ദൃശ്യം (അവസാനം ....കുടുംബ ത്രില്ലറും കണ്ടു ...)

കിട്ടി കിട്ടി തിരിച്ചു കിട്ടി .......

എന്തുവാടെ ഇതു മുദ്രാവാക്യമോ ?

അല്ല അണ്ണാ ആനന്ദ പുളകിതനായ എന്നെ കണ്ടിട്ട് അണ്ണന് ഒന്നും തോന്നുന്നില്ലേ ? അണ്ണൻ ഇതെന്തോന്ന് ഉപരോധ സമരത്തിന്റെ പ്രതികരണം കണ്ട പാർട്ടി നേതാവിനെ പോലെ നില്ക്കുന്നെ ?

നീ കത്തിക്കേറാതെ കാര്യം പറയെടെ?

അറിഞ്ഞില്ലേ മലയാള സിനിമയ്ക്ക്  അഥവാ മലയാള സിനിമയുടെ പ്രേക്ഷകർക്ക്‌ അന്യമായി കൊണ്ടിരുന്ന ലാലേട്ടൻ ഇതാ ഒരു പച്ച മനുഷ്യനായി അഭിനയിച്ചു നമ്മെ അനുഗ്രഹിച്ചിരിക്കുന്നു ജിത്തു ജോസഫ്‌ ഒരുക്കിയ ദൃശ്യം എന്നാ ചിത്രത്തിലൂടെയാണ്  അസൂയാവഹമായ ഈ നേട്ടം അദ്ദേഹം കൈവരിച്ചത് . സന്തോഷിക്കാതെ പിന്നെ എന്ത് ചെയ്യും ? മലയാള സിനിമയുടെ സുകൃതം ... അത്ര തന്നെ

അനിയാ നീ പടം കണ്ടോ ?

എന്തിനു കാണണം ? ഈ പോസ്റ്റർ തന്നെ കണ്ടാൽ  പോരെ ? ലാലേട്ടൻ , ലുങ്കി , സൈക്കിൾ , നാട്ടിൻ പുറം , എക്സ്പയറി  ഡേറ്റ് കഴിയാറായ നായിക , കുട്ടികൾ  ഹോ  ഈ കുടുംബ ചിത്രം  കുടുംബ പ്രേക്ഷകർക്ക്‌ ഒരു വിരുന്നാകും ഉറപ്പല്ലേ?പോരാത്തതിനു സംഗതി മലയാളി ഇതു വരെ കണ്ടിട്ടില്ലാത്ത കുടുംബ ത്രില്ലർ .ആന്റണി പേരുബാവൂരിന്റെ നിർമ്മാണ മികവും സുജിത് വാസുദേവന്റെ ക്യാമറയും അനിൽ ജോണ്‍സണ്‍ വിനു തോമസ്‌  ഒരുക്കുന്ന സംഗീതവും  പിന്നെ ജിത്തു ജോസഫ്‌ കഥയും സംവിധാനവും പിന്നെ താര നിര എന്ന് വെച്ചാൽ ലാലേട്ടൻ (പച്ച), മീന  , കലഭാവാൻ ഷാജോണ്‍ , സിദ്ദിഖ് , കുഞ്ചൻ, ആശ ശരത് ,ശ്രീകുമാർ , തുടങ്ങിയവർ .സകല ഓണ്‍ ലൈൻ സംഗതികളും മസ്റ്റ്‌ വാച്ച് സ്ഥാനമാണ് ഈ ചിത്രത്തിന്  നല്കിയിട്ടുള്ളത് എന്ന് കൂടി പറഞ്ഞു കൊള്ളട്ടെ . ഇനി അണ്ണന്റെ അഭിപ്രായം കൂടി ....

എന്നാൽ ഞാനൊന്നു പറഞ്ഞോട്ടെ ഈ ചിത്രം കാണാൻ ഭാഗ്യം ലഭിച്ച ഒരാളാണ് ഞാൻ . സത്യത്തിൽ പേടിച്ചു പേടിച്ചു ആണ് ഞാൻ ആ വഴിക്ക് പോയത് തന്നെ . മറ്റേ താരം പച്ച മനുഷ്യനായി അഭിനയിച്ച  ചിത്രം കണ്ടതിന്റെ ക്ഷീണം ഇതു വരെ മാറിയില്ല എന്നത് ആദ്യത്തെ പ്രശ്നം  . ഈ താരം കുറെ കാലമായി ഇറക്കി വിടുന്ന പടപ്പുകൾ കണ്ട ക്ഷീണം മറുവശത്ത് , ഇദ്ദേഹത്തിന്റെ തന്നെ ബാലേട്ടൻ മുതൽ മാബഴക്കാലം വരെയുള്ള കുടുംബ പടപ്പുകൾ വേറൊരു വഴിക്ക്

എന്നിട്ട് .. മടിക്കാതെ പറയണം ഈ ബൂലോകം മൊത്തം യുണി വെഴ്സൽസ്റ്റാർന്റെ ചിത്രത്തെ യുണിവെഴ്സൽ ബ്ലോഗ്ഗർ ആയ അണ്ണൻ എങ്ങനെ വിലയിരുത്തും എന്നറിയാൻ കാത്തിരിക്കുന്നു

അടങ്ങനിയാ ആദ്യം ചിത്രത്തിന്റെ കഥയെ പറ്റി.ഒരു മലയോര ഗ്രാമത്തിൽ ഒരു സാധാരണക്കാരനായ ജോർജ് കുട്ടി ഭാര്യ റാണിയും (മീന)  രണ്ടു പെണ്‍കുട്ടികളും അടങ്ങുന്ന കുടുംബം നാലാം ക്ലാസ്സ്‌ വരെ പഠിച്ച അനാഥനായ ഇയാൾ സ്വപ്രയത്നം കൊണ്ട് എന്ന് സാമാന്യം മെച്ചപ്പെട്ട നിലയിലാണ് ഇന്നു.റാണി കേബിൾ വിഷൻ എന്ന ആ ഗ്രാമത്തിലെ കേബിൾ ടിവി ഇയാളുടെ ആണ് . ആ ഗ്രാമത്തിലെ പോലീസ് കോണ്‍ സ്റ്റ ബിളും അഴിമതിക്കാരനും ആയ സഹദേവനും (കലാഭവൻ ഷാജോണ്‍) ആയി  ഇയാൾ ഉടക്കിൽ ആണെന്നത് ഒഴിച്ചാൽ ഇയാൾ നാട്ടുകാരുടെ കണ്ണിലുണ്ണി  ആണ്  (അല്ലാതെ പിന്നെ !!) . പത്താം  ക്ലാസ്സ്‌ വരെ പഠിച്ച റാണി (മീന ) ആണ് ഇയാളുടെ ഭാര്യ .പ്ലസ്‌ ടു വിദ്യാർഥിനി അഞ്ജുവും (അൻസിബ) എട്ടാം  ക്ലാസ്സിൽ പഠിക്കുന്ന  അനുവും (എസ്തേർ ) മക്കൾ . ശാന്തമായി ഒഴുകുന്ന ഇവരുടെ ജീവിതം മാറി മറിയുന്നത് ഒരു ക്യാമ്പിൽ വെച്ച് ഒളിച്ചു ചിത്രീകരിച്ച കുളി സീൻ ക്ലിപ്പ്മായി  ഐ ജി (ആശ ശരത് ) യുടെ മകൻ വരുണ്‍ (റോഷൻ) അഞ്ജുവിനെ ബ്ലാക്ക്‌ മെയിൽ ചെയ്തു വശംവദ ആക്കാൻ ശ്രമിക്കുന്നതോടെയാണ് .ജോർജ് കുട്ടി ഇല്ലാത്ത സമയത്ത്  (തികഞ്ഞ സിനിമ പ്രേമി ആയ ഇയാൾ രാത്രി ഇടക്കൊക്കെ പാതിരാ പടം കണ്ടു മൂഡ്‌ ആയാൽ മാത്രമേ രാത്രി വീട്ടില് വരാറുള്ളൂ !!!! അല്ലെങ്കിൽ ഓഫീസിൽ ഇരുന്നു സിനിമ കണ്ടു രസിക്കുമത്രെ !!) ഒരു രാത്രി, നേരത്തെ പറഞ്ഞതനുസരിച്ച്  വീട്ടില് എത്തുന്ന വരുണ്‍, അവസാന നിമിഷം മകളിൽ നിന്നും വിവരം അറിഞ്ഞു രംഗത്തെത്തുന്ന റാണിയുമായി വില പേശലിൽ ഏർപ്പെടുന്നു. അവസാനം മകൾ ഇല്ലങ്കിൽ അമ്മ മതി എന്ന നിലയിൽ നിൽക്കുമ്പോൾ  അഞ്ജു വരുണിന്റെ തലക്കടിക്കുന്നു .വരുണ്‍ തട്ടി പോകുന്നു.അപ്പോൾ തന്നെ റാണിയും അഞ്ജുവും ചേർന്ന് വരുണിന്റെ ശവം പറമ്പിൽ കുഴിച്ചിടുന്നു  .തന്റെ കുടുംബത്തെ ഈ കൊലപാതക കുറ്റത്തിൽ നിന്ന് രക്ഷിക്കാനായി ജോർജ് കുട്ടി നടത്തുന്ന ശ്രമങ്ങളിൽ കൂടിയാണ് രണ്ടാം പകുതി ഒരു ത്രില്ലർ ആയി നീങ്ങുന്നത്‌ .

അല്ല അപ്പൊ പടം .....

അനിയാ ആദ്യമേ ഒന്ന് പറഞ്ഞു കൊള്ളട്ടെ . ഈ വർഷം ഇറങ്ങിയ മോഹൻലാൽ ചിത്രങ്ങളിൽ ഏറ്റവും മികച്ചത്  ഈ ചിത്രമാണ്  ( മറ്റു സാധനങ്ങളെ പറ്റി ഒർമ്മിപ്പിക്കല്ലെ പ്ലീസ് !!!!) ഒരു പക്ഷെ ഈ വർഷത്തെ മികച്ച പത്തു ചിത്രങ്ങൾ എടുത്താൽ അതിന്റെ രണ്ടാം പകുതിയുടെ രണ്ടാം പകുതിയിൽ  ഈ ചിത്രവും ഉൾപ്പെട്ടേക്കാം.ഇത്തരം ഒരു തീം പ്ലാൻ ചെയ്യുമ്പോൾ അഥവാ എങ്ങനെ ഒരു പ്രേമയം അടിസ്ഥാനമാക്കി ചെയ്ത ചിത്രം കാണുമ്പോൾ ഓർമ്മ വരുന്നത്  രാം ഗോപാൽ വർമ്മ ക്യാമ്പിൽ നിന്ന് പുറത്തു വന്ന My  Wife 's Murder  എന്ന ചിത്രമാണ് .ഈ ചിത്രത്തിലും നായകന്റെ കൈയിൽ  നിന്നും അബദ്ധത്തിൽ സംഭവിക്കുന്ന ഒരു കൊലപാതകം (സാദാ സമയവും ശല്യപ്പെടുത്തുന്ന ഭാര്യയാണ് കൊല്ലപ്പെടുന്നത് എന്നു മാത്രം ) , അത് മറക്കാനുള്ള അയാളുടെ ശ്രമങ്ങൾ അതിൽ അയാള്ക്ക് പറ്റുന്ന പിഴവുകൾ , പയ്യെ പയ്യെ അയാളിലേക്ക് നടന്നെത്തുന്ന  പോലീസ്  ഈ ഒരു മോഡിൽ കഥ പോകുമ്പോൾ ആണ് ത്രില്ലർ എന്ന വിശേഷണത്തിന് കൂടുതൽ അർഹമാകുന്നതു അഥവാ കാണികളെ ത്രിൽ അടിപ്പിക്കുന്നത്  എന്നു ഞാൻ കരുതുന്നു


അല്ല അണ്ണാ എല്ലാ പടവും ഒരു പോലെ എടുക്കാൻ പറ്റുമോ ?

