ആ ഐറ്റം) ,ക്രമം തെറ്റിച്ച കഥ പറച്ചില്‍(നോണ്‍ ലീനിയര്‍ കഥാകഥന സംവിധാനം കണ്ട് പിടിച്ചവന്റെ ആത്മാവ് കല്ലറയില്‍ കിടന്ന് മലയാളം സിനിമയുടെയും ചാലു മോന്റെയും ഡാഡിക്ക് വിളികാതിരുന്നാല്‍ ആത്മാക്കള്‍ ഇല്ല എന്നത് ശാസ്ത്രീയമായി തെളിയിക്കപ്പെട്ടു എന്ന് ഉറപ്പിച്ചോ ),പിന്നെ അവിയല്‍ പോലെ ഒരു ബാന്‍ഡ്,ഒരല്‍പം മീഡിയ കുഴല്‍ ഊത്തു എത്രയും ചേര്‍ന്നാല്‍ നവയുഗ സിനിമ ആകുമോ അനിയാ ?

അണ്ണാ പ്ലീസ് കാടു കേറല്ലേ.അത് നമുക്ക് പിന്നൊരിക്കല്‍ ചര്‍ച്ച ചെയ്യാം.ഇപ്പോ പടത്തെ പറ്റി .... പുതുമുഖ സംവിധായകന്‍ , ബാക്കി പിന്നണി പ്രവര്‍ത്തകര്‍,നടീ നടന്‍മാര്‍ ... എന്നിട്ടും.

ശ്രീനാഥ് രാജേന്ദ്രന്‍ ആണ് ഈ ചിത്രം സംവിധാനം ചെയ്തിരിക്കുന്നത് അഥവാ അങ്ങനെ അവകാശപ്പെട്ടിരിക്കുന്നത്,തിരക്കഥ പണിതു പണി പഠിക്കാന്‍ എത്തിയിരിക്കുന്നത് ശ്രീ വിനുവിശാലാണ്, ക്യാമറ പപ്പു, സംഗീതം എന്ന പേരില്‍ ഒച്ചപ്പാട് ഉണ്ടാക്കുന്നത് റെക്സ് വിജയന്‍.സുരുക്കമാ ശൊന്നാല്‍ അറിയുന്ന മുഖങ്ങള്‍ ബാബുരാജ്,രോഹിണി,കുഞ്ചന്‍ എന്നിവരേ എന്‍റെ ഓര്‍മയില്‍ ഉള്ളു .

ഇനി കഥ..... മഴയുള്ള ഒരു രാത്രി ഒരു ബസ്‌ സ്റ്റോപ്പ്.അവിടെ ബസ്‌ കാത്തു നില്‍ക്കുന്ന ഹരിലാല്‍ എന്ന ലാലു (സല്‍മാന്‍) അവിടെ കണ്ട മറ്റൊരു ആളോട് തന്‍റെ ജീവിതകഥ പറയുന്നിടത്താണ് തുടക്കം .അവിടെ തന്നെ കല്ല്‌ കടിയാണ്.മറ്റേ ആള്‍ക്ക് സംസാരിക്കാന്‍ തീരെ താല്പര്യം ഇല്ല. അങ്ങേരെ ബലമായി തന്‍റെ ഫ്ലാഷ് ബാക്ക് കേള്‍പ്പിക്കയാണ് നായകന്‍.(സംഗതി പുതുമയ്ക്ക് വേണ്ടി ആകണം.മിണ്ടാതിരിക്കുന്ന നായകനോട് ഇടിച്ചു കേറി സംസാരിച്ചു കഥ പറയിക്കുന്നത് പഴമയല്ലേ)

ഒന്ന് വെറുതെ ഇരുന്നേ അണ്ണാ , പ്രേമവും,പ്രതികാരവും ,സ്നേഹവും,കുടുംബ ബന്ധങ്ങളുടെ ഹൃദയ സ്പര്‍ശിയ മുഹൂര്‍ത്തങ്ങളും ഇട കലര്‍ത്തി ആസ്വാദനത്തിന്‍റെ വേറിട്ട വഴികളിലൂടെ ഓടുന്ന ഈ ചിത്രം വ്യക്തിത്വം ഉള്ള കഥാപാത്രങ്ങളുടെ ഉന്തും തള്ളും ഉള്ള ഒരു സിനിമയാണ് എന്ന് ഏതു കണ്ണ് പൊട്ടനും അറിയാമല്ലോ .

ആണോ? ശരി . എന്നാ ഇതാണ് മേല്‍ പറഞ്ഞ സംഭവം,

എന്ത് തൊഴിലും ചെയ്തു (പ്രധാനമായും മണല്‍ മാഫിയക്ക് ലോഡ് കടത്തി കൊടുക്കുന്ന ഭരിച്ച പണി.ബാക്കി സമയം വെള്ളമടിയും തമാശയും) ജീവിക്കാന്‍ പാട്പെടുന്ന ലാലുവും സുഹൃത്തുക്കളും. ഇവര്‍ ചാവേര്‍ വാവച്ചന്‍ (ബാബുരാജ്‌ ) എന്ന പലിശക്കാരന്‍റെ ഗുണ്ട സംഘത്തില്‍ വണ്ടി സി സി പിടിക്കാന്‍ ചേരുന്നു.

ഈ ചാവേര്‍ വാവച്ചന്‍,പിന്നെ ചാവേര്‍ അന്തോണി എന്നെ ഇരട്ട വേഷം ബാബുരാജ്‌ വ്യത്യസ്തമായി ആണ് അവതരിപ്പിച്ചിരിക്കുന്നത് എന്ന് കേട്ടല്ലോ ഉള്ളതാണോ?

അനിയാ സാള്‍ട്ട് ആന്‍ഡ്‌ പെപ്പര്‍ എന്ന ചിത്രത്തിന് മുന്‍പ് ബാബുരാജ്‌ തുടക്കത്തില്‍ വന്നു നായകന്‍റെ കൈയില്‍ നിന്നും കിട്ടാനുള്ളത് വാങ്ങി പോകുന്ന കഥാപത്രങ്ങളെ ആയിരുന്നു അവതരിപ്പിച്ചിരുന്നത്.പ്രസ്തുത ചിത്രത്തിന് ശേഷം അദേഹം എന്ത് കാണിച്ചാലും നമ്മള്‍ ചിരിച്ചു കൊള്ളണം എന്ന അലിഖിത നിയമം ഉള്ളതിനാല്‍ ഇതില്‍ അദേഹം ഒരു കോമാളി വില്ലനെ ആണ് അവതരിപ്പിക്കുന്നത്. അദേഹത്തിന്‍റെ ചേട്ടന്‍ ചാവേര്‍ അന്തോണി എന്ന ഭീകരഗുണ്ട ഒരിക്കല്‍ ഒരു പയ്യന്‍ പടക്കം പൊട്ടിക്കുന്ന ശബ്ദം കേട്ട് ഹൃദയസ്തംഭനം വന്നു മരിച്ചു പോലും.ആ പയ്യനെ തേടി കഴിഞ്ഞ പത്തിരുപതു കൊല്ലമായി പ്രതികാരദാഹിയായി നടക്കുകയാണ് അദേഹം.
നീണ്ട കാലത്തിനു ശേഷം ആ പയ്യനെ കിട്ടിയ വാവച്ചന്‍ ആശുപത്രിയില്‍ ആസന്ന മരണനായി കിടക്കുന്ന വലുതായ പയ്യനെ മാലപ്പടക്കം ചുറ്റി പൊട്ടിച്ചു കൊല്ലുന്നു.എന്നാല്‍ ആളു മാറി വാവച്ചന്‍ കൊല്ലുന്നത് അന്താരാഷ്ട്ര അധോലോക നേതാവായ വിഷ്ണുബുദ്ധന്‍ (സുരേഷ് ബെറി) എന്നയാളിന്‍റെ വലം കൈയെ ആണ് .(ഇത്ര വലിയ അധോലോക രാജാവിന്‍റെ വലം കൈ കിടക്കുന്നത് വേറെ കുറെ സാധാരണ രോഗികളുടെ കൂടെ !!).കുപിതനായ അധോലോക രാജാവ്‌ വാവച്ചനെ തട്ടുകയും നായകന്‍റെ വീരപരാക്രമം കണ്ടു സന്തുഷ്ടനായി അവരെ സംഘത്തില്‍ എടുക്കുകയും ചെയ്യുന്നു.(കൂട്ടത്തില്‍ പറഞ്ഞോട്ടെ ആക്ഷന്‍ രംഗങ്ങള്‍ തികച്ചും ബോറായി ആണ് ചിത്രീകരിച്ചിരിക്കുന്നത്,കാസനോവ പോലും ഇതിലും ഭേദം!!).ഇനി ആദ്യത്തെ വഴിത്തിരിവ് . കൂട്ടത്തില്‍ ഒരുത്തന്‍ നമ്മുടെ ബുദ്ധ രാജാവിന്‌ കൊടുകേണ്ട,മയക്കു മരുന്ന് വിറ്റു കിട്ടിയ കാശുമായി മുങ്ങുന്നു .നിവര്‍ത്തി ഇല്ലാതെ നായകനും സംഘവും കാശു വാങ്ങാന്‍ വരുന്ന രാജാവിന്‍റെ മകന്‍ സിദ്ധുവിനോട് (പാവം രാജാവ്‌ വേറെ ആരെയും വിശ്വാസം ഇല്ലാത്തത് കൊണ്ടാകണം പ്രീഡിഗ്രി പരുവത്തിലുള്ള മകനെയാണ് ഈ പരിപാടിക്ക് വിടുന്നത്).പോയി പണി നോക്കാന്‍ പറയുന്നു. രാജാവ്‌ സ്വാഭാവികമായും ഗുണ്ടകളെ വിടുന്നു.അവരുമായി ഉന്തും തള്ളും കഴിഞ്ഞു കുത്തും കൊണ്ട് ഓടുന്ന വഴിക്ക് തിരിഞ്ഞു നിന്ന് നായകന്‍ ബുദ്ധ രാജ ഗുണ്ടകളോട് ഇതിനു നിന്നോടൊക്കെ പകരം ചോദിക്കും എന്ന് വിളിച്ചു പറയുന്നുണ്ട് (അലറുന്നു എന്നാകണം സ്ക്രിപ്റ്റില്‍ പയ്യന്‍ അലറുന്നതുമുണ്ട്.പക്ഷെ പൂച്ച ഗര്‍ജ്ജിക്കുന്നു എന്ന് പറഞ്ഞത് പോലെയാണ് സംഭവം . എത്ര ശ്രമിച്ചാലും മ്യാവു തന്നെ ഫലം ). എന്തിനാണ് പകരം ചോദിക്കുന്നത് എന്ന് പടം തീരുന്നത് വരെ മനസിലായില്ല പാവം ബുദ്ധന്‍ !!!ഇതിനിടയില്‍ എപ്പോളോ നായകന്‍റെ അമ്മാവന്‍റെ (കുഞ്ചന്‍) മകളുമായി (നായിക ഗൌതമി നായര്‍) നായകന്‍റെ പ്രേമം വേറൊരു വഴിക്ക് (ആ ട്രാക്ക് അധികമില്ല.പാട്ടുമില്ല ഭാഗ്യം )

സംഘം നാട് വിട്ട് വേറൊരു സ്ഥലത്ത് ചെന്ന് ചായക്കട ഒക്കെ ഇട്ടു സമധാനമായി ജീവിക്കുമ്പോള്‍,അവരുടെ തന്നെ കൈയില്‍ ഇരുപ്പു കൊണ്ട് ബുദ്ധന്‍ ഇവരുടെ സ്ഥലം അറിയുകയും കട കത്തിക്കുകയും ചെയ്യുന്നു .കുപിതരായ സംഘം തിരിച്ചടിച്ചു ബുദ്ധന്‍റെ ബിസിനസ്‌ ചുമ്മാ പോയി പിടിച്ചടക്കുന്നു. ബുദ്ധന്‍റെ അധോലോകം സെക്കണ്ട് കൊണ്ട് പിടിച്ചടക്കി നായകന്‍ അധോലോക രാജാവായി ഒരു ഇരിപ്പുണ്ട്.കാണേണ്ടതാണ് സംഗതി.(പഴയ കടപ്പുറം സിനിമകളില്‍ ജനാര്‍ദ്ദനന്‍ അവതരിപ്പിക്കുന്ന കൊച്ചു മുതലാളി കഥാപാത്രത്തിന്റെ നൊസ്റ്റാള്‍ജിയ ആ ഇരുപ്പ് കണ്ടാല്‍ ഉറപ്പ്).അധോലോക രാജാവായി കഴിഞ്ഞു നായകന്‍ അസുരവിത്തില്‍ പാവം ആസിഫലി ചെയുന്നതെല്ലാം ചെയുന്നു കോട്ടും ഇട്ടു പെണ്ണുങ്ങള്‍ ഉള്‍പ്പെടുന്ന അധോലോക സംഘവുമായി നടക്കുക (ദോഷം പറയരുതല്ലോ ആരും കുട പിടിക്കുന്നില്ല ) ഇത്യാദി സംഗതികള്‍ .

അവസാനം തീരെ അനങ്ങാതെ ഇരുന്നാല്‍ മോശമല്ലേ എന്ന് കരുതി ബുദ്ധന്‍ നായകന്‍റെ സുഹൃത്ത്‌ കുരുടിയെ കൊല്ലുന്നു (മരിച്ചു കഴിഞ്ഞു നായകന്‍ മഴ പെയ്യുന്ന ആകാശത്തേക്ക് നോക്കി ഒരു അലര്‍ച്ച ഉണ്ട് !! ആരാധകര്‍ക്ക് കൈയടിക്കാം,വിവരമുള്ളവന് സ്വന്തം തലക്കും അടിക്കാം) അടുത്ത രംഗത്തില്‍ ബുദ്ധനു മുന്നില്‍ നായകന്‍ ഷേവ് ചെയ്തു കൊടുക്കാന്‍ ഇരിക്കുന്നത് പോലെ ഇരിക്കുന്നതാണ്.രണ്ടു പേരുടെയും മുഖം നിര്‍വികാരം (കണ്ടോ പുതുമ !!) നായകന്‍ ഉത്ഘാടനത്തിന് നാട മുറിക്കുന്നത് പോലെ ബുദ്ധന്‍റെ കഴുത്ത് മുറിക്കുന്നു.ബുദ്ധന്‍ നിര്‍വികാരമായി ചാകുന്നു.(ബുദ്ധം ശരണം ഗച്ചാമി എന്നൊരു ബാക്ക് ഗ്രൌണ്ട് മ്യൂസിക്‌ കൂടെ കൊടുക്കാമായിരുന്നു !! ചുമ്മാ ഒരു ഇതിനു )

അവിടെ കഥ തീരുമോ ?