ഇല്ല അങ്ങനെ വേണം എന്നര് പറഞ്ഞു ? ഇവിടെ ഉദാഹരണമായി കൊല്ലപെട്ടത്‌ നൂറു തരികിടകൾ ഉള്ള പയ്യൻ (അങ്ങനെ ഉണ്ടെന്നു പറയുന്നില്ല എങ്കിലും  ഒരു കൊച്ചിന്റെ വീട്ടില് കയറിച്ചെന്നു അവൾ അല്ലെങ്കിൽ അവളുടെ അമ്മയായാലും മതി എന്നു കൂൾ ആയി പറയുന്നവാൻ ജീവിതത്തിൽ ആദ്യമായി  കുറ്റം ചെയുന്നവൻ ആകാൻ ഒരു വഴിയും ഇല്ല ) കൊല്ലപെട്ടാൽ അന്വേഷണം വഴി തിരിഞ്ഞു പോകാൻ ഒത്തിരി സാദ്ധ്യതകൾ ഉണ്ട് . എന്നാൽ ഇവിടെ അന്വേഷണം നൂല് പിടിച്ച പോലെ പോകുന്നത് ലാലേട്ടനും കുടുംബത്തിനും നേരെ . അതിനു ആകെ ഉള്ള കാരണം നായകനോട് വ്യക്തമായ വൈരാഗ്യം ഉള്ള സഹദേവൻ എന്ന പോലീസുകാരന്റെ ഒരു മഞ്ഞ കാറിൽ ഇയാൾ പോകുന്നത് കണ്ടു എന്ന മൊഴി (അതേ വഴിയിൽ ഒരാൾക്ക്‌ അതേ നിറത്തിൽ   ഉള്ള കാർ ഉണ്ട് എന്നും പറയുന്നുണ്ട് ). എങ്ങനെ ഉള്ള നിരവധി കാര്യങ്ങൾ ഉള്ളപ്പോൾ സംശയിക്കുന്നവരിൽ ഒരാൾ എങ്കിലും ആക്കാതെ ഇയാൾ തന്നെ പ്രതി എന്ന ഒരു ലൈൻ ആ സിനിമയുടെ ത്രില്ലിംഗ്  ആക്കുന്നതിൽ പരാജയപ്പെടുന്നു . അല്ലെങ്കിൽ നായകന് പറ്റുന്ന ഏതെങ്കിലും ഒരു പിഴവിലൂടെ അന്വേഷണം അയാളിലേക്ക് തിരിയണം (നടന്ന പോലെ തന്നെ !!! സംഗതി നാലാം ക്ലാസ്സ്‌ ഉം ഗുസ്തിയും ആണേലും ബുദ്ധിയിൽ ലാലേട്ടനെ ആര്ക്കും തോല്പ്പിക്കാൻ പറ്റില്ല) .ജീവിതത്തിൽ ഒരിക്കൽ പോലും ഒരു നിയമവിരുദ്ധമായ കാര്യം ചെയ്യാത്ത ഒരാൾ (അങ്ങനെ പറയുന്നുണ്ട് നായകൻ) ഒരു കൊലപാതകം നടന്നു കഴിഞ്ഞു രംഗത്തെത്തി അത് മറയ്ക്കാൻ നടത്തുന്ന ശ്രമങ്ങൾ കണ്ടാൽ ഇങ്ങേരു ഒരു ഭയങ്കര കുറ്റവാളി ആണെന്നേ ആരും പറയു .ഈ കേസിൽ സകല സാഹചര്യ തെളിവുകളും നായകന്  അനുകൂലമാണ്  നായകന് യാതൊരു ക്രിമിനൽ  പശ്ചാത്തലവും ഇല്ല . നായകനും സാക്ഷി സഹദേവനും  ആയി ശത്രുത ഉണ്ട് എന്നത്  ആ നാട്ടുകാർ മുഴുവൻ സമ്മതിക്കുന്നു . അങ്ങനെ ഉള്ളപ്പോൾ നായകന് നേരെ സംശയം തോന്നാൻ എന്തെങ്കിലും പ്രത്യേക കാര്യം ? അങ്ങനെ ഒന്നില്ല എന്നതാണ് സത്യം ( ഐ ജി ആശ ശരത് ഒരു മാതിരി സ്ക്രിപ്റ്റ് ആദ്യമേ വായിച്ച പോലെയാണു ഇയാൾ തന്നെയാണ് ആൾ എന്നു ഉറപ്പിച്ചു പറയുന്നത് ).തുടർച്ചയായി സിനിമ കണ്ടാൽ ഒരു വിധം ഭംഗിയായി എന്ത് കുറ്റ കൃത്യവും ചെയ്യാം എന്നാണ് ഈ ചിത്രം പറയുന്നത് . ഐ ജി  ഒക്കെ  സീരിയസ്  ആയി പറയുന്ന ചില കാര്യങ്ങൾ ഒക്കെ കേട്ടാൽ ഏതു പോലീസുകാരും ചിരിച്ചു പോകും

അല്ല അങ്ങനെ നോക്കിയാൽ ....

ഇങ്ങനെയുള്ള ചെറിയ കാര്യങ്ങൾ പെരുപ്പിച്ചു പറയുകയല്ല എന്നതല്ല ഉദ്ദേശം . മറിച്ചു ആദ്യ ചിത്രം മുതൽ കണ്ടു വരുന്ന ഇത്തരം ചെറിയ പ്രശ്നങ്ങൾ പരിഹരിച്ചിരുന്നു എങ്കിൽ  (മൈ ബോസ്സ് ഒഴികെ ) പ്രസ്തുത ചിത്രങ്ങൾ എങ്ങനെ കൂടുതൽ മിഴിവുള്ളത് ആയേനെ എന്നു ചിന്തിച്ചു പോകുന്നു എന്നു മാത്രം . ഈ ചിത്രത്തിലെ പ്രശ്നം (ഒരു പക്ഷെ എന്റെ ശ്രദ്ധ കുറവാകാം) ആയി എനിക്ക് തോന്നിയത് , ഉദാഹരണമായി എന്നെ കാണാതാകുന്നു ഞാൻ ഈ വർഷം 31 നു രാത്രി നിങ്ങളുടെ വീട് ഉള്ള ടൌണിൽ നിന്നാണ് അവസാനം ഫോണ്‍ ചെയ്തത് . നിങ്ങളെ എന്തെങ്കിലും കാരണം കൊണ്ട് പോലീസ് സംശയിക്കുന്നു . നിങ്ങൾ പറയുന്നു ഒന്നാം തീയതി നിങ്ങൾ ധ്യാനം കൂടാൻ പോയി എന്നു .അതിനുള്ള തെളിവുകളും നിങ്ങളുടെ കൈയിൽ ഉണ്ട് . എനിക്ക് മനസിലാകാത്തത്  അത് സത്യം ആണെങ്കിൽ ഞാൻ  എങ്ങനെ സംശയത്തിന്റെ പരിധിയിൽ നിന്നും ഒഴിവാകും എന്നതാണ് .എന്നെ കാണാതായത്  തലേ ദിവസം രാത്രി മുതൽ  അല്ലേ? ഇവിടെ മൊത്തം രണ്ടാം പകുതി മുന്നോട്ടു പോകുന്നത്  ഇയാൾ പിറ്റേന്ന്  ധ്യാനത്തിനു  പോയോ ഇല്ലയോ എന്നതിനെ ചുറ്റി പറ്റിയാണ് .

അല്ല മറ്റു ഘടകങ്ങൾ ....

അനിയാ ഒരു ത്രില്ലർ ചിത്രത്തിന്റെ (ത്രില്ലർ എന്നു പേരിട്ടു ഇറക്കുന്ന കൊപ്രയങ്ങളെ അല്ല ഉദ്ദേശിച്ചേ ) പ്രധാന ഘടകം അതിന്റെ തിരകഥ ആണെന്ന് വിശ്വസിക്കുന്ന ആളാണ് ഞാൻ .തിരകധയുടെ പ്രശ്നങ്ങളെ പറ്റിയാണ്  മുകളിൽ പറഞ്ഞത് . ലാലേട്ടനെ മണ്ണിൽ പണിയെടുത്തു ജീവിക്കുന്ന ഒരു മനുഷ്യനായി  (മുഴുവൻ സമയ കർഷകൻ അല്ലെങ്കിൽ കൂടി കഴിയുന്നതും ആരെയും ആശ്രയിക്കാതെ ജീവിക്കുന്ന ആളാണെന്ന്  സൂചനകൾ ഉണ്ട് )  അവതരിപ്പിക്കുമ്പോൾ മേക്ക്  അപ്പിൽ കുറച്ചു കൂടി ശ്രദ്ധിക്കുന്നത് നന്നായിരിക്കും എന്നു പലപ്പോഴും തോന്നാറുണ്ട് . ഇവിടെയും സ്ഥിതി വ്യത്യസ്തമല്ല .(ജീവിതത്തിൽ എപ്പോളെങ്കിലും വെയിൽ കൊണ്ടിട്ടുണ്ട് എന്നു ആലുവ പോലെ വെളുത്തു തുടുത്തിരിക്കുന്ന ഇരിക്കുന്ന നായികാ നായകന്മാരെ കണ്ടാൽ പറയില്ല എന്നതാണ് സത്യം .ഷാമ്പൂ ചെയ്ത മുടിയും ത്രെഡ് ചെയ്ത പുരികവുമായി മീന ശരിക്കും ഒരു രാജാക്കാട്ടു പത്താം ക്ലാസ്സ്‌കാരിയായി (ഫെയിൽ)   ജീവിക്കുന്നു.) .ആശ ശരത്തിന്റെ ഐ ജി യുടെ പാത്ര സൃഷ്ട്ടി  കുറച്ചു കൂടി ഭേദം ആയിരുന്നെങ്കിൽ അത് ചിത്രത്തിന്റെ നിലവാരത്തെ കുറെയധികം പോസിറ്റിവ്  ആയി ബാധിച്ചേനെ (കാണുന്നവന് തോന്നുന്ന ചോദ്യങ്ങൾ ഭർത്താവു സിദ്ദിഖ് നെ കൊണ്ട് ചോദിപ്പിച്ചു അതിനു മുട്ടപോക്ക് ഉത്തരങ്ങളും വാങ്ങി വയ്ക്കുന്നുണ്ട് സംവിധായകൻ).ഈ പടത്തിൽ കലക്കാനായി നിർത്തിയിരിക്കുന്നത്‌ ഒരു അര വില്ലൻ വേഷത്തിൽ  കലാഭവൻ ഷാജോണിനെ ആണ്.ബാക്കി ആർക്കും അങ്ങനെ  കാര്യമായി ഒന്നും ചെയ്യാനില്ല


അപ്പോൾ ചുരുക്കത്തിൽ

അനിയാ 2010 ൽ ശിക്കാർ , 2011 ൽ പ്രണയം , 2012 ൽ റണ്‍ ബേബി റണ്‍ , എന്നത് പോലെ ലാൽ ആരാധകർക്ക്  പറഞ്ഞു മുഖം രക്ഷിക്കാൻ ഉള്ള ഈ വർഷത്തെ ചിത്രം .മുകളിൽ പറഞ്ഞ ചിത്രങ്ങൾ എപ്പോൾ ആരെങ്കിലും ഓർക്കുന്നുണ്ടോ എന്നു പോലും എനിക്കറിയില്ല ഈ ചിത്രത്തിനും മറ്റൊരു അവസ്ഥ ആകാൻ വഴി ഇല്ല .

വാൽക്ഷണം : പടം കഴിഞ്ഞു ഇറങ്ങുമ്പോൾ എന്തോ ചിന്തിച്ചു ശ്രീനി അയ്യോ  എന്ന് വിളിച്ചു പോയി .കാരണം ചോദിച്ചപ്പോൾ അദ്ദേഹത്തിന്റെ മറുപടി " ഈ ഒരു പടത്തിന്റെ പേരിൽ ഇനി അടുത്ത വർഷം മൊത്തം നമ്മൾ , മലയാളീ പ്രേക്ഷകർ, എന്തൊക്കെ സഹിക്കേണ്ടി വരും എന്നോർത്ത് വിളിച്ചി പോയതാ അണ്ണാ"

കുറിപ്പ്  :  മുൻപ് പറഞ്ഞ പോലെ കുറച്ചു വ്യക്തി പരമായ ചില അസൗകര്യങ്ങൾ കാരണമാണ് ഈ പോസ്റ്റ്‌ വൈകിയത് .ക്ഷമിക്കുമല്ലോ .

എല്ലാ വായനക്കാർക്കും സഹ ബ്ലോഗ്ഗർമാർക്കും എന്റെയും ബാല്കണി 40 യുടെ പേരിലും ഹർദമായ പുതുവത്സര ആശംസകൾ !!!

റെഡ് വൈൻ (ലാലേട്ടന്റെ ഫേസ് ടു ഫേസ് !!!)

 അങ്ങനെ അതും  കണ്ടു .... (നെടുവീർപ്പ് )   സഫലമീ യാത്ര ..............!!!

എന്ത് കണ്ടെന്നാ അന്ന രാവിലെ ഒരു ആത്മഗതം .

അനിയ നമ്മുടെ ലാലേട്ടൻ അഭിനയിക്കുന്ന ഒരു ന്യൂ  ജനറേഷൻ  ചിത്രം കാണണം എന്നുണ്ടായിരുന്നു. പ്രസ്തുത  ആഗ്രഹം ഇന്നലെ തീർന്നു .

ഓഹോ അണ്ണൻ റെഡ് വൈൻ കണ്ടോ ? അണ്ണൻ കാണത്തില്ല എന്ന് കരുതി ഞാൻ ഒരു നിരൂപണം ഇന്നലെ കാച്ചിയതെ  ഉള്ളു .

വായിച്ചു അനിയാ കാളകൂടത്തിലെ അനിയാ നിന്റെ സാഹിത്യം ഫഹദ് ഫാസിൽ കലക്കി. മോഹൻലാൽ ഗ്രാൻഡ്‌ മാസ്റ്റർ എന്ന ചിത്രത്തിലെ പോലെ (മിടുക്കൻ !!! പുകഴ്ത്തിയോ എന്ന് ചോദിച്ചാൽ  ഇല്ല!! ) പിന്നെ ആസിഫലി, അഹങ്കാരിയായ ആ  ചെറുക്കൻ മോശം ഇതല്ലേ നിന്റെ ലൈൻ .

അണ്ണാ  അത് പിന്നെ ജീവിച്ചു പോകണ്ടേ . പറ സംഗതി എങ്ങനുണ്ട് ?

ശരി നീ ആദ്യം പറ . സംവിധയകൻ ലാൽ  ജോസ് മലയാള സിനിമക്ക് നൽകിയ  ഏറ്റവും വലിയ സംഭാവന എന്താ ?

അതിപ്പോ .. അങ്ങനെ പെട്ടന്ന് ചോദിച്ചാൽ ......പൊതുവെ നന്നായി സംഭാവന ചെയുന്ന ആളാണല്ലോ  ശ്രീ ലാൽ ജോസ് ...

എടാ ഇ ങ്ങനെ കാടിനു ചുറ്റും തല്ലല്ലേ . അദ്ദേഹം ഇതുവരെ ഒതുക്കി വെച്ചിരുന്ന സഹ സംവിധായകരെ ഒന്നൊന്നായി അഴിച്ചു വിട്ടു മലയാള പ്രേക്ഷകരെ ഉപദ്രവിച്ചു കൊല്ലുകയാണ് എന്നതാണ് സത്യം .ജവാൻ ഓഫ് വെള്ളി മല കഴിഞ്ഞപ്പോൾ ദാ  വരുന്നു അടുത്തത് . ഇനി എത്രയെണ്ണം ഉണ്ടോ ആവോ സ്റ്റോക്കിൽ ?സംവിധാനം നേരത്തേ പറഞ്ഞ പോലെ ലാൽ ജോസിന്റെ മറ്റൊരു സഹനായ  സലാം  ബാപ്പു നിർമ്മാണം ഗിരീഷ്  ലാൽ തിരകഥ മാമ്മൻ കെ രാജൻ  കഥ ( നേരത്തേ  വെളിപ്പെടുത്താൻ മറന്നു പോയത് ) നൌഫൽ സംഗീതം ബിജിപാൽ , അഭിനേതാക്കൾ  സർവ ശ്രീ ലാലേട്ടൻ , ആസിഫലി , ഫഹദ് ഫാസിൽ , സുരാജ് ,ടി ജി രവി , മിയ (ചേട്ടായീസ്   ഫെയിം ) അനുശ്രീ (ഡയമണ്ട് നെക്ക്ലേസ്  ഫെയിം ) മേഘ്ന രാജ് ,മരിയ ജോണ്‍ (പുതുമുഖം ) സൈജു  കുറുപ്പ് , അനൂപ്‌ ചന്ദ്രൻ ,മീര നന്ദൻ , സുധീർ കരമന , പ്രിയനന്ദൻ തുടങ്ങിയ താരനിര

ഇതൊക്കെ എനിക്കറിയാം .അണ്ണൻ കഥയെ പറ്റി  പറയാമോ ?

പിന്നെന്താ വയനാട്ടിലെ ഒരു ലോക്കൽ കമ്മിറ്റി സെക്രട്ടറി അനൂപ്‌  (ഫഹദ് ഫാസിൽ ) നഗരത്തിലെ  ഒരു ലോഡ്ജിൽ വെച്ച് കൊല്ലപ്പെടുന്നു. അന്വേഷിക്കുന്നത്  രതീഷ്‌ വാസുദേവൻ‌ (മോഹൻലാൽ ).ഭയങ്കര ബുദ്ധി ഉപയോഗിച്ച്  (പിന്നെ ഉപയോഗിക്കാതെ ലാലേട്ടൻ അല്ലെ പുള്ളി !!) കൊലപാതകിയെ  കണ്ടു പിടിക്കുന്നതാണ് കഥയുടെ ചുരുക്കം .

അപ്പോൾ കുറ്റാന്വേഷണം ആണല്ലേ ലാലേട്ടൻ എങ്ങനെ കലക്കിയോ ?

ഈ ചിത്രത്തോടെ  അദ്ദേഹം അഭിനയ ജീവിതത്തിലെ മറ്റൊരു നാഴിക കല്ല്‌  കൂടി പിന്നിടുന്നു .രണ്ടര മണിക്കൂർ ഉള്ള ഒരു സിനിമ മുഴുവൻ ഒരൊറ്റ ഭാവത്തിൽ അഭിനയിക്കുക എന്ന മനുഷ്യനാൽ തികച്ചും ദുഷ്കരമായ കൃത്യം അദ്ദേഹം ഈ ചിത്രത്തിൽ പുല്ലു പോലെ നിർവഹിച്ചിരിക്കുന്നു. ഹോളിവൂഡ്‌ സിനിമ ലോകത്ത് ആർനോൾഡ് , ടെർമിനെറ്റർ  സീരീസിൽ  സമാനമായ ഒരു ശ്രമം  നടത്തിയിട്ടുണ്ടെങ്കിലും ഇത്രയും വിജയിച്ചതായി തോന്നുന്നില്ല .പിന്നെ ഫഹദ് ഫാസിൽ അദ്ദേഹം നമ്മുടെ അനൂപ്‌ മേനോന്റെ കാര്യം പറഞ്ഞത് പോലെയാ ഫഹദ് പിച്ചക്കാരനായി അഭിനയിച്ചാലും അത് ഒരു ന്യൂ  ജനറേഷൻ  പിച്ചക്കാരൻ ആയിരിക്കും . ഈ സിനിമയിൽ തന്നെ നോക്കിയാൽ , ഒരു പാർട്ടി ലോക്കൽ സെക്രട്ടറി എന്ന് പറഞ്ഞാൽ  ഓർമ്മ വരുന്നത്  ബാലൻ  കെ നായരും, മുരളിയും , മമ്മൂട്ടിയും ഒക്കെ അവതരിപ്പിച്ച ബീഡി വലിക്കുന്ന,വെട്ടൊന്ന്  മുറി രണ്ടു എന്ന മട്ടിലുള്ള  പരുക്കൻ കഥാപാത്രത്തെ അല്ലേ ? എന്നാൽ ഇവിടെ അങ്ങനെയല്ല ഇഞ്ചിനീയറിംഗ്  കഴിഞ്ഞ തികഞ്ഞ ശാന്ത സ്വഭാവിയും  സമചിത്തതയോടെ കാര്യങ്ങൾ മനസിലാക്കാനും ഇംഗ്ലീഷ്  മ്യൂസിക്‌ , റെഡ് വൈൻ , ബൌധിക സൌഹൃദങ്ങൾ , സ്ത്രീ സുഹൃത്തുക്കൾ , നാടകാഭിനയം  ബിസ്നസ് സുഹൃത്തുക്കൾ  അവരുടെ കിടിലം പാർട്ടികൾ ഇവയോക്കെയുള്ള ഉള്ള ഒരു ഇടതുവിപ്ലവ  പാർട്ടി ലോക്കൽ സെക്രട്ടറിയെ ഒന്ന് സങ്കല്പ്പിച്ചു  നോക്കു .ഒരു ആധുനികത വരുന്നില്ലേ? അതാണ് ഈ സിനിമയിലെ ലോക്കൽ സെക്രട്ടറി അനൂപ്‌ (പിന്നെ പറയുമ്പോൾ എല്ലാം പറയണമല്ലോ ഉള്ളതിൽ ഭേദം  ഈ നടൻ  തന്നെയാണ് ).