എവിടെ ?ഇനിയല്ലേ ട്വിസ്റ്റ്‌ . ബുദ്ധന്‍ മരിച്ച ഉടനെ നായകനും സംഘത്തിനും ഒപ്പം കഞ്ചാവ് കടത്തലിന് കൂടു നിന്നിരുന്ന (പണ്ട് ബുദ്ധന്റെ സഹായി ആയിരുന്ന) കോണ്‍സറ്റബിള്‍ സച്ചിദാനന്ദന്‍ 'പറ്റിച്ചേ !!! ഞാന്‍ അണ്ടര്‍കവര്‍ കമീഷണര്‍ സച്ചിന്‍ തെണ്ടുല്‍ക്കര്‍ ആണേ !!! എന്ന് കൂവിക്കൊണ്ട് നായകന് മുന്നില്‍ പ്രത്യക്ഷപ്പെടുന്നു .നായകനെ തട്ടി ഉള്ളെ ആക്കുന്നു .അഞ്ചു വര്‍ഷങ്ങള്‍ അകത്തു കിടക്കുന്ന നായകന്‍ ജയിലില്‍ നിന്നും പുറത്തിറങ്ങി കഞ്ഞിയും പയറും ചമ്മന്തിയുമായി തന്നെ കാത്തിരിക്കുന്ന മമ്മിയെ കാണാന്‍ പോകുന്ന വഴിക്കാണ് , വഴിയില്‍ കണ്ട ഏതോ ഒരുത്തനോട്‌ ഫ്ലാഷ് ബാക്ക് ഭാണ്ഡം അഴിക്കുന്നത് .ആ വഴിയില്‍ കണ്ട ഏതോ ഒരുത്തന്‍ ബുദ്ധന്റെ മകന്‍ പഴയ പ്ലസ്‌ ടൂ പയ്യന്‍ പറഞ്ഞു വിട്ട കൊട്ടേഷന്‍ പാര്‍ട്ടിയാണ് എന്നത് ഒടുക്കത്തെ ട്വിസ്റ്റ്‌ .അയാളുടെ വെടിയേറ്റ്‌ പെരുവഴിയില്‍ വീഴുന്ന നായകന്റെ കൈ അനങ്ങുന്നിടത്ത് പ്രേക്ഷകരുടെ കഷ്ടകാലത്തിന് ഈ പടം ഓടിയാല്‍ രണ്ടാം ഭാഗം ഇറക്കും എന്ന ഭീഷണിയോടെ പടം തീരുന്നു

ഇനി നീ പറഞ്ഞ വ്യക്തിത്വം ഉള്ള കുറെ കഥാപാത്രങ്ങള്‍.

നായകന്‍ : പുഞ്ചിരിച്ചാലും പല്ല് ഞെരിച്ചാലും ഒരേ ഭാവം മുഖത്ത് വരുന്ന നടന്‍ .സ്ഥിരമായി ഒന്നോ രണ്ടോ ഭാവം. അഭിനയത്തിന് പ്രത്യേക ക്ലാസ്സ്‌ ഒക്കെ കഴിഞ്ഞു വന്നു എന്നത് ശരിയാണെങ്കില്‍ വളരെ മോശപ്പെട്ട ഒരു നടന്‍ എന്ന് പറയേണ്ടി വരും,(രക്ഷപ്പെടാതെ പോയ പുതു മുഖങ്ങളെ എടുത്താല്‍ കൂടി,ഉദാഹരണമായി നമ്മള്‍ എന്ന ചിത്രത്തിലെ ജിഷ്ണുവും സിദ്ധാര്‍ദ്ധനും പോലും ഇതിലും എത്രയോ ഭേദം !!!)

നായിക : പ്രേമിച്ചാലും,പേടിച്ചാലും,നാണിച്ചാലും,വികരഭാരിതയായാലും,നായകനെ കളഞ്ഞു വേറെ കെട്ടിയാലും ഒരൊറ്റ ഭാവം ആണ് മുഖത്ത്.

നായകന്‍റെ അമ്മ (രോഹിണി ) : കവിയൂര്‍ പൊന്നമ്മയുടെ ചെറുപ്പം വേര്‍ഷന്‍

കുരുടി /നെല്‍സണ്‍ (സണ്ണി വെയിന്‍ ) : പഴശിരാജയില്‍ ശരത് കുമാര്‍ അവതരിപ്പിച്ച കുങ്കന്‍ കലക്കി എന്നതിന് കാരണമായി എനിക്ക് തോന്നിയത് ബാക്കിയുള്ളവര്‍ അത്രക്ക് ബോര്‍ ആയി എന്നതാണ് . സംഗതി ഇവിടെയും അത് തന്നെ . കഷ്ടിച്ച് സഹിക്കാം ഉള്ളതില്‍ ഭേദം.

നായകന്‍റെ അമ്മാവന്‍ (കുഞ്ചന്‍ ) : പഴയ പ്രിയദര്‍ശന്‍ സിനിമകളില്‍ ഉള്ള,ദരിദ്രരായ നായകനെയും അമ്മയെയും പുറം തള്ളുകയും നായകന് നല്ല ജോലി കിട്ടി എന്നറിയുമ്പോള്‍ മകളെ കെട്ടിച്ചു കൊടുക്കാന്‍ മുട്ടി നില്‍ക്കുകയും ചെയുന്ന മന്ദബുദ്ധി കഥാപാത്രം.

ചാവേര്‍ വാവച്ചന്‍ : നേരത്തെ പറഞ്ഞ വ്യത്യസ്ത കഥാപാത്രം.കാണുമ്പോള്‍ തന്നെ ചിരിച്ചു തുടങ്ങിക്കോണം

വില്ലന്‍ : ഇങ്ങേരെ പറ്റി എന്ത് പറയാന്‍ ?.പാവം മനുഷ്യന്‍ !!! ഒരു അധോലോക രാജാവിനും ഇത്ര ഗതികേട് വരാതിരിക്കട്ടെ.സ്വന്തം മോനെ ഇടി കൊടുത്ത് അവന്റെ വസ്ത്രവും സെല്‍ ഫോണും ഒക്കെ പിടിച്ച് പറിച്ച നായകന്റെയും കൂട്ടുകാരുടെയും ഹോട്ടലിനു തീ വെയ്പ്പിക്കുന്ന വില്ലന്‍ അത് കഴിഞ്ഞ ഉടന്‍ ചെയ്യുന്നത് മോന്റെ സെല്‍ ഫോണിലേക്ക് വിളിച്ച് 'മോനെ നമ്മുടെ കഞ്ചാവ് ലോറി മണക്കാട് ജങ്ങ്ഷന്‍ കഴിയാറായി .നിന്റെ ഒരു കണ്ണ് വേണം' എന്ന് പറയുകയാണ്‌ .ആ വിവരം വില്ലന്റെ മകന്റെ ഫോണിലൂടെ കേട്ട ശഷമാണ് നായകന്‍ ആ കഞ്ചാവ് ലോറി പിടിച്ച്, കച്ചവടമടിച്ചു വലിയ ആളാകുന്നത്.പിന്നെ നായകന്‍ ഒരാഴ്ച ലോക്കല്‍ സര്‍ക്കാര്‍ ആശുപത്രിയില്‍ ബോധമില്ലാതെ കിടകുമ്പോള്‍ ,നായകന് ബോധം തെളിഞ്ഞ ശേഷം കൊള്ളാന്‍ ആളെ വിടാം എന്ന് കരുതി പുള്ളി വെറുതെ ഇങ്ങനെ കസേരയില്‍ കാലും കയറ്റി ഇരിക്കും .സിനിമയില്‍ അങ്ങേരുടെ സീനുകള്‍ ഒട്ടുമുക്കാലും ഈ ഇരുപ്പ് തന്നെയാണ് ,അവസാനം ആ കസേരയില്‍ തന്നെ ഒരു ചെറു വിരല്‍ പോലുമാനക്കാതെ ഷേവ് ചെയ്യാന്‍ ഇരുന്നു കൊടുകുമ്പോലെ നായകന് തന്നെ കൊല്ലാന്‍ പാകത്തിന് പുള്ളി ഇരുന്നു കൊടുക്കുന്നതുമുണ്ട്

സച്ചി എന്ന പോലീസുകാരന്‍ : മുംബൈ മാര്‍ച്ച്‌ 21 എന്ന ചിത്രത്തിലെ ലാല്‍ അവതരിപ്പിച്ച കഥാപാത്രത്തിനു ശേഷം ഇത്രയും സങ്കീര്‍ണമായ കഥാപാത്രം മലയാളത്തില്‍ ആദ്യം . ഒര്‍ജിനല്‍ കഞ്ചാവ് കടത്ത്കാരെ പിടിക്കാന്‍ വരുന്ന പുള്ളിയുടെ ഹോബി അണ്ടര്‍കവറായി നിന്ന് പഴയ അധോലോക രാജാവിന്റെ ഗുണ്ടകളെയും വഴിയെ പോകുന്നവരെയും ഒക്കെ വലിയ കള്ളക്കടത്തുകാര്‍ ആകാനുള്ള എല്ലാ സഹായവും ചെയ്തു കൊടുക്കുക,അവര്‍ക്ക് കാറും കോട്ടും സ്യൂട്ടും,കൂളിംഗ് ഗ്ലാസും,സ്ലോമോഷനും ഒക്കെ ആയതിന് ശേഷം അവരെ അറസ്റ്റ് ചെയുക എന്നതുമാണ്‌ .തീര്‍ത്തും സങ്കീര്‍ണമായ മാനസിക വ്യാപാരങ്ങള്‍ ഉള്ള ഒരു കഥാപാത്രം തന്നെ.അല്ലെ ?

പിന്നെയുള്ളത് സിനിമയുടെ തുടക്കത്തില്‍ മഴയത്ത് ബസ്‌ സ്റ്റോപ്പില്‍ നായകന്‍ പരിചയപ്പെടുകയും ഇടിച്ച് കയറി സ്വന്തം കഥ മുഴുവന്‍ വിളമ്പുകയും ചെയ്യുന്ന കഥാപാത്രം.മുഴുവന്‍ കഥ കേട്ട ശേഷം കൊട്ടേഷന്‍ തൊഴിലാളിയായി മാറി നായകനെ വെടിവെച്ച് വീഴ്ത്തുന്ന ഈ കഥാപാത്രം പ്രേക്ഷരുടെ തന്നെ ഒരു പ്രതിനിധിയാണ് .പടം കണ്ട് കഴിഞ്ഞപ്പോള്‍ എനിക്കും അങ്ങനെ എന്താങ്ങിലും ഒക്കെ ചെയ്യാന്‍ തോന്നിപ്പോയി

മിനിമം തിരക്കഥയില്‍ എങ്കിലും ഒരു പുതുമ ഇല്ലേ അണ്ണാ ?

പിന്നെ,ഒന്നുമിലെങ്കിലും മമ്മി ഈസ്‌ മമ്മി കാമുകി ഈസ്‌ കാമുകി .മമ്മി വില്‍ ആള്‍വേസ് ലവ് ചാലു മോന്‍ ബട്ട്‌ കാമുകി വില്‍ ആള്‍വേസ് ലവ് പണം,കോട്ട് സ്യൂട്ട് ആന്‍ഡ്‌ ബെന്‍സ് കാര്‍ എന്ന മഹത്തായ സന്ദേശം തരുന്നു എന്നൊരു പുതുമയെങ്കിലും പറയാം.

അനിയാ ,കുറച്ചു കാലം മുന്‍പ് ഗോവിന്ദന്‍ കുട്ടി എന്നൊരുത്തന്‍ ത്രീ ചാര്‍സോബീസ് എന്നൊരു പടം സംവിധാനം ചെയ്ത് നായകനായി അഭിനയിച്ചിരുന്നു .ഇതേ കഥ,ഇതേ സന്ദര്‍ഭങ്ങള്‍ (വില്ലനും,അണ്ടര്‍കവറും ഒഴികെ).അതില്‍ മോഷണം,ഇതില്‍ കഞ്ചാവ് കടത്ത്.ഒടുക്കം എല്ലാം ഒന്ന് പോലെ തീരുന്നു.ആ നിലവാരം മാത്രമുള്ള ഒരു കൂറ പടം .അതാണ്‌ സെക്കണ്ട് ഷോ.

ഒരു വത്യാസം ഉണ്ട് അണ്ണാ

എന്തോന്നടെ ?

ഗോവിന്ദന്‍കുട്ടിയുടെ ഡാഡിയുടെ പേര്‍ സുപ്പര്‍ സ്റ്റാര്‍ മമ്മൂട്ടി എന്ന് അല്ലല്ലോ .ടന്‍ ട ഡാങ്ങ് !!!

അത് ന്യായം .ആ ഒരു ഒറ്റ കാരണം കൊണ്ട് ജഗതി ശ്രീകുമാര്‍ പറഞ്ഞത് പോലെ ഗോവിന്ദന്‍ കുട്ടി ചെയ്തപ്പോള്‍ ങ്ങേ ഹേ !!! , ചാലു മോന്‍ ചെയ്തപ്പോള്‍ ഓ ഹോ !!!, അല്ലെഡേ ?

അതാണ്‌ പോയന്റ് .അണ്ണാ,നിങ്ങള്‍ ഒന്ന് ശ്രമിച്ചാല്‍ സോഷ്യല്‍ മീഡിയ രംഗത്തെ ആധുനിക കുഴലൂത്ത് കമ്മറ്റിയുടെ ചെയര്‍മാന്‍ ആകാം

വേണ്ടഡാ.ഇപ്പോ തന്നെ നീയും,ബാക്കി കുറെ കിടിലങ്ങളും ആ കര്‍മ്മം ഭംഗിയായി ചെയുന്നുണ്ടല്ലോ.അത് അങ്ങനെ തന്നെ പോട്ടെ .ചാലു മോന്‍,പ്രണവ് മോന്‍,ഇവരുടെ വരാനിരിക്കുന്ന ചിത്രങ്ങള്‍,അത് കഴിയുമ്പോള്‍ അവര്‍ അവരുടെ
ഡാഡിമാരോടോത്തും,മറ്റവന്‍റെ ഡാഡിയോടോത്തും,അവര്‍ ഒരുമിച്ചും പിന്നെ അവരുടെ മോന്‍മാരോട് ഒന്നിച്ചും മലയാള സിനിമയില്‍ പുതുമയുടെ മാലപടക്കം പൊട്ടിക്കുമ്പോള്‍ ഇവര്‍ക്കൊക്കെ കുഴല്‍ ഊതാന്‍ നിങ്ങള്‍ തന്നെ ധാരാളം.