അപ്പോൾ അസിഫലിയോ

പാവം, സ്ഥലം അഹങ്കാരി സ്ഥാനം ആർക്കെങ്കിലും ഒന്ന് കൈമാറുന്ന വരെ ആ നടൻ  ഇനി എന്തൊക്കെ സഹിക്കണോ ആവോ ?പിന്നെ മനുഷ്യനെ വെറുപ്പിക്കുന്നതിൽ ലാലേട്ടന്റെ തൊട്ടു പിന്നിൽ ഈ നടൻ  ഉണ്ട് എന്നതാണ് സത്യം .(ലാലേട്ടൻ വെറുപ്പിക്കുമ്പോൾ ആസിഫലി ബോറടിപ്പിക്കുന്നു എന്ന് മാത്രം ).അസിഫലി യുടെ കഥാപാത്രം ഒരിടത്തു പോലും ഇയാൾ ഒരു മുൻ  കോട്ടേഷൻ ആളായിരുന്നു എന്ന് തോന്നില്ല .(അഭിനയ മികവു തന്നെ.(ഏതോ ശാന്തിക്കാരനെ പിടിച്ചു കൊട്ടേഷൻ പണി എല്പ്പിച്ച പോലുണ്ട് ) )

ഇനി ഈ സിനിമ ആസ്വദിച്ച്  നിരൂവിച്ച നിന്നെ പോലെയുള്ള മഹാന്മാരോട് ചില ചോദ്യങ്ങൾ

നമ്മുടെ നാട്ടിൽ ഒരു വൻകിട പണമിടപാട് സ്ഥാപനം (ഫിൻ കോർപ്പ് ) ഒരു റിസോർട്ട്  തുടങ്ങാൻ പ്ലാൻ ചെയ്യുന്നു .സ്ഥലം പാർട്ടി ലോക്കൽ സെക്രട്ടറി ഇതിനു എതിരാണ് (പ്രശ്നം പരിസ്ഥിതി ). കമ്പനി എന്ത് ചെയ്യും ? ഇടഞ്ഞു നില്ക്കുന്ന സെക്രട്ടറിയെ വല്ലപാടും അനുനയിപ്പിക്കാൻ നോക്കും അല്ലെങ്കിൽ മുകളിലേക്ക് കാശുമായി പോകും .അതോ ഇതൊന്നും ചെയ്യാതെ  അവിടെ ലോണ്‍ എടുത്തു തിരിച്ചു അടയ്ക്കാൻ  നിവർത്തി ഇല്ലാതെ വിഷമിക്കുന്ന വല്ല മുൻ കോട്ടഷൻ തൊഴിലാളിക്ക് ലോണ്‍ എഴുതി തള്ളം  എന്ന ഓഫർ കൊടുത്തു സെക്രട്ടറിയെ കൊല്ലിക്കുമൊ ?

ഒരു ലോഡ്ജിൽ ഒരു കൊല നടക്കുന്നു . പോലീസ്  ആദ്യം തിരകേണ്ടത്  അവിടെ താമസിച്ചിരുന്ന വല്ലവരും അപ്രത്യക്ഷമാ യിട്ടുണ്ടോ .ഉണ്ടെകിൽ അവൻ കൊടുത്ത വിലാസം ചെക്ക്‌ ചെയ്യും അത് വ്യാജം ആണെങ്കിൽ അയാളെ കണ്ടെത്താൻ ശ്രമിക്കും അങ്ങനെ ഒക്കെയാണ് . എവിടെ അതൊക്കെ ചെയുന്നതിന് പകരം നിരവധി മണ്ടത്തരങ്ങളിലൂടെ (സംഗതി ഏതാണ്ട് വലിയ കാര്യം ആണെന്ന ഭാവത്തിലാ ചെയ്യുന്നെ എന്ന് മാത്രം ) ആണ് അന്വേഷണം കൊണ്ട് പോകുന്നത് .

പിന്നെ ഈ സിനിമയുടെ ഏറ്റവും വലിയ പുതുമ എന്ന് പറയുന്നത് .കൊലപാതകം ആര് ചെയ്തു എന്നുള്ളത്  ആദ്യ അര മണികൂരിനുള്ളിൽ നമുക്ക് മനസിലാകും . പിന്നെ അവസാനത്തെ ആ ചത്തവന്റെയും കൊന്നവന്റെയും ആത്മാക്കൾ ഒരുമിച്ചു ബൈക്ക് പിടിച്ചു ലാലേട്ടന്റെ മുന്നിലെത്തി രണ്ടു മിനിട്ട് ഒരു തത്വം പറച്ചിലുണ്ട് (ഭയങ്കരം തന്നെ അനിയാ !!!) ലാലേട്ടന് പിന്നെ കറന്റ്‌ അടിച്ചാലും സ്ഥായി ആയുള്ള  ഭാവത്തിനു ഒരു മാറ്റവും ഇല്ലാത്തത് കൊണ്ട് കൊള്ളാം .ഈ രണ്ടു സംഭവങ്ങൾക്കിടയിൽ കാണാൻ കേറുന്നവനെ പീഡിപ്പിച്ചു കൊല്ലാനായി നേരത്തെ പറഞ്ഞ സംഭവവുമായി ഒരു ബന്ധവും ഇല്ലാത്ത കുറെ കാര്യങ്ങൾ പറഞ്ഞു പോകുന്നു .ലാലേട്ടന്റെ കഴിവ് വെളിപ്പെടുത്താനായി ഉണ്ടാക്കി ഇറക്കിയിരിക്കുന്ന രണ്ടു രംഗങ്ങളും തെറ്റില്ലാതെ കാണുന്നവനെ വെറുപ്പിക്കും ( ബാങ്കിൽ വെച്ച്  ഉടമയെ അറസ്റ്റ് ചെയ്തു കൊട്നു പോകുമ്പോൾ ഒരു സി സി പിടിക്കുന്ന ഗുണ്ട വാറഡ്  ഉണ്ടോ എന്ന് ഗുണ്ടാ ഭാവത്തിൽ ചോദിക്കുന്നതും (അസി കമ്മിഷണറിനോടാന്നേ ) ലാലേട്ടൻ തന്റെ ഭാവം വിടാതെ അവനു ചെകിടത് കൊടുക്കുന്നതും , പിന്നെ വില്ലൻ അൽഷി മേഴ്സ്  അഭിനയിച്ചു കിടക്കുമ്പോൾ അത് പൊളിക്കുന്നതും (പ്രത്യേകിച്ചോന്നും ഇല്ലാ ലാലേട്ടൻ എന്തോ പാത്രം എടുത്തു അപ്രതീക്ഷിതമായി വില്ലന്റെ തലക്കടിക്കുന്നതായി അഭിനയിക്കുന്നു .വില്ലാൻ തടയുന്നു .തീർന്നില്ലേ ...ലാലെട്ടനോടാണോ കളി !!!) ).

മരിയ  ജോണ്‍, മേഘ്ന രാജ് ഇവരൊക്കെ എന്തിനായിരുന്നു എന്ന ചോദ്യം സിനിമ കഴിയുമ്പോളും  അവശേഷിക്കും . (ഇവര് മാത്രമല്ല ഈ സിനിമയിലെ ബാക്കി ഒട്ടു മിക്ക കഥാപാത്രങ്ങളും ആ തോന്നൽ  ആണ് ഉളവാക്കുന്നത് )മേഘ്ന രാജ്  പിന്നെ ലാലേട്ടന്റെ കഴിവ് തെളിയിക്കാൻ ആണെന്ന്  വിചാരിക്കാം .(പുല്ലു പോലെയല്ലേ  മേഘ്ന ആണ്  അനൂപിന്റെ അഞ്ജാത  ചാറ്റ് ഫ്രണ്ട് എന്ന് ലാലേട്ടൻ വിളിച്ചു പറയുന്നത് അതും ഒരു തെളിവും കൂടാതെ !!!)

അല്ല അപ്പോൾ ചുരുക്കമായി പറഞ്ഞാൽ .

മനുഷ്യനെ മിനക്കെടുത്താൻ പടച്ചു വിട്ട ഒരു ഉരുപ്പടി .ഇവനൊക്കെ ദൈവം കൊടുത്തോളും .ഒരു ഗതി കേട്ട മലയാള സിനിമ പ്രേക്ഷകൻ വേറെ എന്ത് പറയാനാ അനിയാ

ഹസ്ബന്‍സ് ഇന്‍ ഗോവ (Review :Husbands in Goa)

ഭാരതത്തില്‍ ഏറ്റവും വിശ്വസിക്കാവുന്ന ഭര്‍ത്താക്കന്മാര്‍ ആരാണ് അഥവാ എവിടെയാണ് ഉള്ളത് ?

അങ്ങനെ ചോദിച്ചാല്‍ ....., ഇക്കാലത്ത് ഒക്കെ ആരെയാ അണ്ണാ കണ്ണടച്ച്  വിശ്വസിക്കുന്നെ? ഇവിടെ നിയമവും സദാചാര പോലീസും ഒക്കെ ഉള്ളത് കൊണ്ട് കാര്യങ്ങള്‍ ഒരു വിധം നടന്നു പോകുന്നു.

എടാ അറിയില്ല എങ്കില്‍ അത് പറയണം ഇങ്ങനെ കിടന്നു തപ്പാന്‍ നീ ആരു ചാനല്‍ റിപ്പോര്‍ട്ടര്‍ ആണോ ?

ശരി അറിയില്ല .പറഞ്ഞേ കേള്‍ക്കട്ടെ

അനിയാ, നമ്മുടെ ഭാരതത്തില്‍ സ്ത്രീകള്‍ക്ക് ഏറ്റവും വിശ്വസിക്കാവുന്ന ഭര്‍ത്താക്കന്മാരുള്ളത് കൃഷ്ണ പൂജപ്പര എഴുതി സജി സുരേന്ദ്രന്‍ സംവിധാനം ചെയ്യുന്ന ചിത്രങ്ങളില്‍ ആണ്. എല്ലാവനും മുടിഞ്ഞ ആക്രാന്തം ആണെങ്കിലും അടിസ്ഥാനപരമായി  ഭാര്യമാരെ ഭയങ്കര സ്നേഹം ആയതു കൊണ്ട് എന്ത് സാഹചര്യം ഉണ്ടായാലും ഒന്നും ചെയ്യില്ല. ഇനി കറങ്ങി തിരിഞ്ഞു വല്ല കാള്‍ഗേളോ,ബാര്‍ ഡാന്‍സറോ മറ്റോ തടഞ്ഞാലോ അവള്‍ ഇങ്ങനെ ഉള്ളവരെ ഒരു പാഠം പഠിപ്പിക്കാന്‍ ശപഥം എടുത്തു ഇറങ്ങിയ പരമ പുണ്യവതിയും ആയിരിക്കും. സംശയം ഉണ്ടെങ്കില്‍ ഹാപ്പി ഹസ്ബന്‍സ് എന്ന ചിത്രത്തിലെ ഭാര്യയെ വെട്ടിച്ചു മറ്റു പെണ്ണുങ്ങളുമായി പഞ്ചാര അടിക്കാന്‍ വേണ്ടി മാത്രം പെടാ പാട് പെടുന്ന ഇന്ദ്രജിത്തിന്‍റെ കഥാപാത്രത്തെയും ലോകത്തെ സകല ആക്രാന്തം പിടിച്ച ഭര്‍ത്താക്കന്മാരെയും പാഠം പഠിപ്പിക്കാന്‍ ഇറങ്ങിയ പരമ പുണ്യവതിയായ റീമ കല്ലിങ്കല്‍ അവതരിപ്പിച്ച കഥാപാത്രത്തെയും  നോക്കിയാല്‍ മതി.  എനിക്കാകെ  അറിയാനുള്ളത്  ഇവര്‍  വിവാഹിതര്‍ ആയാല്‍ എന്ന  പടം  ഇവര്‍  എവിടുന്നു  പൊക്കി   എന്ന്  മാത്രമാണ്  .കുഞ്ഞളിയന്‍  സ്വന്തം സൃഷ്ടിയാണ് എന്ന് ഞാന്‍ നൂറു വട്ടം സമ്മതിക്കാം.പ്രസ്തുത ചിത്രത്തിന്‍റെ നിലവാരം കണ്ടാല്‍ അത് ആര്‍ക്കും മനസിലാകും

നിങ്ങള്‍ ഇങ്ങനെ കാടു കേറാതെ കാര്യം പറയാമോ ?