Thursday, January 19, 2012

സ്പാനിഷ്‌ മസാല

അണ്ണാ നിങ്ങളിതെന്തോന്നു ......?

മനസിലായില്ല.

ഹ.. നിങ്ങള്‍ ഒക്കെ കൂടി അല്ലിയോ പറഞ്ഞെ മലയാള സിനിമയില്‍ മാറ്റത്തിന്‍റെ സുനാമി ആഞ്ഞടിക്കും 2012 ല്‍ എന്ന് എന്നിട്ടിത് വരെ വന്നത് കുറെ കൂറപ്പടങ്ങള്‍.ഇതാണോ നിങ്ങളൊക്കെ പറഞ്ഞ ഈ സുനാമി?

ഇതല്ലേ പറയുന്നേ നിനക്കൊന്നും വിവരം ഇല്ലെന്നു.എടാ ഇതൊക്കെ ഇനി വരുന്ന താര സംഭവങ്ങള്‍ക്ക് വേണ്ടി പൊതുജനത്തെ ഒന്ന് പരുവപ്പെടുത്തല്‍ എന്ന പ്രക്രിയ അല്ലെ?

അസിഫലിയും,ജയസൂര്യയും,ശ്രീനിവാസനും ഒക്കെ താരങ്ങള്‍ അല്ല എന്ന അണ്ണന്‍റെ ദുസൂചന ഞാന്‍ തല്ക്കാലം അവഗണിക്കുന്നു.അപ്പോള്‍ ഈ ആഴ്ച പടമൊന്നും ....?

പിന്നേ... ഇറങ്ങിയല്ലോ.എല്‍സമ്മ എന്ന ആണ്‍കുട്ടി എന്ന ചിത്രത്തിന് ശേഷം സംവിധായകന്‍ ലാല്‍ ജോസ് ഒരുക്കുന്ന,ചന്തു പൊട്ടു എന്ന ചിത്രത്തിന് ശേഷം ദിലീപ്,ലാല്‍ ജോസ്,ബെന്നി നായരമ്പലം എന്നിവര്‍ ഒന്നിക്കുന്ന ചിത്രമാണ് സ്പാനിഷ്‌ മസാല. ദിലീപ്, കുഞ്ചാക്കോ ബോബന്‍,ബിജു മേനോന്‍ മുതലായവരെ കൂടാതെ സ്പാനിഷ്‌ നടി ഡാനിയേല നായിക ആയി എത്തുന്നു .നവാഗതനായ വേണു ഗോപാലിന്‍റെ വരികള്‍ക്ക് വിദ്യാസാഗര്‍ ഈണം പകര്‍ന്നിരിക്കുന്നു.കഥ ഭൂരിഭാഗവും സ്പെയിനില്‍ വെച്ച് നടക്കുന്നത് കൊണ്ട് കാളപ്പോര്,ട്ടോമാട്ടീനോ ഫെസ്റ്റിവല്‍,ഫ്ലെമിങ്ങ്ഗോ ഡാന്‍സ് എന്നിവ തികച്ചും സൌജന്യം.(ഇപ്പോളും മറൈന്‍ ഡ്രൈവില്‍ പ്രാവുകള്‍ പറക്കുന്ന ഷോട്ട് കാണിക്കാതെ നമുക്കൊക്കെ എന്തോന്ന് ബോംബെ ?)

അപ്പോള്‍ സംഗതി തകര്‍പ്പന്‍ ആയിരിക്കുമല്ലോ.കേട്ടിട്ട് തന്നെ ഒരു രോമാഞ്ചം ......

ഈ ലാല്‍ ജോസും,ദിലീപും ഒരുമിച്ചാല്‍ ഒന്നുകില്‍ ആശാന്‍റെ നെഞ്ചത്ത് അല്ലെങ്കില്‍ കളരിക്ക് പുറത്തു എന്നതാണ് അവസ്ഥ.മുല്ലയും,രസികനും,മീശ മാധവനും,ചാന്തുപൊട്ടും നമുക്ക് തന്ന ഈ ടീം ഇപ്രാവശ്യം ഒന്നിക്കുമ്പോള്‍ ഇപ്രാവശ്യം എന്താകും കിട്ടുക എന്നൊരു ആകാംഷ ഈ ചിത്രം കാണാന്‍ പോകുമ്പോള്‍ എനിക്ക് ഉണ്ടായിരുന്നു.ബിഗ്‌ സ്ക്രീന്‍ സിനിമയുടെ ബാനറില്‍ നൌഷാദ് നിര്‍മ്മിക്കുന്ന ഈ ചിത്രത്തെ ഒരു മ്യുസിക്കല്‍ ലവ് സ്റ്റോറി എന്നാണ് ഇവിടുത്തെ മാധ്യമങ്ങള്‍ വിശേഷിപ്പിച്ചു കണ്ടത്.ശങ്കര്‍ - മേനക കാലഘട്ടത്തിനു ശേഷം പൊതുവേ രണ്ടര മണികൂര്‍ പ്രേമം മാത്രം കണ്ടിരിക്കാനുള്ള ക്ഷമ ഇവിടുത്തെ സിനിമാ പ്രേക്ഷകര്‍ക്ക്‌ ഉണ്ടോ എന്ന ഒരു സംശയം മാത്രമേ എനിക്ക് ഉണ്ടായിരുന്നുള്ളു ഈ ചിത്രത്തിന് കേറുമ്പോള്‍ (എനിക്ക് ഏതായാലും ഇല്ല!!)

അണ്ണന്‍ എങ്ങനെ കാടിനു ചുറ്റും നടന്നു തല്ലാതെ ബാക്കി കൂടെ ഒന്ന് പറയാമോ ഉദാഹരണമായി... കഥ?

ശരി.ഇന്നാ പിടിച്ചോ.. ഈ ചിത്രത്തിന്‍റെ കഥ അഞ്ചേ അഞ്ചു വാചകങ്ങളില്‍ ഒതുക്കാം
1 ) തൊഴിലില്ലാത്ത മിമിക്രി കലാകാരന്‍ ചാര്‍ളി സ്പെയിനില്‍ എത്തി അവിടെ ഒരു പണക്കാരന്‍റെ കൊട്ടാരത്തില്‍ കുക്ക് ആയി ജോലിക്ക് കേറുകയും ചെയ്യുന്നു .
2 ) അവിടുത്തെ മുതലാളിയുടെ ഏക മകള്‍ കാമില കാമുകന്‍ രാഹുല്‍ (കുഞ്ചാക്കോ ബോബന്‍) മരിച്ചു അകെ ദുഖത്തില്‍ ആണ്. (പോരാത്തതിനു താല്‍കാലികമായി അന്ധയും !!)
3 ) നല്ലവനും മിടുക്കനുമായ ചാര്‍ളി കൊച്ചമ്മയുടെ ദുഃഖം അടക്കം സകല പ്രശ്നങ്ങള്‍ക്കും പരിഹാരം ഉണ്ടാക്കി കഴിയുമ്പോള്‍ കമിലയെ ചാര്‍ളിയെ കൊണ്ട് കെട്ടിക്കാന്‍ മുതലാളി തീരുമാനിക്കുന്നു .
4 )ഏതാണ്ട് സംഗതികള്‍ ശരിയായി വരുമ്പോള്‍ മരിച്ചു പോയ രാഹുല്‍ തിരിച്ചെത്തുന്നു,അതോടെ ചാര്‍ളി പുറത്താകുന്നു
5 ) രാഹുല്‍ ആദ്യം തോന്നിയത് പോലെ അത്ര നല്ലവന്‍ അല്ലെന്നും മറിച്ചു പരമ ദുഷ്ട്ടനും വേറെ സെറ്റ് അപ്പ്‌ ഉള്ളവനും ആണെന്ന് മനസിലാകുന്നതോടെ നായിക രാഹുലിനെ കളഞ്ഞു കേരളത്തിലെത്തി ചാര്‍ളിയെ കെട്ടുന്നു.

അണ്ണാ ഇതല്ലേ പഞ്ചാബി ഹൌസിന്‍റെയും കഥ? അതില്‍ രണ്ടു നായികമാരും ഒരു നായകനും ഇതില്‍ രണ്ടു നായകന്മാരും ഒരു നായികയും.അതില്‍ പഞ്ചാബ്‌ ഇങ്ങോട്ട് വന്നു ഇവിടെ നമ്മള്‍ സ്പെയിനില്‍ പോയി

അനിയാ നീ ഒരു കാര്യം മനസിലാക്കണം.ഇതു വരെ ആരും പറയാത്ത കഥ പറയണം എന്ന് എല്ലാരും വാശി പിടിച്ചാല്‍ പരമാവധി അഞ്ചിന് താഴെ പടങ്ങള്‍ പോലും ഒരു വര്‍ഷം ഇറങ്ങില്ല ഈ മലയാളത്തില്‍. അന്യ ഭാഷയില്‍ ഇറങ്ങുന്ന ചിത്രങ്ങള്‍ നോക്കിയാല്‍ പല ചിത്രങ്ങളും ഉപയോഗിച്ചിരിക്കുന്നത് പറഞ്ഞു പഴകിയ കഥകളാണ് (പെട്ടന്ന് ഓര്മ വരുന്നത് 180 എന്ന ചിത്രമാണ്).ആ കഥ അവതരിപ്പിച്ചിരിക്കുന്ന രീതി,അവതരണ ക്രമം എങ്ങനെ പല സംഗതികള്‍ വ്യത്യസ്തമായി ചെയ്യുമ്പോള്‍ ആണ് നമുക്ക് ബോര്‍ അടിക്കാതെ അങ്ങനത്തെ ഒരു ചിത്രം കാണാന്‍ കഴിയുന്നത്‌.വേറൊരു ഉദാഹരണം പറഞ്ഞാല്‍ പ്രണയിച്ചു ഒരുമിക്കാന്‍ കഴിയാതെ മരിച്ചു പോകുന്നവര്‍ അടുത്ത ജന്മത്തില്‍ ഒരുമിക്കുന്ന സംഗതി എത്ര സിനിമയില്‍ നമ്മള്‍ കണ്ടിട്ടുണ്ട് . പ്രബുദ്ധനായ മലയാളി പറഞ്ഞു പഴകിയ രീതിയില്‍ ആളുകളെ മാത്രം മാറ്റി ആ കഥ അവതരിപ്പിച്ചു,ഈ സിനിമക്ക് പിന്നില്‍ അന്ധവിശ്വാസം പ്രചരിപ്പിക്കാനുള്ള രഹസ്യ അജണ്ട ആണെന്നും അല്ലെന്നും വാദിച്ചു സമയം കളയുമ്പോള്‍ വിവരമില്ലാത്ത തെലുങ്കന്‍,മഗധീര എന്ന ചിത്രത്തിന്‍റെ ഫോര്‍മാറ്റില്‍ അതെ തീം അവതരിപ്പിച്ചു കോടികള്‍ കൊയ്യുന്നു.ഇനി ചോദ്യം: ഇവിടെ ശശി ആരാ?

മതി അണ്ണാ വയറു നിറഞ്ഞു. ഇനി ഈ പടത്തെ പറ്റി..?

ഈ ചിത്രത്തില്‍ ലാല്‍ ജോസിനു ഏറ്റവും കുറഞ്ഞ പക്ഷം ചെയ്യാമായിരുന്ന കാര്യങ്ങള്‍ ഈ ചിത്രത്തില്‍ പപ്പന്‍ എന്ന കഥാപാത്രത്തെ അവതരിപ്പിച്ച നെല്‍സന്‍ എന്ന താരതമ്യേനെ പുതുമുഖനടന് പകരം ജഗതിയെ പോലുള്ള നടനെ ഉപയോഗിച്ചിരുന്നെങ്കിലോ?കുറഞ്ഞ പക്ഷം ഒന്നാം പകുതി എങ്കിലും സഹിക്കാവുന്ന അവസ്ഥയില്‍ ആയി പോയേനെ.പരിചയ സമ്പന്നരായ സഹതാരങ്ങളുടെ അഭാവം മൂലം ഒന്നാം പകുതിയിലെ കോമഡി മൊത്തമായി ദിലീപിന്‍റെ തലയിലാണ്.രണ്ടാം പകുതിയിലെ സ്ക്രിപ്റ്റ് ലാല്‍ജോസ് വായിച്ചു നോക്കി പോലും കാണുമെന്നു ഈ ചിത്രം കണ്ടാല്‍ തോന്നില്ല.സ്ക്രിപ്റ്റ് എഴുതിയ ബെന്നി പി നായരമ്പലം എന്ന മഹാനെ എത്ര വഴ്ത്തിയാലും മതിയാകില്ല.ഒരുമാതിരി പഴയ ജഗന്നാഥവര്‍മ്മയോ പ്രതാപചന്ദ്രനോ ഒക്കെ ചെയ്തിരുന്ന സ്റ്റൈലില്‍ ആണ് നായികയുടെ അച്ഛനെ ഒക്കെ പടച്ചു വിട്ടിരിക്കുന്നത്.(നയതന്ത്ര രംഗത്ത് ഭയങ്കര സംഭവമായ പുള്ളി ആണ് ആളെന്നു ഓര്‍ക്കണം). പിന്നെ അങ്ങേരുടെ പെങ്ങളുടെ മകന്‍ ഒരാളുണ്ട് ഫ്രെഡി.തനി പഴയ കൊച്ചു മുതലാളി ലാലു അലക്സ്‌ അല്ലെങ്കില്‍ സത്താര്‍ (നായികയെ ബലാല്‍സംഗം ചെയ്യാന്‍ ശ്രമം നടത്തുന്നില്ല എന്നൊരു കുറവ് മാത്രമേ ഉള്ളു. അത് പിന്നെ ഫസ്റ്റ് കസിന്‍ പെങ്ങള്‍ ആയതു കൊണ്ടാവാം).കുറഞ്ഞ പക്ഷം വേലക്കാരിയെ എങ്കിലും ഉപദ്രവിക്കാന്‍ ശ്രമിക്കാത്തത് കൊണ്ട് എന്തോ ആ കഥാപാത്രത്തിന് ഒരു പൂര്‍ണത കൈവന്നില്ല.കൊച്ചിലെ ഒരു അഞ്ചോ ആറോ കൊല്ലം ഒരു കുട്ടി ഇന്ത്യയില്‍ വളര്‍ന്നു എന്ന് ആയ മലയാളി ആയിരുന്നു എന്നും പറഞ്ഞു കമീല എന്ന കഥാപാത്രത്തെ അടി മുടി മലയാളീകരിച്ചിരിക്കയാണ് സംവിധായകനും തിരകഥ കൃത്തും.രണ്ടാം പകുതി ആകുന്നതോടെ കഥാപാത്രങ്ങള്‍ക്കക്കും ഒപ്പം കഥയ്ക്കും ജെനുവിനിട്ടി പൂര്‍ണമായും നഷ്ട്ടപെടുന്നതോടെ ദുരന്തം പൂര്‍ത്തിയാകുന്നു . ഈ സ്പെയിന്‍ എന്നൊക്കെ പറയുന്നതിന് പകരം വല്ല ഉത്തര ഇന്ത്യയോ അന്ദ്രയോ മറ്റോ ആയിരുന്നേല്‍ ഇതിലും ഭേദം ആയേനെ.സിന്ദഗി മിലേ നാ ദുബാരഹ് പോലെയുള്ള ചിത്രങ്ങളില്‍ നന്നായി ചിത്രീകരിച്ച ടോമാട്ടിനോ ഫെസ്റ്റിവല്‍ ഒക്കെ ഈ സിനിമയില്‍ മഹാ ബോറായാണ് കാണിച്ചിരിക്കുന്നത്.(കാശില്ല എങ്കില്‍ ആ പണിക്കു പോകരുത് )

അല്ല അപ്പോള്‍ അഭിനയം ?