പറയാനെന്തോന്നു  അനിയാ? നമ്മുടെ പ്രിയദര്‍ശന്‍ സാറു ഹിന്ദിയില്‍ (മലയാളത്തിലും ?)  ചെയ്യുന്ന  അതേ  കലാ  പരിപാടി തന്നെയാണ്  ഇവരും ചെയ്യുന്നത്. ഉറവിടം അജ്ഞാതമായ, വിജയം കൈവരിച്ച , ഇവര്‍  വിവാഹിതര്‍  ആയാല്‍ എന്ന  സിനിമക്ക്  ശേഷം  വന്‍  വിജയം  കൈവരിച്ച ഹാപ്പി ഹസ്ബന്സ്  എന്ന ചിത്രത്തെ ഇവിടുത്തെ മാധ്യമ ലോകം പുല്ലു പോലെ അവഗണിക്കുകയും .പിന്നീടു വന്ന ഫോര്‍ ഫ്രണ്ട്സ് എന്ന ചിത്രത്തിന്‍റെ പരാജയം ഒരു ആഘോഷം ആക്കുകയും ചെയ്തത് നമുക്ക്  അറിയാമല്ലോ.  ഒറിജിനല്‍   അയ കുഞ്ഞളിയന്‍  എടുത്തു  പണി  മേടിച്ചു  പിടിച്ചു  വീണ്ടും  പഴയ  ഹാപ്പി  ഹസ്ബന്‍സിനെ  തിരിച്ചു  കൊണ്ട്  വന്നിരിക്കയാണ്‌  ഈ ചിത്രത്തില്‍ . ഫോര്‍ ഫ്രണ്ട് സ് , കുഞ്ഞളിയന്‍  എന്നിവയുടെ  പുതിയ  പതിപ്പുകള്‍ വരാന്‍ ഇരിക്കുന്നത്തെ ഉള്ളു എന്ന് ചുരുക്കം  

അല്ല ഇതിന്‍റെ കഥ ?

ഇത്രയും പറഞ്ഞിട്ടും നിനക്ക്  മനസ്സിലായില്ലേ?  ഭാര്യമാരുടെ  പീഡനം  സഹിച്ചു  കഴിയുന്ന  മൂന്ന്  ചെറുപ്പക്കാരായ  ഭര്‍ത്താക്കന്മാര്‍ ഓരോ കള്ളം പറഞ്ഞു ഗോവയില്‍ പോയി പത്തു ദിവസം അടിച്ചു പൊളിച്ചു കഴിയാന്‍ പ്ലാന്‍ ചെയ്യുന്നു .വഴിയില്‍ വെച്ച് കണ്ടു മുട്ടുന്ന കുറച്ചു  സീനിയര്‍  അയ ഒരാള്‍ ഇവരോടൊപ്പം ചേരുന്നു.ഗോവയില്‍ എത്തുന്ന ഇവര്‍ എത്തിപ്പെടുന്ന കുരുക്കുകളും അവയില്‍ നിന്നും ഇങ്ങനെ രക്ഷപ്പെടുന്നു എന്നുമാണ് ഈ സാരോപദേശ ചിത്രം പറയുന്നത്. ഒറിജിനല്‍ മസ്തി എന്ന ചിത്രം ആണെന്നാണ് ഓര്‍മ്മ .(പഴയ ഹാപ്പിയുടെ ഒറിജിനല്‍  നോ എന്‍ട്രി എന്ന ചിത്രമാണല്ലോ ).

അല്ല ഒരല്‍പം വിശദമായി ........

അനിയാ, ചാര്‍ട്ടെര്‍ഡ്  അക്കൗണ്ട്‌ഡാന്റ് ആയ ഗോവിന്ദ്   (ജയസൂര്യ)  അയാളുടെ ഭക്തി ഭ്രാന്തിയായ ഭാര്യ അഭിരാമി (ഭാമ) , വക്കീല്‍  ആയ  ജെറി (ഇന്ദ്രജിത്ത് )  വീട്ടു  ജോലി  ചെയ്യാന്‍  ഇഷ്ടമല്ലാത്ത, എല്ലാ  ജോലിയും  ജെറിയെ   കൊണ്ട് ചെയ്യിക്കുന്ന  ഭാര്യ ടീന (റീമ കല്ലിങ്കല്‍ ),  ഇന്‍ടീറിയര്‍  ഡിസൈനര്‍ അര്‍ജുന്‍ (ആസിഫലി )  , ഭര്‍ത്താവിനെ  ഐ എ എസ്  എഴുതിച്ചു  പാസ്സാക്കാന്‍ പാടുപെടുന്ന അയാളുടെ ഭാര്യ വീണ (രമ്യ നബീശന്‍)   ഇവരാണ് മൂന്നു ദമ്പതികള്‍ .സണ്ണി എന്ന ഇവര്‍ ട്രെയിനില്‍ വെച്ച് പരിചയപ്പെടുന്ന ക്യാമറമാന്‍ (ലാല്‍) അയാളുടെ ഭാര്യ ആനി (പ്രവീണ) .ഗോവയിലെപോലീസ്  ഇന്‍സ്പെക്ടര്‍  ഇമ്രാന്‍ഖാനോ  , ജാവേദ്‌ മിയാന്‍ദാദോ  ആരാണ്ടു  ആയിട്ടു  കലഭവന്‍   മണിയും   വരുന്നു .പറയുമ്പോള്‍  എല്ലാം  പറയണമല്ലോ  നോസ്ടല്ജിയക്ക്‌   വേണ്ടിയാകണം  no 20 മദ്രാസ്‌  മെയിലില്‍  അഭിനയിച്ച  ടി ടി ആര്‍ നാടാര്‍  (ഇന്നസെന്റ്‌ )  ഈ ചിത്രത്തില്‍ പുനര്‍ അവതരിക്കുന്നു .(അത് പിന്നെ പിച്ചക പൂങ്കാവുകള്‍ റീ മിക്സ്‌ ചെയാന്‍ ആണെന്ന് കരുതാം .അല്ലാതെ പറ്റില്ലല്ലോ ഏതു?).

അല്ല സിനിമയെ പറ്റി .....


അനിയാ ഈ കൃഷ്ണ പൂജപ്പരയെ പറ്റി എനിക്ക് തോന്നിയിട്ടുള്ളത് ആദ്യ പകുതി ഒരു വിധം കുഴപ്പം ഇല്ലാതെ എഴുതി കൊണ്ട് പോകുന്ന ആള്‍ എന്നും (അതിനു കാരണം ലൈറ്റ് ആയ ആദ്യ പകുതിയും അത് അഭിനയിച്ചു ഫലിപ്പിക്കാന്‍ കഴിവുള്ള അഭിനേതാക്കളും ആണ് എന്നത് ഇരിക്കട്ടെ ) എന്നാല്‍ രണ്ടാം പകുതി ആകുമ്പോള്‍ ടിയാന്‍റെ മൊത്തത്തില്‍ ഉള്ള നിയന്ത്രണം വിടുകയും സിനിമ അകെ മൊത്തം ചള കുളം ആകുകയും ചെയുന്നു എന്നതാണ് പൊതുവേയുള്ള അദേഹത്തിന്റെ രീതി . ഈ ചിത്രത്തിലും അതിനു വലിയ മാറ്റം ഒന്നും ഇല്ല. ആദ്യ പകുതി ചെറുതായി നമ്മെ ചിരിപ്പിച്ചു കടന്നു പോകുന്നു .അവിടെയും ചെയ്യാവുന്ന സംഗതികള്‍ / സാദ്ധ്യതകള്‍ ഇല്ല എന്നല്ല .ഉദാഹരണമായി ഒരാളെ ഐ ടി മേഖലയില്‍ നിന്നാക്കി അതിന്റെ സാദ്ധ്യതകള്‍ ഉപയോഗിക്കാവുന്ന ഒന്നായിരുന്നു . പിന്നെ പാചകവും ഭക്തിയും ശരി പഠിപ്പിക്കല്‍ കുറച്ചു കടന്നു പോയി കുറച്ചു കൂടി ജെനുവിന്‍ ആയ ഒരു പീഡന മുറ ആയിരുന്നു നല്ലത്.മൂന്നു ഭാര്യമാരും ഒരു മാതിരി കൃഷ്ണ പൂജപ്പര  പ്രത്യേകം പറഞ്ഞു ഏല്‍പ്പിച്ചതാണ് എന്ന ഭാവത്തില്‍ തികഞ്ഞ മന്ദ ബുദ്ധികളെ പോലെയാണ് ഭര്‍ത്താക്കന്മാരെ പീഡിപ്പിക്കുന്നത് !(മനസാക്ഷി കുത്തു കൊണ്ടാകണം അഭിരാമിക്ക് വിദ്യാഭ്യാസം കുറവാണു എന്നൊരു സൂചന ഉണ്ട് ) . ഭക്തിയും ,  ഐ റ്റി വനിതകള്‍ക്ക്  പൊതുവേ പാചകം  ചെയാനുള്ള  മടിയും  ഒക്കെ ചേര്‍ത്ത്  ഇവിടെയൊക്കെ കുറച്ചു ജെനുവിനിട്ടി കൊണ്ടുവന്നിരുന്നു എങ്കില്‍ നന്നായേനെ (ഒന്നുമില്ലേല്‍ പടം നാലഞ്ചെണ്ണം ആയില്ലേ സാറന്മാരെ.  എന്താടോ  നന്നാകാത്തെ!!! )

പിന്നെ, ഇത്രയും പറഞ്ഞതെല്ലാം പാവം പിടിച്ച ഒന്നാം പകുതിയേ പറ്റിയാണ് . രണ്ടാം പകുതി ആകുമ്പോള്‍ സംവിധായകനും  തിരക്കഥാകൃത്തും തങ്ങളുടെ വിശ്വരൂപം പുറത്തെടുക്കുകയും അന്തവും കുന്തവും ഇല്ലാതെ സിനിമ പോയി  എവിടെയോ ചെന്ന് ഇടിച്ചു നില്‍ക്കുകയും ചെയ്യുന്നു. ശുഭം .ഇതിലും ഭേദം രണ്ടാംപകുതി ഒരു ത്രില്ലെര്‍ മോഡില്‍ പരീക്ഷിക്കുന്നതായിരുന്നു.