ഒന്ന് പോടെ എത്ര ഉഗ്രന്‍ കഥയും തിരകഥയും വെച്ച് എന്തോന്ന് അഭിനയിക്കാന്‍? എങ്കിലും ദോഷം പറയരുതല്ലോ ഒരു മാതിരി എല്ലാ നടീ നടന്മാരും (വിദേശ നായിക ഉള്‍പ്പെടെ ) അവര്‍ക്ക് കഴിയുന്നതിന്‍റെ പരമാവധി ശ്രമിച്ചിട്ടുണ്ട് . പക്ഷെ ചുവരില്ലാതെ എന്ത് ചിത്രം?

അങ്ങനെ ഒഴുക്കന്‍ മട്ടില്‍ പറഞ്ഞാല്‍ പറ്റില്ല. ദിലീപ് എങ്ങനെയുണ്ട് ? അത് പറഞ്ഞിട്ട് പോയാല്‍ മതി .

അനിയാ 2010 ല്‍ തനിക്കു ലഭിച്ച മുന്‍‌തൂക്കം 2011 ല്‍ ഒട്ടും പ്രയോജനപ്പെടുത്താന്‍ കഴിയാത്ത പോയ നടനാണ് ദിലീപ് . കുടുംബ പ്രേക്ഷകര്‍ക്കിടയില്‍ ഉള്ള അല്‍പ്പസ്വല്‍പ്പം സ്വീകാര്യത ഇങ്ങനത്തെ ചിത്രങ്ങളിലൂടെ നശിപ്പിക്കാതിരുന്നാല്‍ അദേഹത്തിന് കൊള്ളാം

അപ്പോള്‍ ചുരുക്കത്തില്‍ ...

പട്ടാളം,രസികന്‍,മുല്ല ഈ നിരയിലേക്ക് മറ്റൊരു ബോറന്‍ ചിത്രം കൂടി

Thursday, September 29, 2011

സ്നേഹവീട്

അനിയാ ഒന്ന് നിന്നേ ...?

അയ്യോ ഇതാര് അണ്ണനോ.കണ്ടിട്ട് മനസിലായില്ലല്ലോ.ഇതെന്തോന്ന് ജുബ്ബ,കണ്ണാടി, സഞ്ചി ഇയാള്‍ ആരു സര്‍വകലാശാലയിലെ മണിയന്‍ പിള്ള രാജുവോ ?

അനിയാ അവസാനം എനിക്ക് മനസിലായി ഈ ബൂലോകത്ത് ജീവിക്കണമെങ്കില്‍ ബുദ്ധിജീവി ആയാല്‍ മാത്രമേ പറ്റു എന്ന് . അത് കൊണ്ട് എന്ന് മുതല്‍ ഒരു ബുദ്ധിജീവി ആയിട്ടെ എന്നിക്ക് വിശ്രമം ഉള്ളു. ശ്രീ മോഹന്‍ലാലിന്‍റെ അടിവസ്ത്രങ്ങള്‍ അദേഹത്തിന്റെ സിനിമകളുടെ ചൂണ്ടു പലകകള്‍ അഥവാ വിഭാഗ ബിംബങ്ങള്‍ (അതാണ് ഈ ബുദ്ധി ജീവികളുടെ ഒരു വാക്ക്) ആകുന്നത്‌ എങ്ങനെ എന്നൊരു പഠനത്തില്‍ ആണ് ഇപ്പോള്‍

ഛീ അണ്ണന്‍ എന്താ ഇങ്ങനെ വൃത്തികെട് പറയുന്നേ.

അനിയാ സംഗതി സത്യമാ. ഇപ്പോള്‍ ഒരു മോഹന്‍ലാല്‍ ചിത്രത്തില്‍ അദേഹം മുണ്ടിനകത്തു ധരിക്കുന്ന നിക്കര്‍ (വരയുള്ളതായാല്‍ തികഞ്ഞു) പുറത്തു കാണത്തക്ക രീതിയില്‍ കൈലിയോ,മുണ്ടോ മടക്കി കുത്തി നില്‍ക്കുന്ന ചിത്രമാണ് പോസ്റ്റുകളില്‍ കാണിച്ചിരിക്കുന്നത് എന്നിരിക്കട്ടെ.കാണികളായ നമ്മളോട് അദേഹം പറയാന്‍ ശ്രമിക്കുന്നത് ഇതു നരസിംഹം മോഡല്‍ ചിത്രമാണ് അത് കാണാന്‍ (സഹിക്കാന്‍ എന്ന് പറഞ്ഞാല്‍ ഞ്ഞാന്‍ ദിലീപ്/പ്രിത്വിരാജ് ഫാനാകും) തയ്യാറാകാന്‍ ആണ് ആ പടത്തിലൂടെ ആഹ്വാനം ചെയ്യുന്നത്.എന്നാല്‍ പോസ്റ്ററില്‍ മോഹന്‍ലാല്‍ ഷര്‍ട്ടിന്‍റെ രണ്ടു ബട്ടണ്‍ തുറന്നിടുകയും അതിനകത്ത് കൂടി അദേഹം ധരിച്ചിരിക്കുന്ന ബനിയന്‍ ദൃശ്യം ആകുകയും ചെയ്യുന്നു എങ്കില്‍ ഉറപ്പിച്ചു കൊള്ളൂ സംഗതി കുടുംബ ചിത്രമാണ് എന്ന്.നിക്കറിനെ വന്നു വന്നു ജനത്തിന് ഭയങ്കര പേടിയായതിനാല്‍ അത് കണ്ടാല്‍ മിണ്ടാതിരിക്കയാണ് ബുദ്ധി.പക്ഷെ ബനിയന്‍ കണ്ടാല്‍ വിടരുത് കുസൃതിക്കാരനായ (?) പഴയ ലാലേട്ടനെ ദാണ്ടേ കളഞ്ഞു കിട്ടിയേ എന്ന് എന്നാര്‍ത്തു വിളിക്കുക എന്നതാണ് നമ്മുടെ കടമ .നമ്മുക്ക് നഷ്ട്ടമായി കൊണ്ടിരിക്കുന്ന കുടുംബബന്ധങ്ങളുടെ ഊഷ്മളതയുടെ ....... ആ ഒരു ലൈന്‍. മനസ്സിലായോ ?

മനസിലായി അണ്ണന്‍ സ്നേഹ വീട് കണ്ടു അല്ലെ? അപ്പോള്‍ പിന്നെ നാട്ടിന്‍പുറത്തെ നന്മകളുമായി എന്ന് കൂടി പറയാമായിരുന്നു.സത്യന്‍ അന്തിക്കാടല്ലിയോ സംവിധാനം?

അനിയാ ചൈന ടൌണ്‍ എന്ന പരിപൂര്‍ണ വിനോദചിത്രത്തിന് ശേഷം പെരുമ്പാവൂര്‍ സാര്‍ വീണ്ടും നിര്‍മ്മിച്ച്‌ നമ്മെ ധന്യര്‍ ആക്കുന്ന ചിത്രമാണ് സ്നേഹവീട്.ഇന്നത്തെ ചിന്താവിഷയം എന്ന മുഴുനീള ഉപദേശ ചിത്രത്തിന് ശേഷം കുടുംബ ചിത്രങ്ങളുടെ സ്ഥിരം സംവിധായകന്‍ സത്യന്‍ അന്തിക്കാടും ലാലും ഒരുമിക്കുന്ന ചിത്രം എന്നൊരു ദുഷ്പേരും ഈ ചിത്രത്തിനുണ്ട്. സംഗീതം ഇളയ രാജാ.അഭിനയിക്കുന്നവര്‍ മോഹന്‍ലാല്‍,ഷീല,പദ്മപ്രിയ,ചെമ്പില്‍ അശോകന്‍,ശശി കലിംഗ,ഇന്നസെന്‍റ്,കെ പി എസ് സി ലളിത , ബിജു മേനോന്‍,ലെന അങ്ങനെ പോകുന്നു താര നിര

അതൊക്കെ ഇരിക്കട്ടെ അണ്ണന്‍ കഥയെ പറ്റി ഒന്ന് പറയാമോ ?

അമ്മുകുട്ടിയമ്മ (ഷീല) എന്ന അമ്മയും അവരുടെ അജയന്‍ (മോഹന്‍ലാല്‍) ആണ് ഈ ചിത്രത്തിലെ പ്രധാന കഥാ പാത്രങ്ങള്‍.ചെന്നയിലും , മുബയിലും ഒക്കെ പണിയെടുത്തു അവിടെ നിന്ന് ഗള്‍ഫിലെത്തി അവിടെ നിന്നും കാശുകാരനായി മടങ്ങി , നാട്ടില്‍ കുറെ നെല്‍പ്പാടങ്ങള്‍,കമുക്,ചക്ക,വാഴ തുടങ്ങിയ കൃഷി ഒക്കെ നടത്തി (ചെയിച്ചു) സുഖിമാനായി ജീവിക്കുകയാണ് അജയന്‍.(ഇതൊക്കെ ചെയ്യുന്നവന് ഇന്നത്തെ കേരളത്തില്‍ ഇങ്ങനെ ജീവിക്കാന്‍ പറ്റുമോ എന്നാ ചോദ്യം കണ്ടിട്ടാകണം ഇരുമ്പ് പണിയായുധങ്ങള്‍ ഉണ്ടാക്കുന്ന ഒരു ചെറിയ യുണിറ്റ് വാങ്ങുന്നതായി കാണിക്കുന്നുണ്ട് (സത്യന്‍റെ ഒരു ബുദ്ധിയെ !!)) അയല്‍ക്കാര്‍ ചെത്തുകാരന്‍ ചെമ്പില്‍ അശോകനും ഭാര്യയും മകള്‍ പദ്മപ്രിയയും .കൊച്ചു പ്ലസ്‌ ടു കഴിഞ്ഞു മുഖത്ത് ഒരു കുട്ട പവ്ഡറും ഇട്ടു കുടുംബ ശ്രീ യുണിട്ടില്‍ സോപ്പ് ഉണ്ടാക്കുന്നു ( അല്ലാത്തപ്പോള്‍ പവ്ഡര്‍ കുറവാണു). ലാലേട്ടനെ വേണേല്‍ പ്രേമിക്കാം എന്നൊരു ലൈന്‍ . ഈ മൂക പ്രണയമേ ....അത് തന്നെ .മറ്റൊരു അയല്‍ക്കാരന്‍ കരിം കണ്ണന്‍ മത്തായി (ഇന്നസെന്‍റ്).മകള് (ലെന) അന്യജാതികാരന്‍ പോലീസ്കാരനോട് (ബിജു മേനോന്‍) ഒത്തു ഒളിച്ചോടി പോയതിന്‍റെ വിഷമം ഉള്ളിലൊതുക്കി ജീവിക്കുന്നു. പിന്നെ ബ്ലെസിയുടെ പ്രണയത്തിന്റെ കാര്യം പറഞ്ഞത് പോലെ ഈ സിനിമയില്‍ എല്ലാവര്ക്കും എല്ലാരോടും സ്നേഹമാണ് .അത് പിന്നെ ചിത്രം തന്നെ സ്നേഹ വിരുന്നാണല്ലോ!!!.(വല്ലതും പറഞ്ഞു പോയാല്‍ നീ നാട്ടിന്‍ പുറത്തു പോയി നോക്കെടാ അവിടെ സ്നേഹം ഇങ്ങനെ പതഞ്ഞു ഒഴുകുന്നത്‌ കാണാം എന്ന് പറയും)

ശരി ശരി കഥയെ പറ്റി എന്തെങ്കിലും .....

ഇങ്ങനെ ഇരിക്കുമ്പോള്‍ ഒരു ദിവസം ആ സ്നേഹ വീട്ടിലേക്കു കുറച്ചു കൂടി സ്നേഹവുമായി ഒരു പയ്യന്‍ കാര്‍ത്തിക് (രാഹുല്‍ പിള്ള) വരുന്നു.താന്‍ അജയന്റെ മകന്‍ ആണെന്ന് അവകാശപ്പെട്ടാണ് പയ്യന്‍ വരുന്നത്.തെളിവായി അജയന്‍റെ ചെറുപ്പകാലത്തെ ഫോട്ടോ പയ്യന്റെ കൈയിലുണ്ട്.അജയന്‍ കുറ്റം നിഷേധിക്കുന്നു.എങ്കിലും പയ്യനും തന്‍റെ മകനെ പോലെ ഇഡടലിയുടെ കൂടെ സാംബാര്‍ ആണ് ഇഷ്ട്ടം എന്നാ ഞെട്ടിപ്പിക്കുന്ന സത്യം മനസിലാക്കുന്ന അമ്മുകുട്ടിയമ്മ പയ്യനെ കൊച്ചു മകനായി സ്വീകരിക്കുന്നു.ആരോപണങ്ങള്‍ കേട്ട് മടുത്തു അജയന്‍ ഏതാണ്ട് ചിത്രം തീരാന്‍ കുറച്ചു സമയം കൂടെ ബാക്കിയുള്ളപ്പോള്‍ പയ്യന്‍റെ യാഥാര്‍ത്ഥ്യം മനസിലാക്കാന്‍ ചെന്നയ്ക്ക് തിരിക്കുന്നു (അത് വരെ കാണികള്‍ക്ക് സ്നേഹം പല രൂപത്തില്‍ ഒഴുകുന്നത്‌ കാണാം ) അവിടെ ചെന്ന് പഴയ സുഹൃത്തായ സെയ്ത് അലവിയെ (മമ്മുക്കോയ) കാണുമ്പോളാണ് ഈ പയ്യനെ കുറിച്ചുള്ള ഞെട്ടിക്കുന്ന സത്യങ്ങള്‍ അറിയുന്നത്.ഈ പയ്യന്‍റെ അമ്മ ഒരു എക്സ്ട്രാ നടി ആയിരുന്നു.കാര്‍ത്തിയുടെ അച്ഛന്‍ ആരെന്നു ആരോടും അവര്‍ പറഞ്ഞിട്ടില്ല . ഒറ്റയ്ക്ക് മകനെ വളര്‍ത്തിയ അവര്‍ ഒരു ദിവസം ഷൂട്ടിംഗ്ഗിനിടയില്‍ അപകടത്തില്‍ പെട്ട് മരിച്ചു.അരുമില്ലതായ കാര്‍ത്തി ആത്മഹത്യക്ക് തുനിഞ്ഞപ്പോള്‍ സെതലവി പയ്യനെ സമാധാനിപ്പിക്കാനായി ഇയാളാണ് നിന്‍റെ അച്ഛന്‍ എന്ന് പറഞ്ഞു അജയന്‍റെ പഴയ ഫോട്ടോയും സ്ഥലവും പറഞ്ഞു വിടുകയായിരുന്നു (സ്ഥലം പറഞ്ഞു എന്ന് പറയുന്നില്ല . അല്ലാതെ ഒരു പഴയ ബ്ലാക്ക്‌ ആന്‍ഡ്‌ white ഫോട്ടോയും പിടിച്ചു കേരളം അങ്ങോളം ഇങ്ങോളം അന്വേഷിച്ചാണ് പയ്യന്‍ ഇവിടെ എത്തിയത് എന്നാണോ ഉദേശിക്കുന്നത് എന്നറിയില്ല. എന്തായാലും നല്ല ബെസ്റ്റ് സുഹൃത്ത്‌ !!! എന്തായാലും സത്യന്‍റെ അയല്‍പക്കത്ത്‌ ഒന്നും ആരും അനാഥന്‍ ആയതിന്‍റെ പേരില്‍ ആത്മഹത്യ ചെയ്യാന്‍ ശ്രമിക്കാന്‍ ഇടയകാതിരിക്കട്ടെ ഇടയാല്‍ തന്നെ ശ്രീ സത്യന്‍ ആ വിവരം അറിയാതിരിക്കട്ടെ എന്നൊരു പ്രാര്‍ഥന മാത്രമേ എനിക്കുള്ളൂ !!! ) സത്യങ്ങള്‍ എല്ലാം അറിയുന്ന അജയന്‍ സെയ്തു അലവിയെയും കൂട്ടി നാട്ടില്‍ എത്തുകയും ക്ലൈമാക്സില്‍ ഇയാള്‍ പറഞ്ഞപ്പോളാണ് എനിക്ക് എല്ലാ സത്യവും മനസിലായത് വരൂ മകനെ എന്ന് പറഞ്ഞു പയ്യനെ മകനായി സ്വീകരിച്ചു അമ്മയും മകനും കൊച്ചു മകനും സ്നേഹവീടിന്‍റെ ഉമ്മറത്ത്‌ വന്നിരുന്നു ഗിത്താര്‍ വായിച്ചു ഗാനമേള നടത്തുന്നതോടെ ചിത്രം അവസാനിക്കുന്നു . ഡേ..... ഡേ എണീക്കെടെ.

സോറി അണ്ണാ. അപ്പോള്‍ നമ്മള്‍ എവിടെ ആയിരുന്നു? നാട്ടിന്‍ പുറം, കൃഷി , സ്നേഹം,പയ്യന്‍,....

അനിയാ,നിന്നെ ഞാന്‍ കുറ്റം പറയില്ല.കടുത്ത ആരാധകര്‍ക്ക് പോലും ഈ സംഗതി താങ്ങാന്‍ പാടാണ്.ഈ പാവം കൊച്ചു നിത്യ മേനോനെ ഒക്കെ വിലക്കുന്നതിനു പകരം അമ്മയോ,അച്ഛനോ,മക്ടയോ,ഉണ്ടയോ,ആരെങ്കിലും ഈ സത്യന്‍ അന്തിക്കാടിനെ തിരകഥ എഴുതുന്നതില്‍ നിന്നും ഒന്ന് വിലക്കിയിരുന്നെകില്‍ മലയാള സിനിമ അത്രയെങ്കിലും രക്ഷപ്പെട്ടേനെ.

അത്രക്ക് മോശമാണോ അണ്ണാ ?

നീ പോയി നേരില്‍ കണ്ടു നോക്ക്.എടേ തമിഴ്നാട്ടില്‍ ജീവിച്ചു പഠിച്ചു വളര്‍ന്നു പയ്യന്‍ . അവന്‍ പാടുന്ന പട്ടു കേള്‍ക്കണം . ജനനീ , ജന്മഭൂമീ എന്നാ ലൈനിലാണ് പാട്ട് പോകുന്നത്.പിന്നെ പടം സത്യന്‍ അന്തികാടിന്റെ ആയതു കൊണ്ടും നാട്ടിന്‍ പുറം ആയതു കൊണ്ടും മോഹന്‍ലാല്‍ ഈ ചിത്രത്തില്‍ ഒരു നാനോ ആണ് ഓടിക്കുന്നത്. നനോക്കാര്‍ക്ക് ഈ രംഗം പരസ്യത്തിനു ഉപയോഗിക്കാവുന്നതാണ്.(ഒരു രംഗത്ത് പോലും ശ്രീ ലാല്‍ ആ കാറില്‍ കയറുന്നതോ ഇറങ്ങുന്നതോ ആയി കാണിക്കുന്നില്ല എന്നത് ഇനി കാണുമ്പോള്‍ ശ്രദ്ധിക്കാവുന്നതാണ്).പിന്നെ ഇന്നത്തെ ചിന്ത വിഷയം എന്നാ ചിത്രത്തിലൂടെ പറയുന്ന ഒരു സത്യന്‍ വക ലോക തത്വം വീണ്ടും ഒരിക്കല്‍ കൂടി ഈ ചിത്രത്തില്‍ ആവര്‍ത്തിക്കുന്നു .(നിങ്ങളുടെ തലയില്‍ തേങ്ങ വീഴുകയോ പമ്പ് കടിക്കുകയോ മറ്റോ ചെയ്താലേ നിങ്ങളുടെ കുടുംബത്തില്‍ ഉണ്ടായ ഒരു പ്രശനം തീരു :പറഞ്ഞത് ഞാനല്ല ചിന്താ വിഷയം കണ്ടു ജയകൃഷ്ണന്‍ എഴുതിയതാണ് ).ഇവിടെ ബിജു മേനോനും ആയുള്ള മത്തായിയുടെ പ്രശ്നം തീര്‍ക്കാന്‍ ബിജു മേനോന്‍ -ലെന ദമ്പതികളുടെ കുട്ടികളെ സ്കൂള്‍ ബസ്‌ മറിഞ്ഞു ആശുപത്രിയില്‍ ആക്കുന്നുണ്ട്‌.

ഇടവേളക്കു തൊട്ടു മുന്‍പ് വരെ കാര്‍ത്തി എന്ന പയ്യനോട് തികഞ്ഞ വെറുപ്പ്‌ പ്രകടിപ്പിക്കുന്ന പദ്മപ്രിയ , ഇടവേള കൊണ്ട് നിര്‍ത്തുന്ന സമയത്ത് അജയന്‍റെ ജീപ്പില്‍ കയറി ഹൈറേഞ്ചിലുള്ള കൃഷി സ്ഥലത്തേക്ക് പോകുന്ന കര്‍ത്തിയെ കണ്ടു സന്തോഷവതിയായി ടാറ്റാ പറയുന്നതൊക്കെ എന്തിനാണാവോ ? ഇങ്ങനെ പറയാന്‍ തുടങ്ങിയാല്‍ ഒരു നൂറു പാളിച്ചകള്‍ ഈ അനുഭവ സമ്പന്നനായ സംവിധായകന്‍ പടച്ചു വിട്ട സൃഷ്ടിയില്‍ കാണാം.ഇങ്ങേര്‍ക്ക് തിരകഥക്കുള്ള സംസ്ഥാന അവാര്‍ഡ്‌ ഏതോ വര്ഷം കൊടുത്തപ്പോള്‍ തന്നെ എനിക്ക് തോന്നിയതാ ഇങ്ങേര്‍ ഇനി ഈ പണി സ്ഥിരമാക്കും എന്ന്.നമുക്കൊക്കെ ഇത്രയും കിട്ടിയാല്‍ പോരെടെ .

അത് സത്യം തന്നെ . അതിരിക്കട്ടെ അഭിനയം .. അതല്ലേ നമുക്ക് അറിയേണ്ടത് ?

അനിയാ ഈ നടി മീര ജാസ്മിന്‍ സത്യന്‍ ചിത്രങ്ങളില്‍ നിന്ന് പോയി തുടങ്ങിയപ്പോള്‍ സത്യത്തില്‍ എന്നിക്കൊരു ആശ്വാസം തോന്നിതുടങ്ങിയതായിരുന്നു . അച്ചുവിന്റെ അമ്മ ഒഴികെയുള്ള എല്ലാ സത്യന്‍ ചിത്രങ്ങളിലും അവരെ സഹിക്കാന്‍ എന്നിക്ക് പാടായിരുന്നു . പക്ഷെ പറഞ്ഞിട്ടെന്താ പിടിച്ചതിലും വലുതാ അളയില്‍ ഇരിക്കുന്നത് എന്ന അവസ്ഥയിലാണ് ഈ ചിത്രത്തിലെ ഷീലയുടെ അഭിനയം. പഴയ ബ്ലാക്ക്‌ ആന്‍ഡ്‌ വൈറ്റ് ചിത്രങ്ങളിലെ "കൊച്ചു മുതലാളി ളി ളി ളി .........ളി " ലൈന്‍ അഭിനയം ആണ് ഇപ്പോളും ആ നടി കാഴ്ച വൈക്കുന്നത് എന്നാണ് എന്നിക്ക് തോന്നിയിട്ടുള്ളത് . പിന്നെ ഉള്ളത് മഹാ നടനായ ലാലേട്ടന്‍.ദോഷം പറയരുതല്ലോ അദ്ദേഹം ഈ ചിത്രത്തില്‍ ഒന്ന് അഭിനയിക്കാന്‍ ആഞ്ഞു ശ്രമിക്കുന്നുണ്ട് .നല്ല കാലത്ത് അനായാസമായി ചെയ്തിരുന്ന സംഗതികള്‍ ഇന്നു പരമാവധി ശ്രമിച്ചിട്ട് പോലും നടക്കുന്നില്ല എന്നത് തികച്ചും ദുഖകരമാണ്. പൊതുവേ എല്ലാ ചിത്രങ്ങളിലും തടിയനായി തോന്നിക്കുന്ന ബിജു മേനോന്‍ ഈ ചിത്രത്തില്‍ ലാലിനൊപ്പം അഭിനയിക്കുമ്പോള്‍ വലിയ തടി തോന്നിക്കുന്നില്ല എന്നത് വേറൊരു സത്യം.ബാക്കി ആര്‍ക്കും പ്രത്യേകിച്ച് പുതിയതായി ഒന്നും ചെയ്യാനില്ല കാരണം മിക്ക സന്ദര്ഭാഗലും പല സത്യന്‍ ചിത്രങ്ങളും നമ്മള്‍ മുന്‍പ് കണ്ടിട്ടുള്ളത് തന്നെയാണ്.

ഈ ചിത്രം കണ്ടു കൊണ്ടിരുന്നപ്പോള്‍ ഏറ്റവും സഹതാപം തോന്നിയത് തീയറ്റെറില്‍ ഉണ്ടായിരുന്ന ശ്രീ മോഹന്‍ലാല്‍ ആരാധകര്‍ എന്നു തോന്നിപ്പിക്കുന്ന കുറെ ആള്‍ക്കാരോടാണ്. ലാലേട്ടന്‍ കുട്ടുകാരോട് വെടി പറയുമ്പോള്‍ പഴയ പട്ടാളക്കാര്‍ പറയുന്ന പോലെ തന്‍റെ സ്ത്രീ സംബന്ധമായ സാഹസങ്ങള്‍ വിവരിക്കുമ്പോള്‍ അതായിത് ഞാന്‍ ഇഷ്ട്ടം പോലെ സ്ത്രീകളെ അനുഭവിച്ചിട്ടുണ്ട് എന്നര്‍ഥം വരുന്ന ഡയലോഗുകള്‍ അടിക്കു ബോള്‍ ഈ സംഘം തകര്‍ത്തു കൈയടിക്കുന്നത് അവരുടെ ഗതികെടാനെന്നു ഞാന്‍ വിശ്വസിക്കുന്നു

അപ്പോള്‍ ചുരുക്കത്തില്‍ ....

സത്യന്‍ അന്തിക്കാട്‌ തോണ്ണൂര്കള്‍ക്ക് ശേഷം എടുത്ത ഏറ്റവും മോശം ചിത്രം എന്നു ഇതിനെ നിസംശയം പറയാം എന്നു ഞാന്‍ കരുതുന്നു . ഈ ചിത്രം ഇങ്ങനെ ആക്കിയതിന്റെ ഒന്നാം പ്രതി തീര്‍ച്ചയായും ഒരു വികല സൃഷ്ടിയും ആയി എത്തിയ ശ്രീ സത്യന്‍ തന്നെയാണ്.നന്ദിയുണ്ട് മാഷെ ഒരായിരം നന്ദി .മലയാളികള്‍ക്ക് കുറെ നല്ല സിനിമകള്‍ തന്ന ഒരു പഴയ നല്ല നടന്‍റെ പുക മുഴുവന്‍ കണ്ടേ നിര്‍ത്താവൂ.അല്ലെങ്കില്‍ തന്നെ അദ്ദേഹത്തിന് സ്വയം ഇല്ലാത്ത ആത്മാര്‍ത്ഥത വേറെ ആര്‍ക്കു ഉണ്ടായിട്ടു എന്ത് കാര്യം ?

Monday, September 12, 2011

ഡോക്ടര്‍ ലൗ

അണ്ണാ ഇതു വളരെ മോശമായിപ്പോയി

എന്തുവാടെ?

ഞാനിവിടെ എന്‍റെ ജീവിതത്തില്‍ ആദ്യമായി കഷ്ട്ടപെട്ടു പോയിരുന്നു ഒന്ന് രണ്ടു പടം കണ്ടു നിരൂപണം എഴുതിയിട്ട് അണ്ണന്‍ ഒന്നും പറയാത്തത് ....