തുമ്പിയെ കൊണ്ട് കല്ലെടുപ്പിക്കരുത് എന്ന വാചകം  നമുക്ക് ഇതു പറയുമ്പോള്‍  തല്ക്കാലം മറക്കാം 

അപ്പോള്‍ അഭിനയം .....

ജയസൂര്യയും , ഇന്ദ്രജിത്തും അവരവരുടെ കഥാപാത്രങ്ങളെ നന്നാക്കിയപ്പോള്‍ ആസിഫലി അവര്‍ക്കൊപ്പം എത്താന്‍ പാടു പെടുന്ന കാഴ്ചയാണ് നമ്മള്‍ കാണുന്നത്. ലാല്‍  പതിവ് പോലെ . ബിജു മേനോനെ പോലൊരു നടനെ ഈ റോളില്‍ പരീക്ഷിക്കാവുന്നത് ആയിരുന്നു എന്ന് തോന്നുന്നു .  പ്രവീണയും  കലാഭവന്‍  മണിയും  ഒക്കെ  വന്നു  പോകുന്നു  എന്നതല്ലാതെ  വേറെ പണിയൊന്നും ഇല്ല.നായികമാര്‍ നേരത്തെ പറഞ്ഞത് പോലെ മൊത്തത്തില്‍ ഒരു മന്ദബുദ്ധി കളിയാണ്‌

അപ്പോള്‍ ചുരുക്കത്തില്‍ .....

ഉസ്താദ്‌ ഹോട്ടലും തട്ടത്തിന്‍ മറയത്തും ഒക്കെ വെറുതെ കണ്ടു  കൊണ്ടിരിക്കാം  എന്നഭിപ്രായപ്പെടുന്ന  ഒരു പ്രേക്ഷക സമൂഹത്തിനു ഇതൊന്നും വലിയ പ്രശ്നമാവില്ല എന്ന് കരുതുന്നു .എനിക്ക് മേല്‍പ്പറഞ്ഞ ചിത്രങ്ങള്‍ പോലെ തന്നെ ഇതും പാടായിരുന്നു അനിയാ, സത്യം

പ്രണയം

ഡോക്ടര്‍ ഡോക്ടര്‍ .....
യെസ് കടന്നു വരൂ . അകെ വിയര്‍ത്തിരിക്കുന്നല്ലോ എന്താ പ്രശ്നം?

സര്‍ ഞാന്‍ ചിത്ര ഗുപ്തന്‍ ഭട്ടതിരിപ്പാട് .ചിത്രു എന്നറിയപ്പെടുന്നു .മലയാളത്തിലെ അറിയപ്പെടുന്ന ഒരു നിരൂപകനാണ് ഞാന്‍.സര്‍ ഒരു പക്ഷെ കാളകൂടം അന്തിപത്രത്തില്‍ വരുന്ന എന്‍റെ ചിത്ര വിദ്വേഷം എന്ന കോളം വായിച്ചിരിക്കും.സംഗതി ആഗോള പ്രശസ്തം അല്ലെ .

ആണോ? ഞാന്‍ ഈ ജാതി ചവറുകള്‍ ഒന്നും വായിക്കാറില്ല.അതിരിക്കട്ടെ എന്താ തന്‍റെ പ്രശ്നം?

പ്രശ്നം എനിക്കല്ല എന്‍റെ അന്നദാതാവും സഹോദര തുല്യനുമായ ശ്രീ പ്രേക്ഷകനാണ്.ഇന്നലെ വരെ ചില്ലറ തെറി പറച്ചിലില്‍ ഒതുങ്ങി നിന്നതാ.ഇന്നലെ വൈകുന്നേരം അങ്ങേര്‍ ഒരു വെട്ടുകത്തിയും ആയിട്ടു എന്നെ ഈ നഗരം മുഴുവന്‍ ഓടിച്ചു.കഷ്ടിച്ച് ജീവന്‍ രക്ഷിച്ചാണ് അയാളെ ഇവിടെ കൊണ്ട് വന്നത്.

അല്ല എന്താ അയാളുടെ പ്രശ്നം ?

ഡോക്ടര്‍ .. ഒരു നിരൂപകന്‍ എന്ന നിലയില്‍ ഞാന്‍ ഈ കൂതറ മലയാളം സിനിമകള്‍ ഒന്നും കാണാറില്ല .(വേറെ പണിയില്ലേ എനിക്ക് ) അകെ അറിയാവുന്നത് കുറെ കൊറിയന്‍ ഇറാനിയന്‍ ലാറ്റിന്‍ അമേരിക്കന്‍ പടങ്ങളുടെ പേരുകളാണ്.അത് പിന്നെ ഗൂഗിളും വെച്ചാണ്‌ ഞ്ഞാന്‍ കഞ്ഞി കുടിക്കുന്നെ.ഇന്നലെ ഞാന്‍ സ്വന്തമായി എഴുതിയ പ്രണയം എന്ന ചിത്രത്തിന്റെ നിരൂപണം വായിച്ചതിനു ശേഷമാണു ഇങ്ങേര്‍ ഇങ്ങനെ അക്രമാസക്തന്‍ ആയതു .ഡോക്ടര്‍ എങ്ങനെ എങ്കിലും ഒന്ന് ....

ശരി ശരി . വിളിക്ക് ഞാന്‍ ഒന്ന് നോക്കട്ടെ .

ഡോക്ടര്‍ ഞാന്‍ ഇവിടെ ഇരുന്നാല്‍ അയാള്‍ വീണ്ടും വയലെന്‍റ്റ് ആയേക്കും .ഞാന്‍ ഇവിടെങ്ങാനും ഒളിച്ചിരുന്നോളാം.

മം ശരി ശരി

ഡോക്ടര്‍ ....

നിങ്ങളാണോ പ്രേക്ഷകന്‍ ? ഇരിക്കു. നിങ്ങളുടെ കാര്യം എപ്പോള്‍ പറഞ്ഞതെ ഉള്ളു .

ആ പറഞ്ഞവനെ എനിക്കറിയാം ഡോക്ടര്‍ അവനെ ഉണ്ടല്ലോ ...?

ഛെ സമാധാനമായി ഇരിക്കു ഇനി പറയു എന്ത് പറ്റി?

ഒന്നും പറ്റിയില്ല ഡോക്ടര്‍ ഞാനൊരു സാധാരണ സിനിമ പ്രേക്ഷകനാണ് .ഇന്നലെ മലയാളത്തിലെ പ്രഗല്‍ഭ സംവിധായകന്‍ ശ്രീ ബ്ലെസി ഒരുക്കിയ പ്രണയം കാണാന്‍ ഇടയായി .

അത് ഭയങ്കര സിനിമ ആണെന്ന് നിങ്ങളുടെ ബൂലോകത്തെ വലിയ സാറന്മാര്‍ എല്ലാം ഒറ്റ സ്വരത്തില്‍ വിളിച്ചു കൂവുന്ന എന്ന് ഇന്നലെ വീട്ടില്‍ മോന്‍ പറയുന്നത് കേട്ടു .പിന്നെ എന്താ? പിന്നെ അത് ഏതോ കൊറിയന്‍ പടത്തിന്‍റെ കോപ്പി ആണെന്ന് ആര്‍ക്കോ പരാതി കിട്ടിയിട്ടുണ്ടെന്ന് കേട്ടല്ലോ ?

പിന്നെ ഇവനൊക്കെ ആരു വി എസ് അച്യുതാനന്ദനോ ഇങ്ങനെ രഹസ്യമായി പരാതി കൊടുക്കാന്‍ ? ശരി അത് പോകട്ടെ . ഈ ചിത്രത്തിന്റെ കഥ ഇപ്രകാരമാണ് .

ഷാര്‍ജയില്‍ ജോലി ചെയുന്ന സുരേഷ് (അനൂപ്‌ മേനോന്‍) എന്നയാളിന്‍റെ നാട്ടിലുള്ള ഒരു നഗരത്തിലെ ഫ്ലാറ്റില്‍ താമസിക്കുന്ന കുടുംബം.സുരേഷിന്‍റെ ഭാര്യ അശ്വതിയും പ്ലസ്‌ ടു മകള്‍ മേഘ പിന്നെ സുരേഷിന്‍റെ അച്ഛന്‍ അച്ചുത മേനോനും (അനുപം ഖേര്‍)പഴയൊരു ഫുട് ബാള്‍ കളിക്കാരനായ അച്ചുത മേനോന്‍ പണ്ട് ലുധിയാനയില്‍ നേഴ്സിംഗ് പഠിക്കാന്‍ പോയ ഗ്രേസ് (നിവേദിത) മായി പ്രണയത്തില്‍ ആകുകയും ചെയ്തതാണ്.എന്നാല്‍ വ്യത്യസ്ത മതക്കാരായ ഇവര്‍ വിവാഹിതര്‍ ആയി ഒരു കുട്ടിയും ഉണ്ടായി (ഏതാണ്ട് മൂന്ന് നാലു കൊല്ലത്തിനു ശേഷം) വേര്‍പിരിയുന്നു.അതിനു ശേഷം അച്ചുത മേനോന്‍ ആണ് സുരേഷിനെ വളര്‍ത്തി വലുതാക്കുന്നത്.മകനുമായി അടുത്ത ആത്മബന്ധം ഉള്ള,അവന്‍റെ കുടുംബത്തോടൊപ്പം ശാന്തമായ ജീവിതം നയിക്കുന്ന അച്ചുത മേനോന്‍റെ അടുത്ത ഒരു ഫ്ലാറ്റിലേക്ക് മറ്റൊരു വിവാഹം കഴിഞ്ഞ,ഭര്‍ത്താവും (മോഹന്‍ലാല്‍)മകളും (ധന്യ മേരി വര്‍ഗീസ്) മരുമകനും അവരുടെ കുട്ടിയും അടങ്ങുന്ന കുടുംബവുമായി ഗ്രേസ് (ജയപ്രദ) താമസിക്കാന്‍ എത്തുന്നതോടെയാണ് പ്രണയത്തിന്റെ കഥ ശരിക്കും ആരംഭിക്കുന്നത്.ഇവരുടെ ഭര്‍ത്താവു മാത്യൂസ്‌,പഴയ ഫിലോസോഫി പ്രൊഫസര്‍‍,വലതു ഭാഗം തളര്‍ന്നു വീല്‍ചെയറില്‍ ആണ്.തന്നെ ഉപേക്ഷിച്ചു പോയ അമ്മ എന്ന നിലയില്‍ സുരേഷിന്, ഇതു വരെ കണ്ടിട്ടില്ല എങ്കില്‍ പോലും അമ്മയോട് വെറുപ്പാണ് . വീണ്ടും കണ്ടു മുട്ടുകയും അടുക്കുകയും ചെയ്യുന്ന അച്ചുത മേനോന്‍ - ഗ്രേസ് ബന്ധത്തെ സുരേഷ് മേല്‍പ്പറഞ്ഞ കാരണം കൊണ്ടും, ഗ്രേസിന്റെ മക്കള്‍ അവരുടെതായ കാരണങ്ങള്‍ കൊണ്ടും എതിര്‍ക്കുന്നു. എന്നാല്‍ മാത്യൂസ്‌ അച്ചുത മേനോനുമായി അടുക്കുകയും സൌഹൃതത്തില്‍ ആകുകയും ചെയ്യുന്നു (ഇദ്ദേഹത്തിനു ഇവരുടെ പഴയ ബന്ധം അറിയാം ). ആ ബന്ധം വളരുകയും മൂവരും ബന്ധുക്കളുടെ എതിര്‍പ്പിനെ അവഗണിച്ചു മുന്നോട്ടു പോകുകയും പിന്നീടുള്ള സംഭവങ്ങളിലൂടെ കഥ പുരോഗമിക്കുന്നു .