നന്നായി അനിയാ അങ്ങനെ തന്നെ വേണം ഒന്നുമില്ലെങ്കില്‍ ഞാനൊക്കെ അനുഭവിക്കുന്ന ബുദ്ധിമുട്ട് നിനക്ക് മനസിലാകുമല്ലോ.

സംഗതി കുറച്ചു പാടുള്ള പണി തന്നെ.എങ്ങനെ ഇതൊക്കെ സാധിക്കുന്നു?

അനിയാ,ഇതു വല്ല നാട്ടിലും പോയി സായിപ്പിന്റെയോ അറബിയുടെയോ അടിവസ്ത്രം കഴുകി പണ്ട് കണ്ട പടത്തിന്‍റെ ഓര്‍മയില്‍ അഭിപ്രായം ഇറക്കുന്ന പോലെ അല്ല എന്ന് ഇപ്പോളെങ്കിലും മനസിലായല്ലോ അല്ലെ

അത് ശരി .പുതിയ പടം വല്ലതും കണ്ടായിരുന്നോ ? ഈ ഓണത്തിനിടയില്‍ വേറെ ജോലിയില്ലേ എനിക്ക് ?

ഇന്നലെ ഓണത്തിരക്കിനിടയില്‍ കണ്ട ചിത്രം ഡോക്ടര്‍ ലൗ.സംവിധാനം പുതു മുഖ (?) സംവിധായകന്‍ ബിജു അഭിനേതാക്കള്‍ കുഞ്ചാക്കോ ബോബന്‍,ഭാവന,അനന്യ,വിദ്യ ഉണ്ണി (ദിവ്യ ഉണ്ണിയുടെ സഹോദരി.പുതു മുഖം),ഇന്നസെന്റ്,മണിക്കുട്ടന്‍, നെടുമുടി തുടങ്ങിയവര്‍ .

അത് നന്നായി. ഇന്നു ഈ സംഗതി കൂടെ കൊണ്ട് കൊടുത്താല്‍ പിന്നെ കുറച്ചു ദിവസത്തേക്ക് മനസമാധാനം ആയി.ഈ പടത്തിന്‍റെ പോസ്റ്റര്‍ ഞാന്‍ ശ്രദ്ധിച്ചായിരുന്നു.മറ്റൊരു നിറം ആയി മലയാളിയെ ഇളക്കി മറിക്കുമോ ഈ ഡോക്ടര്‍ ലൗ?

അനിയാ പേരും പോസ്റ്ററും സൂചിപ്പിക്കുന്നത് പോലെ ഇതൊരു ക്യാമ്പസ്‌ ചുറ്റിപറ്റിയുള്ള കഥയാണ്.ഇങ്ങനത്തെ ഒരു തീം എടുക്കുമ്പോള്‍ കുറഞ്ഞ പക്ഷം ഒരു സംവിധായകന്‍/തിരകഥാകൃത്ത് എന്നിവര്‍ എന്താണ് ഇന്നത്തെ ക്യാമ്പസ്‌ ഇന്നു അറിഞ്ഞിരിക്കണം അഥവാ ഒരു പത്തോ പതിനഞ്ചോ കൊല്ലം മുന്‍പത്തെ ക്യാംപസ്സില്‍ നിന്ന് ഇന്നു വന്ന മാറ്റങ്ങള്‍ എന്തൊക്കെ ആണെന്ന് അറിയാനെങ്കിലും ശ്രമിക്കണം.ഈ ബിജുവിന് അറിയില്ലെങ്കില്‍ എനിക്ക് തോന്നുന്ന ഒന്ന് രണ്ടു കാര്യങ്ങള്‍ പറയാം .
ഈ മുകാനുരാഗം അഥവാ ഒരുത്തന്‍ കൂടെ പഠിക്കുന്ന പെണ്‍കുട്ടിയെ പ്രേമപൂര്‍വ്വം നോക്കുന്നു.കുറെ നാള്‍ നോക്കി കഴിയുമ്പോള്‍ പെങ്കൊച്ചു നാണിച്ചു മുഖം കുനിച്ചു കാലിന്‍റെ തള്ളവിരല്‍ കൊണ്ട് തറയില്‍ ജാവ എന്നെഴുതുന്ന പ്രേമം (പ്രയോഗം സ്വന്തമല്ല.ആരുടെതെന്ന് ഓര്‍മ്മ വരുന്നില്ല) കേരളത്തില്‍ അട്ടപ്പാടിയിലുള്ള കോളേജുകളില്‍ നിന്ന് പോലും പടി ഇറങ്ങി പോയിട്ട് കുറെയധികം കാലമായി എന്നാണ് എന്‍റെ വിശ്വാസം ഇങ്ങനെയുള്ള ഔട്ട്‌ dated എന്നു പറയാവുന്ന കുറെയധികം സംഗതികള്‍ കുത്തി നിറച്ചതാണ് ഈ ചിത്രത്തിലെ ക്യാമ്പസ്‌.വെസ്പ സ്കൂട്ടര്‍ ഓടിച്ചു വരുന്ന കോളേജ് വിദ്യാര്‍ഥി ഒക്കെ ഇന്നും ഈ ക്യാമ്പസില്‍ ഉണ്ട്.ഈ കോളേജിലെ ഏതൊരു ആഘോഷവും വിദ്യാര്‍ത്ഥികള്‍ക്ക് എന്ത് വേണേലും ഒരു ഓഡിറ്റോറിയത്തില്‍ വെച്ച് ചെയ്യാനുള്ള ഒരു വേദി മാത്രമാണ് അധ്യാപകന്‍ എന്ന ഒരു വര്‍ഗത്തെ അവിടെങ്ങും കാണില്ല.ഗുണ്ടകളെ ഇറക്കി നായികയെ പേടിപ്പിച്ചു ഇറക്കിയ നായകന്‍ തന്നെ അവളെ രക്ഷിക്കുന്നതായി അഭിനയിച്ചു പ്രേമം പിടിച്ചു പറ്റാന്‍ ശ്രമിക്കുന്നതൊക്കെ പഴയ ശ്രീനിവാസന്‍ പടങ്ങളില്‍ പോലും തമാശ ആയാണ് കാണിക്കാറുള്ളത്. ഈ ക്യാംപസ്സില്‍ അതും ഉണ്ട് .(തികഞ്ഞു !!).മലയാളികളുടെ കോളേജ് കഥകളിലെ ഒരു സ്ഥിരം ചേരുവയാണ് ആണുങ്ങളുടെ സ്വഭാവം ഉള്ള (അഥവാ ഉണ്ടെന്നു പറയപ്പെടുന്ന)നായികയും അവളെ മര്യാദ പഠിപ്പിക്കുന്ന നായകനും.ആണുങ്ങള്‍ ഒരു ഗ്രൂപ്പ്‌ ആയും പെണ്‍ പിള്ളേര്‍ മറ്റൊരു ഗ്രൂപ്പ്‌ ആയും നടക്കുകയും ഈ ഗ്രൂപ്പുകള്‍ എതിരെ പോകുമ്പോള്‍ ഇരു ഗ്രൂപ്പ്‌ അംഗങ്ങളില്‍ പലരും പരസ്പരം അര്‍ഥം വെച്ചുള്ള ഒളിഞ്ഞു നോട്ടവും ഒക്കെ ബിജു പഠിച്ചിരുന്നപ്പോള്‍ (പഠിച്ചിട്ടുണ്ടെങ്കില്‍)വരെ കോളേജില്‍ ഒക്കെ ഉണ്ടായിരുന്നു എന്നു കരുതാം.അദേഹത്തിന്റെ കണ്‍സപ്റ്റ് അനുസരിച്ച് കുറച്ചു ആധുനിക വേഷം (എന്ന് വെച്ചാല്‍ ജീന്‍സ് പോലുള്ളവ ) കയറ്റി സി ഡി ലാപ്പിലുണ്ട് (ലാപ്‌ടോപ്പ്) തുടങ്ങിയ വാചകങ്ങളും പറഞ്ഞാല്‍ നല്ല പൊളപ്പന്‍ ആധുനിക ക്യാമ്പസ്‌ ആയി .
ഇന്നത്തെ ക്യാമ്പസ്‌ പശ്ചാത്തലമാക്കി ഒരു സിനിമാക്കഥ ചിത്രീകരിക്കാനുള്ള ബുദ്ധിമുട്ട് കൊണ്ടാകണം ലാല്‍ ജോസിനെ പോലുള്ളവര്‍ കുറെ കൊല്ലങ്ങള്‍ക്ക് മുന്‍പുള്ള ഒരു കോളേജ് ക്യാമ്പസില്‍ നടക്കുന്ന കഥയായി ക്ലാസ്സ്‌ മേറ്റ്സ് എടുത്തത്‌.ഫലം മലയാളിയുടെ ഒടുക്കത്തെ നോസ്റ്റാല്‍ജിയയില്‍ കേറി പിടച്ച പടം ഓടിയ ഓട്ടം ചില്ലറയാണോ? ഇതൊന്നും മനസിലാക്കാത്തിടത് തുടങ്ങുന്നു ബിജു എന്ന സംവിധായകന്‍റെ ആദ്യ പരാജയം.ഇങ്ങനെ ഒക്കെയാണ് കോളേജ് എന്നതിനെ കുറിച്ചുള്ള ധാരണ എങ്കില്‍ വല്ല പോഷ് കോളനി യോ ഫ്ലാറ്റോ മറ്റോ പശ്ചാത്തലം ആക്കി ചില്ലറ മാറ്റങ്ങളോടെ എടുത്തിരുന്നെങ്കില്‍ ഇതിലും നന്നായേനെ

അണ്ണാ ചെറുതായി കാട്ടിലോട്ടു കേറിയോ എന്നൊരു സംശയം.കഥയെ പറ്റി കുറച്ചു ......

അനിയാ, വിനയചന്ദ്രന്‍ എന്നൊരു കഥാപാത്രത്തെയാണ് നായകനായ കുഞ്ചാക്കോ ബോബന്‍ അവതരിപ്പിക്കുന്നത് റോമയോക്കെ പല സിനിമയിലും അവതരിപ്പിച്ച കോളേജിലെ തന്‍ന്റെടി പെണ്‍ കൊച്ചു എബിന്‍ ആയി ഭാവന, കുടുംബത്തിനു വേണ്ടി (എന്ന് വെച്ചാല്‍ സദാ സമയവും മുട്ടും തിരുമ്മി പ്രാരാബ്ദം പറഞ്ഞിരിക്കുന്ന നെടുമുടി വേണുവിനു വേണ്ടി) അഹോരാത്രം കഷ്ട്ടപ്പെടുന്ന നാടന്‍ ശാലീന സെമി തന്റെടി പെണ്‍കുട്ടിയായി അനന്യ അഭിനയിക്കുന്നു.വിനയചന്ദ്രന്‍ എന്താണ് എന്ന് ചോദിച്ചാല്‍ എന്തുമാകാം എന്നതാണ് ഉത്തരം.പുസ്തക കച്ചവടം,പൈങ്കിളി സാഹിത്യം അങ്ങനെ കുറെ വേഷങ്ങളില്‍ കഥ തുടങ്ങുമ്പോള്‍ നമ്മള്‍ ഇയാളെ കാണുന്നു.പ്രേമിക്കുന്നവര്‍ ഇയാള്‍ക്ക് ഒരു ബലഹീനത ആണ്.(ഇക്കാലത്തെ തികച്ചും പ്രാക്റ്റിക്കല്‍ പ്രണയങ്ങള്‍ക്ക് ഒരു സഹായിയുടെ ആവശ്യമില്ല എന്നത് മറക്കാം) മേല്‍പ്പറഞ്ഞ കോളേജില്‍ ഒരു അധ്യാപകന് (ക്രോണിക് അവിവാഹിതന്‍)പ്രേമം ശരിയാക്കാന്‍ ആണ് വിനയന്‍ എത്തുന്നത്‌ .കോളേജ് കാന്‍റീന്‍ ജീവനക്കാരനായി ഇവിടെയെത്തുന്ന ഇയാള്‍ തുടക്കം തന്നെ സുധി എന്ന വായിനോക്കിയുടെ (അക്ഷരര്ധത്തില്‍ എടുത്താല്‍ മതി.വിനയന്‍ വരുന്നത് വരെ മഞ്ജു (വിദ്യ ഉണ്ണി) എന്ന പെണ്‍കുട്ടിയുടെ പുറകെ മണപ്പിച്ചു നടക്കലായിരുന്നു ഇങ്ങേരുടെ പണി ) പ്രണയം ശരിയാക്കി കൊടുക്കുന്നതോടെ വിനയന്‍ കോളേജില്‍ ഹിറ്റ്‌ ആകുന്നു.മറ്റൊരു മൂകപ്രണയെതാവായ റോയിയുടെ കേസ് ഏറ്റെടുത്തു കോളേജിലെ ഡെവിള്‍ എന്നറിയപ്പെടുന്ന എബിനുമായി റോയിയെ പ്രണയിപ്പിക്കാന്‍ ശ്രമിക്കുന്നതോടെ കഥ മറ്റൊരു വഴിത്തിരിവിലേക്ക് കടക്കുന്നു
അന്നോ ?
എന്ന് കരുതി അങ്ങനെ ഇങ്ങനെ ഒന്നും ഈ സംഭവം തീര്‍ന്നു എന്ന് കരുതരുത്. വിനയന്‍ എന്ന കഥാപാത്രത്തെ ചുറ്റി പറ്റി കുറെയധികം നിഗൂഡതകള്‍ ഉണ്ട് എന്നൊരു സൂചന ചിത്രത്തിലുടനീളം നല്‍കുന്നുണ്ട്. ഒടുവില്‍ അനിയാ,നീ ആ ഞെട്ടിപ്പിക്കുന്ന രഹസ്യം അറിയുമ്പോള്‍ തകര്‍ന്നു പോകും.ഈ വിനയചന്ദ്രന്‍ ഒരു അനാഥാലയത്തില്‍ വളര്‍ന്ന ആളാണ്. കുട്ടിക്കാലത്ത്, ഒരു കുടുംബം ഇയാളെ ദത്തെടുക്കാന്‍ വന്നപ്പോള്‍ സ്വന്തം കളികൂട്ടുകാരി ശ്രീകുട്ടിക്ക് വേണ്ടി മാറി കൊടുത്ത ത്യാഗിയാണ് ഇയാള്‍ !! വളര്‍ന്നു വലുതായിട്ടും തന്‍റെ കളികൂട്ടുകാരിക്ക് വേണ്ടിയുള്ള അന്വേഷണത്തിലാണ് ഇയാള്‍. എടേ കണ്ണ് തുടക്കെടെ . ഇങ്ങനെ കരഞ്ഞാലോ ?