സംഗതി കൊള്ളാമല്ലോ സുഹൃത്തേ . എന്നാലും ആ കൊറിയന്‍ സംഗതി പറയാത്തത് മോശമായി അല്ലിയോ ?

ഡോക്ടര്‍,അതിനു ഈ കൊറിയയിലേക്കോ ഓസ്ട്രലിയയോ വരെ ഒന്നും പോകണ്ട.ഒറ്റ വാചകത്തില്‍ പറഞ്ഞാല്‍ ഈ സിനിമയുടെ തീം,വേര്‍പിരിഞ്ഞ ദമ്പതിമാര്‍ വര്‍ഷങ്ങള്‍ക്കു അപ്രതീക്ഷിതമായി കണ്ടു മുട്ടുകയും പിന്നീടു അവരുടെ ജീവിതത്തില്‍ ഈ കണ്ടു മുട്ടലിനു മുന്‍പും പിന്‍പും ഉണ്ടാകുന്ന സംഭവങ്ങള്‍ ആണല്ലോ പ്രതിപാദന വിഷയം.ഹിന്ദിയില്‍ ഗുല്‍സാര്‍ എന്നൊരു ആളുണ്ട് .ഗാന രചയിതാവ് എന്ന നിലയിലാണ് അദേഹം ഏറ്റവും പ്രശസ്തന്‍.എന്നാല്‍ കൊള്ളാവുന്ന കുറെ ചിത്രങ്ങള്‍ സംവിധാനവും ചെയ്തിട്ടുണ്ട് അദേഹം (ആന്ധി പോലെയുള്ളവ).അദേഹം സംവിധാനം ചെയ്ത നസിറുദീന്‍ ഷാ, രേഖ ,അനുരാധ പോഡ്വാള്‍ എന്നിവര്‍ അഭിനയിച്ച ഇജ്ജാസത്ത് (Ijjazath ) എന്നൊരു ചിത്രമുണ്ട്.എപ്പോളെങ്കിലും സമയം കിട്ടിയാല്‍ സി ഡി യോ മറ്റോ എടുത്തു കണ്ടു നോക്കണം (സാധനം കിട്ടും) മുകളില്‍ പറഞ്ഞ അതേ കഥാബീജം ഒരു മെലോഡ്രാമയും ഇല്ലാതെ എത്ര രസകരമായി ഒരു നിമിഷം പോലും ബോര്‍ അടിക്കാതെ എടുത്തിരിക്കുന്നു എന്ന് മനസിലാകും.മഴയും കൊടും കാറ്റും ഉള്ള ഒരു രാത്രിയില്‍ ഒരു ചെറിയ റെയില്‍വേ സ്റ്റേഷന്‍ വെയിട്ടിംഗ് റൂമില്‍ രാത്രി ചെലവഴിക്കാന്‍ നിര്‍ബന്ധിതര്‍ ആകുന്ന, അവിടെ വെച്ച് ആകസ്മികമായി കണ്ടു മുട്ടുന്ന,പണ്ട് വേര്‍പിരിഞ്ഞ ദമ്പതികള്‍,ആ രാത്രിയില്‍ അവരുടെ സംഭാഷണങ്ങളിലൂടെ അവരുടെ പഴയ ജീവിതത്തിലേക്ക് നമ്മെ കൊണ്ട് പോകുന്ന ,ഒടുവില്‍ ആ രാത്രി അവസാനിക്കുമ്പോള്‍ അവസാനിക്കുന്ന ചിത്രം കണ്ടിരിക്കേണ്ടത് തന്നെയാണ് എന്നാണ് എന്‍റെ അഭിപ്രായം.

ശരി . അതിരിക്കട്ടെ ഈ ചിത്രം .. അതല്ലേ നമ്മുടെ വിഷയം ?

ഡോക്ടര്‍ എനിക്ക് പലപ്പോഴും തോന്നിയിട്ടുള്ളത് ഈ ബ്ലെസി എന്ന സംവിധായകന് എന്തോ കാരണം കൊണ്ട് മോഹന്‍ലാല്‍ എന്ന താരത്തെ പേടിയാണ് എന്നാണ്.എന്നാല്‍ എന്ത് കൊണ്ടോ മമ്മുട്ടിയെ വെച്ച് പടം എടുക്കുമ്പോള്‍ ഈ പേടി കാണുന്നുമില്ല.(പളുങ്കിലും കാഴ്ചയിലും നായകന് സാധാരണത്വം കൂടുന്നതും തന്മാത്രയും ഭ്രമരത്തിലും നായകന് സവിശേഷതകള്‍/ പ്രത്യേകതകള്‍ കൂടുന്നതും ഇതിനു ഉദാഹരണമാണ്‌ ) ഭ്രമരം എന്ന ചിത്രം എടുക്കുമ്പോള്‍ സൂപ്പര്‍ താരത്തിന്‍റെ ഭാര്യക്ക്‌ അവിഹിതം എന്ന് പറഞ്ഞാല്‍ അത് ആരാധകര്‍ സഹിക്കുമോ എന്ന പേടിയാണ് ആ ചിത്രത്തെ ഈ നിലയില്‍ എത്തിച്ചത് എന്ന് വിശ്വസിക്കുന്ന ആളാണ് ഞാന്‍.(അല്ലെങ്കില്‍ ഒരു പക്ഷെ കോക്ക്ടൈല്‍ എന്ന ചിത്രം ഉണ്ടാകുമായിരുന്നില്ല).ഈ പറഞ്ഞതിന്‍റെ തുടര്‍ച്ചയാണ് ഈ ചിത്രത്തില്‍ ലാലിന് കൊടുത്തിരിക്കുന്ന മാത്യൂസ്‌ എന്ന കഥാപാത്രം.നേരത്തെ പറഞ്ഞ ഹിന്ദി ചിത്രത്തില്‍ നായികയെ വിളിച്ചു കൊണ്ട് പോകാന്‍ രാവിലെ വരുന്ന (സിനിമ തീരുന്നതിനു അഞ്ചു മിനിട്ട് മുന്‍പ്) ശശി കപൂര്‍ അവതരിപ്പിക്കുന്ന കഥാപാത്രത്തെയാണ് ലാലിന് കൊടുത്തിട്ടുള്ളത്. അവിടം മുതല്‍ തുടങ്ങുന്നു പ്രശ്നങ്ങള്‍.ലാലിന് ഒരു കുഴപ്പവും ഇല്ലാതെ പൂര്‍ണ ആരോഗ്യവാനായി കാണിച്ചാല്‍ സ്വഭാവികമായും കാണികളുടെ സഹതാപം അച്ചുതമേനോനില്‍ ആയിരിക്കുമല്ലോ? ആ ഒരൊറ്റ കാരണം കൊണ്ടാകണം മാത്യൂസ്‌നെ ശരീരം തളര്‍ത്തി വീല്‍ ചെയറില്‍ ഇരുത്തിയത്.(വേറെ ഒരു കാരണവും എനിക്ക് തോന്നുന്നില്ല).കുറഞ്ഞ പക്ഷം വളരെ കുറച്ചു സീനുകളില്‍ പ്രത്യക്ഷപ്പെട്ടു വലിയ ഒരു ഇംപാക്റ്റ് ഉളവാക്കുന്ന രീതിയില്‍ ലാലിന്‍റെ കഥാപാത്രത്തെ ഒരുക്കിയിരുന്നെങ്കില്‍ പോലും ഒരു പക്ഷെ എന്നും ഓര്‍ക്കാവുന്ന ഒരു ചിത്രം ആയേനെ ഇതു.(ഒന്ന് മുതല്‍ പൂജ്യം വരെ ഉദാഹരണം).ഇവിടെ സംഭവിക്കുന്നത്‌ ബ്ലെസി എന്ന സംവിധാന പ്രതിഭ കാരണം ചിത്രത്തില്‍ ഉടനീളം ഔട്ട്‌ ഓഫ് പ്ലേസ് എന്ന് പറയാവുന്ന രീതിയില്‍ മുഴച്ചു നില്‍ക്കുന്ന ഒരു കഥാപാത്രം ആകുന്നു മാത്യൂസ്‌.കുറഞ്ഞ പക്ഷം ഇവരെയൊക്കെ വെച്ച് ഒരു നല്ല പടം ചെയ്യാനാണ് ആഗ്രഹം എങ്കില്‍ കുറഞ്ഞ പക്ഷം മനുഷ്യര്‍ സംസാരിക്കുന്നതു പോലെയുള്ള വാചകങ്ങള്‍ എഴുതി കൊടുത്താല്‍ ഉപകാരം.മോഹന്‍ലാലിന്‍റെ ഒക്കെ നല്ല കാലത്ത് പോലും ഇങ്ങനെ ഒരു സിനിമയെ രക്ഷപ്പെടുത്താന്‍ കഴിയുമായിരുന്നോ എന്ന ചോദ്യത്തിന് ഇല്ല എന്നാണ് എന്‍റെ ഉത്തരം

രണ്ടാമതായി എനിക്ക് ഒഴിവാക്കാമായിരുന്നു എന്ന് തോന്നിയത് ജയപ്രദ എന്ന നടിയെയാണ് . അടിസ്ഥാനപരമായി സുന്ദരമായ ഒരു മുഖം ഉള്ള (ഉണ്ടായിരുന്ന) ഒരു നടി എന്നതൊഴിച്ചാല്‍ ഇന്നത്തെ ബോളിവുഡ് സിനിമയിലെ ഒരു കെ ആര്‍ വിജയ ആണ് ആ നടി എന്നാണ് എന്‍റെ അഭിപ്രായം.നേരത്തെ പറഞ്ഞ ഹിന്ദി ചിത്രം മനസ്സില്‍ കിടക്കുന്നത് കൊണ്ടാകണം ഹിന്ദി നടി രേഖയാണ് എനിക്ക് മനസില്‍ വരുന്ന ആദ്യ നടി.രേവതിയെ പോലെയുള്ള ഒരു നടി ഒക്കെ നന്നാക്കും ആയിരുന്ന വേഷം ശരാശരിയിലും താഴെ ആക്കാനെ ജയപ്രദയുടെ സാന്നിധ്യം ഉപകരിച്ചുള്ളൂ എന്ന് പറയേണ്ടി വരും.പിന്നെയുള്ളത് അച്ചുത മേനോന്‍റെയും ഗ്രേസും പ്രണയത്തില്‍ ആകുന്ന ഫ്ലാഷ് ബാക്ക് രംഗങ്ങളാണ്.ഈ സംവിധയകന്മാരുടെ ഒക്കെ വിചാരം പെണ്ണുങ്ങള്‍ ആശ പരെക് സ്റ്റൈല്‍ മുടിക്കെട്ടും കണ്ണ് നീട്ടി എഴുതുകയും ആണുങ്ങള്‍ ഷര്‍ട്ട്‌നു തോളില്‍ പട്ടയും രണ്ടു പോക്കറ്റും വെച്ച് മുടിയും പഴയ മോഹന്‍ലാല്‍ സ്റ്റൈല്‍ ആക്കിയാല്‍ പഴയ കാലം ഇങ്ങു വന്നോളും എന്നാണ് .