ഇല്ല അണ്ണാ എന്നിക്ക് സങ്കടം സഹിക്കുന്നില്ല . പാവം വിനയന്‍ ഒടുവില്‍ അയാള്‍ ........

അടങ്ങേടെ ഒന്ന് പറഞ്ഞോട്ടെ.അവസാനം ആണ് വിനയന് ആ ഞെട്ടിപ്പിക്കുന്ന സത്യം അറിയുന്നത്. എബിന്‍ ആണ് അയാളുടെ പഴയ കളികൂട്ടുകാരിയായ ശ്രീകുട്ടി.ഒരു വശത്ത് റോയ് എന്ന സുഹൃത്തിനോടുള്ള സ്നേഹം മറുവശത്ത് വര്‍ഷങ്ങളായി തേടി നടന്ന കളികൂട്ടുകാരി.ഒടുവില്‍ ...

മതി അണ്ണാ ഇനി എനിക്ക് താങ്ങാനുള്ള ശക്തിയില്ല . ഇതിലും ഭേദം വല്ല സീരിയലും കാണുന്നതായിരിക്കും .

ഇത്രയും കൊണ്ട് നിനക്ക് തൃപ്തി ആയില്ലേല്‍ തൂലിക സുഹൃത്തിനു വേണ്ടി കോളേജ് പയ്യന്മാര്‍ (സുധി അടക്കം) ശ്രേയ എന്ന പെണ്‍കുട്ടിക്ക് കത്തെഴുതി ഒടുവില്‍ ശ്രേയംസ് കുമാര്‍ എന്ന് പറഞ്ഞു വരുന്ന സലിം കുമാറിന്‍റെ കഥാപാത്രം ഉണ്ട്. (തൂലികാ സൌഹൃതമേ!! ഇക്കാലത്ത് !!!! എന്‍റെ പോന്നു ബിജു !!! ഇയാള് വല്ല പ്രവാസിയും ആണോ? ഈ നാട്ടിലൊന്നും അല്ലെ ?)

അയ്യോ ....

അത് കൊണ്ടും പോരെങ്കില്‍ അനന്ന്യ അവതരിപ്പിക്കുന്ന കഥാപാത്ര ത്തിന്‍റെ ഒരിക്കലും കണ്ടിട്ടില്ലാത്ത ഒരു മുറചെറുക്കനും അവനെ വര്‍ഷങ്ങളായി ആരാധനയോടെ കാത്തിരിക്കുന്ന അനന്ന്യയും.ഏതാണ്ട് ചിത്രത്തിന്‍റെ മുക്കാല്‍ ഭാഗവും അനന്ന്യ,ചേട്ടന്‍ ഒന്ന് വന്നു കിട്ടിയെങ്കില്‍ പ്രേമിച്ചു മരിക്കാമായിരുന്നു എന്ന ലൈനിലാണ് .

അല്ല അണ്ണാ അപ്പോള്‍ അഭിനേതാക്കള്‍ ബോറാണെന്ന് ധൈര്യമായി കാച്ചട്ടോ?

പാവങ്ങള്‍, നായകന്‍ അടക്കം എല്ലാരും അവര്‍ അവരുടെ റോളുകള്‍ വൃത്തിയായി ചെയ്യാന്‍ പരമാവധി ശ്രമിച്ചിട്ടുണ്ട്.ഇങ്ങനത്തെ ഒരു തിരകഥയും സംവിധാനവും വെച്ച് എന്ത് കാണിക്കാനാ?പിന്നെ പറയുബോള്‍ എല്ലാം പറയണമല്ലോ . രാക്ഷസീ എന്ന നമ്മള്‍ ചിത്രത്തിലെ പാട്ടിനെ അനുകരിച്ചു എടുത്ത നന്നാവുല്ല എന്ന പാട്ടൊഴികെയുള്ള ഗാനങ്ങള്‍ നിലവാരം പുലര്‍ത്തി

അല്ല ഒരു പുതു മുഖ സംവിധായകന്‍ ആകുമ്പോള്‍ .....

അനിയാ ഒരു പുതുമുഖ സംവിധായന്‍ മലയാളത്തില്‍ നേരിടുന്ന ഏറ്റവും വലിയ പ്രശ്നം നല്ലൊരു നിര്‍മാതാവാണ് എന്നാണ് ഞാന്‍ കരുതുന്നത്.ഈ ചിത്രത്തില്‍ അങ്ങനെ ഒരു പ്രശ്നം നേരിട്ടിട്ടുണ്ടെന്ന് ആര്‍ക്കും തോന്നില്ല.ചിത്രത്തിന്റെ പോസ്റ്റ‍റുകള്‍ ,ചിത്രത്തില്‍ ഉടനീളം ഉള്ള richness, അഭിനേതാക്കളുടെ ആത്മാര്‍ത്ഥമായ ശ്രമം (പുതുമുഖം വിദ്യ ഉണ്ണി പോലും ഒരു പതര്‍ച്ചയും ഇല്ലാതെ അഭിനയിച്ചിട്ടുണ്ട്)എന്നിവയാണ് ഒരു പരിധി വരെയെങ്കിലും ചിത്രത്തിന്‍റെ നിലവാരമില്ലയിമ്മയെ മൂടി വെക്കാന്‍ സഹായിച്ചിട്ടുണ്ട്.

എന്നാലും ഇതു ഏതോ ഹോളിവൂഡ്‌ ചിത്രത്തിന്റെ അനുകരണം.ഏതാണ്ട് ഹിച്ചോ,എയര്‍ട്ടെല്ലോ .....?

അനിയാ സത്യമായും എനിക്കറിയില്ല.ഇങ്ങനെ ഒക്കെയാണ് സായിപ്പു പടം എടുക്കുന്നത് എന്ന് വിശ്വസിക്കാനും ബുദ്ധിമുട്ടാണ് . ഇനി അങ്ങനെ ആണെങ്കില്‍ ദൈവം സായിപ്പിനെ രക്ഷിക്കട്ടെ.എന്തായാലും ഈ വര്‍ഷത്തെ കൊമ്പ് കോര്‍ക്കല്‍ തികച്ചും ഗംഭീരം ആയി എന്ന് മാത്രമേ എനിക്ക് പറയാനുള്ളൂ.വേണമെങ്കില്‍ ഈ അങ്കത്തില്‍ ഏതു ചേകവര്‍ ആണ് ജയിച്ചത്‌ എന്ന് അറിയാന്‍ ബുദ്ധി ജീവികളായ പ്രബുദ്ധ മലയാളികള്‍ക്കിടയില്‍ നിനക്കൊക്കെ വേണേല്‍ ഒരു പോള്‍ നടത്താവുന്നതാണ്.

അപ്പോള്‍ ചുരുക്കത്തില്‍ ...

കഴിഞ്ഞ പോസ്റ്റില്‍ പറഞ്ഞ പോലെ കൂറപടങ്ങള്‍ നിര്‍വികാരമായി ഇരുന്നു കാണുന്ന ശീലം വളര്‍ന്നു വന്‍മരമായി നില്‍ക്കുന്ന മലയാളിയുടെ മനസില്‍ ഈ ചിത്രം കാണുമ്പോളും പ്രത്യേകിച്ചു ഒന്നും തോന്നാന്‍ പാടില്ലാത്തതാണ് . പക്ഷെ ഒരു മനുഷ്യന്‍ , ഒരേ ഒരു മനുഷ്യന്‍,അയാളുടെ വിവരക്കേട് മൂലം എത്ര പേരുടെ പ്രയത്നം പഴകുന്നു എന്നോര്‍ക്കുമ്പോള്‍ എവിടെയോ ഒരു വിഷമം പോലെ

Tuesday, August 30, 2011

തേജാഭായി ആന്‍ഡ്‌ ഫാമിലി

മലയാള സിനിമയുടെ മഹാ ആചാര്യന്‍ ശ്രീ പ്രിയദര്‍ശന്‍റെ വത്സല ശിഷ്യനും വിന്‍റ്റര്‍,ക്രേസി ഗോപാലന്‍ എന്നീ സിനിമകളുടെ സംവിധായകനുമായ ശ്രീ ദീപു കരുണാകരന്‍ അണിയിച്ചൊരുക്കുന്ന......

എന്തുവാടെ ഇതു മൈതന പ്രസംഗമോ? അതോ .....

അണ്ണാ പുതിയ പടം ഇറങ്ങിയത്‌ അറിഞ്ഞില്ലേ? നിങ്ങളെ പോലെ ആരെങ്കിലും ഒക്കെ കണ്ടു വന്നു അഭിപ്രായം പറഞ്ഞിട്ട് വേണം എന്നിക്ക് ചിത്ര വിദ്വേഷത്തില്‍ എഴുതി കാളകൂടം അന്തി പത്രത്തെ ഒരു വഴിക്കാക്കാന്‍ . അതിനു മുന്‍പ് ഒരു തുടക്കം എഴുതി വെച്ചാല്‍ പണി എളുപ്പമായില്ലേ ?

ആയെടാ ആയി ഇപ്പോള്‍ ഏതു സിനിമയെ പറ്റിയാ നിന്‍റെ കത്തിക്കല്‍ ?

അത് ഇതു വരെ മനസിലായില്ലേ? ഇന്നല്ലേ മലയാള സിനിമാ നിരൂപക ലോകം ആകാംഷയോടെ കാത്തിരുന്ന തേജാഭായി ആന്‍ഡ്‌ ഫാമിലി എന്ന ചിത്രം ഇറങ്ങുന്നെ? മോശം തന്നെ അണ്ണാ

എടാ ഞാന്‍ നിന്നെ പോലെ പടം കാണാതെ കണാ കുണ എന്ന് അവിടെയും,ഇവിടെയും,എവിടെയും തൊടാതെ അഭിപ്രായം പറയാറില്ല. പ്രസ്തുത ചിത്രം സര്‍വ ധൈര്യവും സംഭരിച്ചു ആണെങ്കിലും പോയി കണ്ടിട്ട് വരുന്ന വഴിയാണ് ഇതു.

പിന്നേ ... ഇതിനെന്തിന്നാ ഇത്ര ധൈര്യം? അണ്ണന്‍ അല്ലെങ്കിലേ പ്രിത്വിരാജ് ആരാധകന്‍ എന്നറിയപ്പെടുന്ന ആളാണല്ലോ?

അനിയാ പ്രിയന്‍ സാറിന്‍റെ മറ്റൊരു ശിഷ്യന്‍ ശ്രീ മുരളി നാഗവള്ളി അണിയിച്ചൊരുക്കിയ അലക്സാണ്ടര്‍ ദി ഗ്രേറ്റ്‌ എന്ന പടം ഇപ്പോളും ഒരു പേടി സ്വപ്നം ആയി എന്നെ വേട്ടയാടുകയാണ് .പോരാത്തതിനു ദീപു കരുണാകരനെ അദ്ദേഹത്തിന്‍റെ അവസാന ചിത്രത്തിന് ശേഷം പേടിക്കേണ്ട ഒരാളായാണ് ഞാന്‍ കാണുന്നത്.പോരാത്തതിനു ആക്ഷന്‍ വേഷങ്ങളില്‍ വരാറുള്ള പ്രിത്വിരാജ് അഭിനയിക്കുന്ന തമാശ ചിത്രം,കൂടെ അഭിനയിക്കുന്നത് സുരാജ് ,സലിം കുമാര്‍,ജഗദീഷ് തുടങ്ങിയവര്‍.പേടിക്കാന്‍ ഇതില്‍ കൂടുതല്‍ എന്ത് വേണം അനിയാ?

തികച്ചും ന്യായം . ഇതൊന്നും കണ്ടു പേടിക്കാത്ത ധൈര്യശാലികളെ പേടിപ്പിക്കാന്‍ പ്രിത്വിരാജ് പഴയ ജഗ്ഗു മോഡല്‍ വിഗ്ഗും ഒരു ഗിത്താറും പിടിച്ചു നില്‍ക്കുന്ന പോസ്റ്ററും നാട് നീളെ ഒട്ടിച്ചിട്ടുണ്ടല്ലോ. ഉയിര് പേടിയുള്ളവന്‍ പടത്തിനു കേറുമോ ? നിങ്ങളെ സമ്മതിക്കാതെ വയ്യ . അതിരിക്കട്ടെ ഈ ചിത്രത്തിന്റെ കഥ, മറ്റു വിവരങ്ങള്‍...

നേരത്തെ പറഞ്ഞല്ലോ സംവിധാനം ദീപു കരുണാകരന്‍.കഥയും തിരകഥയും അദേഹം തന്നെയാണ് .സംഗീതം ദീപക് ദേവ് അഭിനേതാക്കള്‍ നേരത്തെ പറഞ്ഞവര്‍ കൂടാതെ അഖില (കാര്യസ്തന്‍ ഫെയിം ),നെടുമുടി,ജഗതി,ഇന്ദ്രന്‍സ്,തലൈ വാസല്‍ വിജയ്‌ , കൊച്ചു പ്രേമന്‍,ബിന്ദു പണിക്കര്‍,മഞ്ജു പിള്ള മുതല്‍ ഒരു സീനില്‍ മാത്രം പ്രത്യക്ഷപ്പെടുന്ന ഷക്കീല പോലും ഉണ്ട് ഈ ചിത്രത്തില്‍.മലേഷ്യയിലും തിരുവനന്തപുരത്തും ആയാണ് ഈ ചിത്രം ചിത്രീകരിച്ചിരിക്കുന്നത്

ശരി ഇനി കഥ.....