അതെന്താ അന്നൊക്കെ അങ്ങനെ ആയിരുന്നില്ലേ ?

അല്ല എന്നല്ല പക്ഷെ അത് മാത്രം ആയാലോ.ആ കാലത്തേ ആളുകളുടെ ശരീര ഭാഷ,പെരുമാറ്റം ഇതിനൊന്നും ഒരു പ്രാധാന്യവും ഇല്ലേ? എനിക്ക് ആ രംഗങ്ങള്‍ ഒരുക്കിയിരിക്കുന്നതില്‍ വലിയ അഭിപ്രായം ഒന്നും ഇല്ല എന്നതാണ് സത്യം.അച്യുതന്‍ - ഗ്രേസ് എന്നിവരുടെ ചെറുപ്പം അവതരിപ്പിക്കുന്ന ആര്യന്‍ നിവേദിത എന്നിവരുടെ അഭിനയത്തിന് ഈ രംഗങ്ങളിലെ പാളിച്ചകളില്‍ നല്ലൊരു പങ്കുണ്ട്.ഇതൊന്നും പോരാത്തതിനു അവസാനം കുറെ വെളിപ്പെടുത്തലുകളും വേറെ.സകല പ്രശ്നങ്ങള്‍ക്കും കാരണം ഗ്രേസിന്‍റെ ദുഷ്ടനായ അപ്പനായിരുന്നു എന്നും(പുള്ളി ചത്ത്‌ പോയത് കൊണ്ടാകും സകലതും ഇവര് വഴക്ക് ഉണ്ടാക്കി വേര്‍പിരിഞ്ഞത് മുതല്‍ കൊച്ചു അമ്മയില്ലാതെ വളര്‍ന്നത്‌ വരെയുള്ള സംഭവങ്ങളുടെ പൂര്‍ണ ഉത്തരവാദിത്വം വരെ അദ്ദേഹത്തിന്റെ തലയിലാണ്.വല്ല നരേന്ദ്ര പ്രസാദിന്‍റെയോ മറ്റോ ഫോട്ടോ ഫ്രെയിം ചെയ്തു വെച്ച് കാണിക്കാമായിരുന്നു എന്ന് തോന്നി പോയി)ഈ ഞെട്ടിപ്പിക്കുന്ന സത്യം അറിയുന്നതോടെ അനൂപ്‌ മേനോന്‍ കരഞ്ഞു അമ്മയോട് മാപ്പ് ചോദിക്കുന്നു.ഈ വെള്ള പൂശല്‍ ഇല്ലാതെ ഇല്ലാതെ ഒരു മലയാള സിനിമ എന്ന് കാണാന്‍ പറ്റുമോ ആവൊ?

അനുപംഖേറും ക്യാമറയും ആണ് ഈ ചിത്രത്തില്‍ ആശ്വാസമായി എനിക്ക് തോന്നിയ (തെറ്റ്,വളരെ നന്നായി എന്ന് തോന്നിയ ഘടകങ്ങള്‍).. മലയാളി അല്ലാത്ത ഒരു നടന്‍ തികഞ്ഞ ഒരു മലയാളി കഥാപാത്രത്തെ എത്ര നന്നായി അവതരിപ്പിക്കുന്നു എന്ന് കാണുമ്പോള്‍ തിലകന്‍ ഒക്കെ സജ്ജീവം അല്ലാത്തതില്‍ ഉള്ള നഷ്ട്ട ബോധം കുറയുന്നു.സൂപ്പര്‍ താരത്തിന്‍റെ ഭാര്യയെ മറ്റൊരു നടന്‍ കെട്ടിപ്പിടിച്ചാല്‍ ആ ഭാര്യ അപ്പോള്‍ തന്നെ ഹാര്‍ട്ട്‌ അറ്റാക്ക്‌ വന്നു അന്തരിച്ചോണം എന്ന നിയമം ഇവിടെ കൃത്യമായി പാലിക്കപ്പെടുന്നുണ്ട്.(പഴയ കാലത്ത് ബലാല്‍സംഗത്തിന് ഇരയായാല്‍ നായിക ക്ലൈമാക്സില്‍ നായകനെ രക്ഷിക്കാനായി വില്ലന്റെ കത്തിമുനയില്‍ തീരണം എന്ന നിയമത്തിന്റെ ബൌധിക പതിപ്പാണ്‌ സംഭവം ).ലാലിന്‍റെ ചെറുപ്പം കാണിക്കുന്ന രണ്ടു മൂന്നു രംഗങ്ങള്‍ ഉണ്ട്. കടല്‍ തീരത്ത് ജയപ്രദയോടൊത്ത് കെട്ടി മറിയുന്ന സംഗതി.തികച്ചും അനാവശ്യവും ബോറും ആണ് ഈ രംഗങ്ങള്‍. ബ്ലെസി ക്യാമറ ദൂരെ വെച്ച് ചിത്രീകരിക്കുന്നു എന്നത് കൊണ്ട് അധികം ഇല്ല എന്നതും ആശ്വാസം.ബ്ലെസി എന്ന തിരകഥകൃത്തും ബ്ലെസി എന്ന സംവിധായകനും രണ്ടു വഴിക്ക് പോകുന്ന തോന്നല്‍ പലയിടത്തും ഉണ്ടാകുന്നു.മാത്യൂസ്‌ അച്ചുത മേനോനെ ആദ്യം കാണുന്ന സമയത്ത് അയാളുടെ മുന്നില്‍ വെച്ച് ഭാര്യയോട്‌ അയാള്‍ നടത്തുന്ന സ്നേഹപ്രകടനം പോലുള്ളവ , അവയോടു ഭാര്യയുടെ പ്രതികരണം ഇവയൊക്കെ യാതൊരു യാഥാര്‍ത്ഥ്യ ബോധം ഇല്ലാത്തവ പോലെയാണ് തോന്നിയത്.അഭിനേതാക്കളില്‍ ബാക്കിയുള്ള അനൂപ്‌ മേനോന്‍,ധന്യ മേരി വര്‍ഗീസ്,നവ്യ നടരാജന്‍,അപൂര്‍വ തുടങ്ങിയവര്‍ കാര്യമായ ദ്രോഹം ഒന്നും ചെയുന്നില്ല എന്നതാണ് സത്യം.ഒടുവില്‍ ഇതില്‍ ആര്‍ക്കു ആരോടാണ് പ്രണയം എന്നൊരു ചോദ്യം മാത്രം കാണികളില്‍ അവശേഷിക്കുന്നു.

ഡോക്ടര്‍, ഈ നിരൂപക ലോകത്ത് കൈയടി കിട്ടാന്‍ യുവതാരങ്ങളെ ചീത്ത പറയുകയും സൂപ്പര്‍ താരങ്ങളെ വാനോളം പുകഴ്ത്തുകയും ചെയ്യുകയാണ് വേണ്ടത് എന്നറിയാഞ്ഞും അല്ല. ഇപ്പോളത്തെ മലയാള സിനിമ നിലവാരം വെച്ച് ഇതൊന്നും ഒരു പ്രശ്നമേ അല്ല എന്നതും സത്യം.എലിപ്പത്തായവും,പൂച്ചക്കൊരു മൂക്കുത്തിയും, തൂവാനതുമ്പികളും,കിന്നാര തുമ്പികളും ഒരേ മനോഭാവത്തോടെ കാണാന്‍ പോകാന്‍ കഴിയാത്തതിന്‍റെ പ്രശ്നമാവാം ഇതു.ബ്ലെസിയുടെ മറ്റൊരു ബൌധിക സര്‍ക്കസ്സിനു അപ്പുറം മറ്റൊന്നുമായി ഈ ചിത്രത്തെ എനിക്ക് കാണാന്‍ കഴിയുന്നില്ല.

സുഹൃത്തെ , സത്യമായിട്ടും ഞാന്‍ ഈ പടം ഇന്നലെ കണ്ടതാണ് .ഇജാസത്തും കണ്ടിട്ടുണ്ട് . നിങ്ങള്‍ ഈ പറഞ്ഞ പല കാര്യങ്ങളും എനിക്കും തോന്നിയതാണ് . പക്ഷെ പുറത്തു മിണ്ടാന്‍ ഒക്കുമോ? ശവ സംസ്കാരത്തിന് സുപ്പര്‍ താരം വൈകി എത്തിയതിനെ വിമര്‍ശിച്ച ആളുടെ കൈ തല്ലി ഓടിച്ച ഫാന്‍സ്‌ ഉള്ള നാടാണ് ഇത്.

അത്തരം ഫാന്‍സ്‌ ക്ണാപ്പന്മാരെ എനിക്ക് പേടിയില്ല ഡോക്ടര്‍ .പക്ഷെ , ബ്ലെസ്സി മോഹന്‍ലാല്‍ ചിത്രം ഇറങ്ങി ആദ്യ ഷോ കഴിയും മുന്‍പേ ' ദാണ്ടേ പിടിച്ചോടാ കോപ്പന്മാരെ നിങ്ങളുടെ ലാലേട്ടനെ ' എന്ന് ആരാധകരുടെ മോന്തക്കിട്ട്‌ ലാലിനെ എടുത്തു പൂശുകയാണ് ബ്ലെസ്സി ; അനിര്‍വച്ചനീയവും , അവാച്ച്യവുമായ ദൃശ്യാ ഭംഗി പ്രേക്ഷകന്റെ കരളില്‍ കയറി ക്യാബറേ കളിക്കാത്ത ഒരു നിമിഷം പോലും ഈ സിനിമയില്‍ ഇല്ല ; എന്നൊക്കെ റിവ്യൂ എഴുതുന്ന വിഷ ജന്തുക്കളെ എനിക്ക് പേടിയാണ് ഡോക്ടര്‍ , പേടിയാണ് . അതില്‍ ഒരുത്തനെയെങ്കിലും ഇല്ലാതാക്കാനാണ് ഞാന്‍ ഇന്നലെ ശ്രമിച്ചത് .ഇവന്മാരെ കൂട്ടത്തോടെ ഇല്ലാതാക്കാന്‍ ന്യൂക്ലിയര്‍ ബോംബ്‌ മതിയാകുമോ ഡോക്ക്?

സംശയമാണ് സുഹൃത്തേ. ന്യൂക്ലിയര്‍ ബോംബ്‌ രണ്ടെണ്ണം പൊട്ടിച്ചു കഴിഞ്ഞാലും നിവര്‍ന്നു നിന്ന് മൂത്രമൊഴിക്കുന്ന സുപ്പര്‍ സ്റ്റാറിന്‍റെ അടുത്തു മുട്ട് കുത്തി നിന്ന് മുകളിലേക്ക് നോക്കി മഹാത്ഭുതം തന്നെ അണ്ണാ !!! എന്ന് പറയാന്‍ ഇവന്മാര്‍ നാലഞ്ചെണ്ണം അപ്പോഴും ബാക്കി കാണും

മലയാളം സിനിമയുടെ വിധി .