കഥ തുടങ്ങുന്നത് മലേഷ്യയില്‍ ആണ്. അവിടുത്തെ അധോലോക രാജാവാണ് തേജാഭായ് എന്നറിയപ്പെടുന്ന റോഷന്‍ വര്‍മ (പ്രിത്വിരാജ്).കഥ തുടങ്ങുമ്പോള്‍ മലേഷ്യയിലെ വി ഗ്രൂപ്പ്‌ എന്ന വ്യവസായ ഗ്രൂപ്പിന്റെ സ്വത്തുക്കള്‍ കൈയ്യേറാന്‍ കര്‍ത്താ എന്ന മറ്റൊരു വ്യവസായിയെ (സുമന്‍) സഹായിക്കുന്ന തേജാഭായിയെയും സംഘത്തെയും ആണ് കാണിക്കുന്നത്, വി ഗ്രൂപ്പിന്റെ മുതലാളി ഗോപിനാഥ്നെ (അശോകനെ) വിരട്ടി ലക്‌ഷ്യം നേടുന്ന തേജാ,അവിടുത്തെ ഒരു സംഭവം ആണെന്ന് നമുക്ക് മനസിലാകുന്നു.(ഇതു നമ്മളെ മനസ്സിലാക്കി തരാനാണ് ആദ്യത്തെ പത്തു മിനിട്ട് ഉപയോഗിച്ചിരിക്കുന്നത്).ഇങ്ങനെ കഴിയുന്ന നായകന്‍ അവിടെ തന്നെയുള്ള ഒരു പെണ്‍കുട്ടിയില്‍ ആകൃഷ്ട്ടന്‍ ആകുന്നു.വേദിക (അഖില) എന്ന ഈ കുട്ടിയുടെ ഇഷ്ട്ടം പിടിച്ചു പറ്റാന്‍ ഇയാള്‍ തന്നെ കുറിച്ചുള്ള വിവരങ്ങള്‍ മറച്ചു വെച്ച് ഒരു സാധാരണക്കാരനായി അഭിനയിച്ചു അടുക്കുന്നു.അവളെ പോലെ സാമൂഹ്യ പ്രവര്‍ത്തനങ്ങളില്‍ തല്‍പ്പരന്‍ ആണെന്ന് നടിക്കുന്നു.എന്നാല്‍ സംഗതി വിവാഹത്തോട് അടുക്കുമ്പോള്‍ വേദികയുടെ അച്ഛന് കുടുംബ പാരമ്പര്യമുള്ള, യാതൊരു ക്രിമിനല്‍ പശ്ചാത്തലവും ഇല്ലാത്ത ഒരു കുടുംബത്തിലെക്കെ മകളെ വിവാഹം ചെയ്തു അയയ്ക്കു എന്ന വാശിയും പോരാത്തതിനു വേദികയുടെ അച്ഛന്‍ ദാമോദര്‍ ജി (തലൈവാസല്‍ വിജയ്‌) തന്‍റെ അധ്യാത്മിക ഗുരുവായ വശ്യവചസ് (സുരാജ്) പറയുന്നത് പോലെയേ എന്തും ചെയ്യുവത്രെ .വശ്യവചസിനെ പൊക്കുന്ന തേജാ ഭായ് അയാളെ വിരട്ടി കൂടെ നിര്‍ത്തുന്നു. അയാള്‍ വഴി വേദികയുടെ അച്ഛന് മുന്നില്‍ പ്രത്യക്ഷപ്പെടുന്ന തേജാ (റോഷന്‍ എന്ന പേരില്‍ ) വശ്യവചസും ഒത്തു നാട്ടില്‍ എത്തുകയും ഒരു കുടുംബം സെറ്റ് അപ്പ്‌ ചെയ്യുകയും ചെയ്യുന്നു (ജഗതി ,ബിന്ദു പണിക്കര്‍,ജഗദീഷ് ,മഞ്ജു പിള്ള,കൊച്ചു പ്രേമന്‍,കൊളപുള്ളി ലീല , സലിം കുമാര്‍ തുടങ്ങിയവര്‍ ) .അനാഥനായ തേജാഭായ് ,തട്ടി കൂട്ടി ഉണ്ടാക്കിയ ഈ കുടുംബത്തെ കാണിച്ചു വേദികയുടെയും അവളുടെ അച്ഛന്റെയും വിശ്വാസം അര്‍ജിക്കാനും വിവാഹം നടത്താനും നടത്തുന്ന ശ്രമങ്ങളിലൂടെയാണ് കഥ പുരോഗമിക്കുന്നത്.

ഓ അപ്പോള്‍ ഒരു പുതുമയും ഇല്ലാത്ത കഥ അല്ലെ ?

നൂറു ശതമാനം ശരി.സ്ലാപ്സ്റ്റിക്ക് കോമഡി എന്ന് പറയപ്പെടുന്ന,ക്രേസി ഗോപാലന്‍ എന്ന സിനിമയുടെ അതെ ഫോര്‍മാറ്റില്‍ ആണ് ഈ ചിത്രവും എടുത്തിരിക്കുന്നത്. ദീപു കരുണാകരന്‍ എന്ന സംവിധായകന്‍ തന്‍റെ ഗുരുവില്‍ (പ്രിയന്‍) നിന്നും വേണ്ടാത്തത് പലതും പഠിച്ചിട്ടുണ്ട് എന്നും വേണ്ടത് പലതും പഠിച്ചിട്ടില്ല എന്നും പറയേണ്ടി വരും.

മനസിലായില്ല ഒന്ന് വിശദമാക്കാമോ ?

അനിയാ,ജഗതി എന്ന നടനെ മലയാളത്തില്‍ വേണു നാഗവള്ളി കഴിഞ്ഞാല്‍ നന്നായി ഉപയോഗിച്ചിട്ടുള്ള സംവിധായകരില്‍ ഒരാളാണ് പ്രിയന്‍. ലാലിനോപ്പമോ ഒരു പക്ഷെ അതില്‍ കൂടുതലോ പ്രിയന്‍റെ പല ടോം ആന്‍ഡ്‌ ജെറി / ഫലിത ബിന്ദു ചിത്രങ്ങളെ ജനപ്രിയം ആക്കുന്നതില്‍ ജഗതി വഹിച്ച പങ്കു ദീപു മനസിക്കിയിട്ടില്ല എന്നതിന് തെളിവാണ് ക്രേസി ഗോപാലന്‍ എന്ന ചിത്രം പോലെ ഇതിലും ജഗതി ഉപയോഗിക്കപ്പെടാതെ പോകുന്നത് . എന്നാല്‍ പ്രിയന്‍ ചിത്രങ്ങളിലെ കൂട്ടയടിയെ ഓര്‍മിപ്പിക്കുന്ന ഒരു രംഗം ഈ ചിത്രത്തിലും ഉണ്ട് (എല്ലാ കഥാപാത്രങ്ങളും പങ്കെടുക്കുന്നില്ല ഭാഗ്യം !!) വെട്ടം എന്ന ചിത്രത്തില്‍ പോലും ഇങ്ങനത്തെ രംഗങ്ങള്‍ ജനത്തിന് മടുത്തു എന്ന് തെളിഞ്ഞതാണ് (ഇനി അറബി ഒട്ടകത്തില്‍ ഇതു വീണ്ടും കാണേണ്ടി വരുമോ ആവൊ ??) . ഈ ചിത്രത്തിലെ ജഗതി,ജഗദീഷ്,ചാലി പാല ഇങ്ങനെ കുറെ പേര്‍ പങ്കെടുക്കുന്ന രംഗം തീയറ്റര്‍ ഉടമകള്‍ എങ്കിലും മുറിച്ചു മാറ്റും എന്നാശിക്കാം.പോരാത്തതിനു പ്രിയന്‍ ചിത്രങ്ങളെ പോലെ തന്നെ വേണമെങ്കില്‍ നിരവധി ചോദ്യങ്ങള്‍ ചോദിക്കാവുന്ന പഴുതുകള്‍ ഉള്ള ഒരു തിരകഥയാണ് തയാറാക്കിയിരിക്കുന്നത് .(മകളെ കല്യാണം കഴിക്കുന്ന പയ്യന്‍റെ കുടുംബ പാരമ്പര്യത്തെ കുറിച്ച് പോലും തല നാരിഴ കീറി നോക്കുന്ന അച്ഛന്‍ മകളെ കല്യാണത്തിന് മുന്‍പ് അമ്മാവന്റെ കൂടെയാണെങ്കിലും കാമുകന്‍റെ വീട്ടില്‍ പോയി താമസിക്കാന്‍ വിടുമോ എന്ന ചോദ്യം പോലെ) പക്ഷെ ഈ ചിത്രത്തില്‍ സുരാജും സലിം കുമാറും ഒക്കെ സഹിക്കാവുന്ന വിധത്തിലാണ് എന്നതാണ് നല്ലൊരു കാര്യം.(സുരാജിന്‍റെ ചില തമാശകളും സലിം കുമാര്‍ മഹാഭാരതം കഥ വെച്ച് നായകന്‍റെ കുടുംബ ചരിത്രം പറയുന്നതും പോലുള്ള പല രംഗങ്ങളും ഒക്കെ തെറ്റില്ലാതെ ചെയ്തിട്ടുണ്ട് എന്നാണ് എന്‍റെ അഭിപ്രായം).നായിക അഖില നന്നാകാന്‍ കുറച്ചു അധികം മുന്നോട്ടു പോകേണ്ടി ഇരിക്കുന്നു (ശരത് ആയിരുന്നെങ്കില്‍ 'സംഗതികള്‍' കുറച്ചു കൂടി മുഖത്ത് വരുത്താന്‍ ശ്രമിക്കണം എന്ന് പറയാം).ബാക്കി തമാശക്കാരെല്ലാം (ചെറിയൊരു രംഗത്ത് വരുന്ന ഭീമന്‍ രഘു ഉള്‍പ്പെടെ ) നമ്മെ ചിരിപ്പിക്കാന്‍ മരിച്ചു ശ്രമിക്കുന്നു.ഇടവേളക്കു തൊട്ടു മുന്‍പ് വരുന്ന നെടുമുടി വേണുവും പ്രേമയും കഥ വേറൊരു വഴിക്ക് കൊണ്ട് പോകും എന്ന് കരുതി എങ്കിലും ഭാഗ്യവശാല്‍ അങ്ങനെ ഉണ്ടായില്ല (സംവിധായകന്‍റെ ഔചിത്യത്തിനു നന്ദി )


അതൊക്കെ അവിടെ ഇരിക്കട്ടെ പ്രധാന കാര്യം പറഞ്ഞിലല്ലോ ? നായകന്‍ ..? പ്രിത്വിരാജ് ..കഥ പത്രം അയാളുടെ ഉള്ളില്‍ കിടന്നു നടത്തുന്ന വീര്‍പ്പു മുട്ടല്‍ , ഗ്യാസ് ട്രബിള്‍, പുളിച്ചു തികട്ടല്‍.. ഇവയോക്കെയോ?

അനിയാ പ്രിഥ്വിരാജ് എന്ന നടന്‍ തന്‍റെ റോള്‍ ഭംഗിയായി ചെയ്തു എന്ന് തന്നെയാണ് എന്‍റെ അഭിപ്രായം. ഒരു മധുര കിനാവിന്‍ ... എന്ന പഴയ ഗാനം റീ മിക്സ്‌ ചെയ്തിരിക്കുന്നതില്‍ പോലും പ്രിത്വിരാജ് നന്നായിട്ടുണ്ട് എന്ന് എടുത്തു പറയേണ്ടി ഇരിക്കുന്നു (പോസ്റ്റിലെ ജഗ്ഗു വിഗ്, ഗിത്താര്‍ രംഗം). വൃത്തികേടായി എന്ന് പറയാവുന്ന ഒരു രംഗം പോലും ആ നടന്‍ ഈ ചിത്രത്തില്‍ ചെയ്തിട്ടില്ല എന്ന് പറഞ്ഞാല്‍ നീ ഞെട്ടുമോ ?

മം പിന്നേ... അണ്ണന്‍ ഇതല്ലേ പറയു . ചുമ്മാതാണോ ഇയാളെ പ്രിഥ്വിരാജ് ആരാധകനായി മുദ്രകുത്തുന്നത് ?

അനിയാ അതവിടെ നില്‍ക്കട്ടെ . സത്യസന്ധമായി പറഞ്ഞാല്‍.മമ്മൂട്ടി ഡാന്‍സ് ഡാന്‍സ് (മിഥുന്‍ ചക്രവര്‍ത്തി അഭിനയിച്ച പഴയ ഹിറ്റ്‌ ചിത്രം ) പോലൊരു ചിത്രത്തില്‍ അഭിനയിക്കുന്നതിലും,ദിലീപ്/ ജയറാം ഒരു ആക്ഷന്‍ ചിത്രത്തില്‍ അഭിനയിക്കുന്നതിലും.മോഹന്‍ലാല്‍ ഒരു സാധാരണക്കാരനായി അഭിനയിക്കുന്നതിലും (പഴയ കഥയല്ല ഇന്നത്തെ കാര്യം ആണ് പറഞ്ഞത് ) സുരേഷ് ഗോപി ഒരു കുടുംബ കഥയില്‍ അഭിനയിക്കുന്നതിലും നന്നായി പ്രിത്വിരാജ് ഈ ചിത്രത്തില്‍ അഭിനയിച്ചിട്ടുണ്ട് എന്ന് നിസംശയം പറയാം .

ഒന്നും മനസിലായില്ല വ്യക്തമാക്കണം .

ഇത്രേ ഉള്ളെടെ. ഒരു നടന് പറ്റില്ല എന്ന് പൊതുവേ വിശ്വാസമുള്ള ഒരു വിഭാഗത്തില്‍ പെട്ട പടം ചെയ്യുന്ന കാര്യമാണ് പറഞ്ഞത് .മേല്‍ പറഞ്ഞ മേഖലകളില്‍ കഴിഞ്ഞ കുറച്ചു നാളായി മറ്റു നടന്‍മാര്‍ നടത്തിയ പാഴ് ശ്രമങ്ങളെകാളും വിജയിച്ചു പ്രിഥ്വിരാജിന്‍റെ ഈ ശ്രമം എന്നാണ് എന്നിക്ക് തോന്നിയത് .

അപ്പോള്‍ ചുരുക്കത്തില്‍ ....

ഇന്നത്തെ നിലവാരം വെച്ച്, സ്ലാപ്സ്റ്റിക്ക് കോമഡി വിഭാഗത്തില്‍ പെടുന്ന എന്നാല്‍ സീനിയേര്‍സ് , ത്രീ കിങ്ങ്സ് എന്നിവയെ പോലെ അശ്ലീലവും , ബാലരമ തമാശകളും അധികം ഇല്ലാത്ത കണ്ടിരിക്കാവുന്ന ഒരു പടം . ഇത്രയും പോരെഡേ .

മതിയണ്ണാ .ധാരാളം .അല്ലെങ്കില്‍ തന്നെ പടത്തിന്‍റെ പോസ്റ്റര്‍ പോലും നേരെ കാണാതെ , വല്ലവനും ഒക്കെ കഷട്പ്പെട്ടു പടം കണ്ടിട്ട് എഴുതിയത് അപ്പാടെ പൊക്കി വക്കും മൂലയും ചുരണ്ടി പൈയിന്റ്റ് മാറ്റി നിരൂപണം എഴുതുന്ന കൂതറകള്‍ ഉള്ള ഈ നാട്ടില്‍ , അണ്ണന്‍ എനിക്ക് തരുന്ന എക്സ്ക്ലൂസിവുകള്‍ വെച്ചു ഞാന്‍ അലക്കി പൊളിച്ച് അലറില്ലേ ?

നന്നായി വാ . എന്നാ വേഗം .ചെല്ല്